كرسِي التعٙـآرف العددُ العآشـر ( habchisalaheddin )

[Salah eddin]

قل كلمة للجزائر و فلسطين و العراق و سوريا و اليمن و ليبيا
هل انت من هواة المطالعة​

للجزائر ... الله يسلكها على خير مع مول الياغورت
لفلسطين ... يفرجها ربي ..
للعراق ... خطاتكم من صدام الله يرحمو رحتو فيها
لسوريا ... الله يسلك وحلكم
لليمن ... الله ياخذ الحق
لليبيا ... الله قالب ...
هذي هي
...
بالنسبة للمطالعة ... شوي شوي مين ذاك مش طول ​

 

[chirine zina]

اهلا اختي شيرين
ههه
بن عميييي ...راكي كثرتي الاسئلة ههه
بسم الله نجاوب
*صف لي شخصيتك في سطرين ؟
ياودي في حكاية الشخصية و كذا نجابك كيما هاك
انا انسان نحب الصراحة و و نحب نعبر على رايي و نمدر الموقف تاعي مهما كان الحال
نحب الفكاهة و الطابع الهزلي ... امور الجد نحب نكون جدي فيها و بعض التفاهات ما نحبش نلقي ليها بال
وش نزيدلك ؟ ههه
* مواصفات فتاة أحلامك ؟
ههه
يا حسراه راكي رحتي لنقطة حساسة
فتاة احلامي لازم تكون ظريفة و مطيعة و تاخذ الراي و متخلقة و اكيد مولات دين
لازم تكون تعرف اعمال الدار و واجباتها بلا ما نقوللها ... و اكيد ...لازم تقعد في الدار
ههه
هذي هي ..ههه
يسما نتا تخدم وهي قاعدا في الدار
بالحق يكون تخمامك تخمام واح أخر علاخاطر نتا متعلم
ودارس ...
*علاه سماوك عاشور الحادش ؟ قتلك قول علاه برك ومتبهدلش بيا وتقولي نتي راك فاهم
اولا نتي هي لي سميتيني عاشور حداعش ههه
ثانيا نظن لاني نجب الفكاهة و لاني بطبعي مرِح على ذيك لي سميتوني عاشور حداش
ههه
علاه قلتلي نتي ياك قتلك متقولش ..ههه بهدلت بيا
كلي يهدر مع مرت بوه ههه
* علاه جامي بدلت الصورة الرمزية ؟ سؤال وجيه وعجيب هههه
صراحة مانيش مركز ياسر مع الشكليات ...ها الصورة الي جات تعقب ههه
* علاه خيرت الصورة الرمزية هاديك بذات ومخيرتش صورة وحد أخرى؟ هذا ثاني سؤال مليح ههه
و الصورة الي راني دايرها تعبر على التقاليد و الاصالة تاعنا كمسلمين و كعرب
و لاني نايلي ... و القندورة و العمامة من تراثنا .. قلت ندير عمامة خير
...
برااافووووو عجبتني صراحتك
شكرا اختي شيرين و راني نستنا في اسئلتك الاخرى
مايكون غير خاطرك

​

 

[Salah eddin]

السلام عليكم
اهلا بالضيف الكريم الاخ صلاح
مرحبا بيك في هذا الموضوع ان شاء الله اقامة ممتعة
انا درك بالتيليفون نطرح عليك اسئلة خفاف وغدوة لا كتب ربي نرجع ونطرح اسئلة صعاب هههه
المهم سؤال بسيط الاخ صلاح تخصص تاعو علمي ولكنو جيد في المجال الادبي
خاصة لاحضت انك تميل للشعر وعندك فصاحة اللسان
فما سر تمكن الاخ صلاح من الجانب الادبي! هل هي هواية فقط !
الاخ صلاح ناوي يدير تخصص معين في الطب مثلا ناوي تكمل تقرا ودير طبيب قلب او اي تخصص آخر ولا تكتفي بالطب العام
هل الاخ صلاح راضي عن نفسو من كل النواحي !
اكتفي بهذه الأسئلة ولي عودة ان شاء الله بالتوفيق
​

و عليكم السلام اهلا بالاخت مريم
ماعليش هاتي اسئلتك ضرك و غدوة يفرجها ربي سبحانو ههه
...
بالنسبة للادبيات و الحمد لله من بكري و انا متميز في الادب
و منذ صغري و انا محب لمطالعة القصص و المجلات و الروايات سواء كانت بالعربية او بالفرنسية
و اما بالنظر الى الادب العربي عموما و الشعر خصوصا ... فهي لا تعدو كونها هواية جرت
...
بالنسبة لسوالك الثاني ... ههه كاين ياسر قاشي يسقسوني هاك ...نقوللهم ياودي يعطيك نكمل السبع سنين هذو و الله لاكان تخصص هههه
ياودي يديقوتي الواحد من الميدسين هذي و الله ...ههه
صراحة انا مانيش معول ندير تخصص ... نجيبهالك من التالي ...ههه..الطب العام ياسر عليا ...
بالنسبة للرضى عن النفس ... الحمد لله على العموم لاباس ... تبقى شوي نقائص لانو الكمال لله
لكن الله يصلح حالنا و يهدينا سواء الصراط
شكرا اختي على المشاركة و في انتظار اسئلتك​

 

[Salah eddin]

اهلا وسهلا بالاخ مير دكتور صلاح

ان شاء الله تعجبك الاستضافة

1. هل قرات كتبا اثرت فيك من قبل

و ماهي?
قريت كتب بصح ماكاش الي زعما أثر فيا صح ...ههه صراحة

2. ماهو ترتيبك في العائلة?
ترتيبي في العايلة ...انا ما قبل الاخير ...
3. اكثر شي يقلق صلاح
اكثر شي يقلقني كي واحد يجادلني و يقالبني في حاجة انا متاكد منها ...ههه
4.لوكانت عندك الفرصة لتصبح ميرا على الواقع
ماذا كنت ستغير او تضيف.
لوكان نصحلي و نولي مير ... نركز على نظافة البلدية و نعهتكم بفتح المشاريع و اعمار البلاد
و نحاول نتهلى في الفقرا و المساكين الي صح مغلوب على امرهم

5. تخصص الطب العام هل اخترته لانه كان حلمك ام فقط تخصص مطلوب كذلك كم المعدل الذي تحصلت عليه في الباكلوريا
صراحة الطب ماكانش حلمي ... درتو برك كي جبت معدل جيد في الباك ...
و الباك عندي زوج
واحد علوم تجريبية بمعدل 15:89
و الثاني لغات بمعدل 14 ...
و
اسفة
على الثرثرة
شكرا اختي على المشاركة في انتظار باقي اسئلتك
​

​

 

[Salah eddin]

السلام عليكم
و عليكم السلام
مرحبا بيك اخي صلاح اقامة طيبة
نبداو علي بركة الله
بسم الله ههه
طموحك يا السي المير؟
طموحي ساهل ماهل ...نكمل قرايتي و نحكم خدمتي و نحافظ على الاستقامة و المبادئ ونسيي ندير الخير
و هذي هي و السلام
واش تتمني في الدنيا ؟
نتمنى نحج بيت ربي مع العزوج الله يحفظها
صلاح من الرجال لي يحبوا اللبس والزوخ وووو?
و الله وال ..ههه..الي جات نعقب بيها ... و الله ما علابالي بالمظهر طووول ههه
ما رايك في الحب؟وحبيت في حياتك ولا جامي نقصد الجنس اللطيف ؟ههههه
في هذي ما نقدرش نقولك هههههه
قولي الاكلة المفضلة عندك?
كاين ياسر ...المحاجب و الشخشوخة و الزفيطي ..
صلاح من الناس لي يحبوا المطالعة واش من كتب تقراهم؟
نقرا عادة الروايات الفرنسية سواء البوليسية او غيرها
ايا جاوبني ودوك نرجعلك اخي اوك
سلام
نظن راني جاوبتك ... ايا راني نستنى اسئلتك الاخرى اختي مليكة
بالعافية

ا​

 

[طموحة]

السلام عليكم ورحمة الله وبركاته
قبل ما نطرح أسئلة أردت أن أعقب فقط
على الطب العمومي و الاختصاص
هي اكيد سبع السنين تمرمد في الطب يولي أحيانا الانسان يخمم برك باش يطلع العام
لكن في نفس الوقت سنوات الاختصاص لا تشبه سنوات العمل
بالعكس راح تكون أقرب للتطبيق فيها من أنك تكون طبيب عام ربما أكثر السنوات الممتعة هي سنوات الاختصاص
و الطبيب المختص عندو حصة في العطاء أكثرمن الطبيب العام
يعني كاين بزاااف ميزات في الاختصاص فما هو شيءليخلاك تعزف عنه رغم أنها بداية المشوار ؟
هل الطب كان لك الحلم الملح أم أنه مجرد اختيار لبكالوريا جيدة ؟
كيفاه سجلت تخصصين نحاوه القانون لازم تروتيري واحد من لباك خيروك بين أحدهما كنت حبة نديرها قالولي ممنوع


​

 

[Salah eddin]

السلام عليكم ورحمة الله وبركاته
قبل ما نطرح أسئلة أردت أن أعقب فقط
على الطب العمومي و الاختصاص
هي اكيد سبع السنين تمرمد في الطب يولي أحيانا الانسان يخمم برك باش يطلع العام
لكن في نفس الوقت سنوات الاختصاص لا تشبه سنوات العمل
بالعكس راح تكون أقرب للتطبيق فيها من أنك تكون طبيب عام ربما أكثر السنوات الممتعة هي سنوات الاختصاص
و الطبيب المختص عندو حصة في العطاء أكثرمن الطبيب العام
يعني كاين بزاااف ميزات في الاختصاص فما هو شيءليخلاك تعزف عنه رغم أنها بداية المشوار ؟
هل الطب كان لك الحلم الملح أم أنه مجرد اختيار لبكالوريا جيدة ؟
كيفاه سجلت تخصصين نحاوه القانون لازم تروتيري واحد من لباك خيروك بين أحدهما كنت حبة نديرها قالولي ممنوع


​

و عليكم السلام و رحمة الله
اهلا اختي طموحة ... و بسم الله نجاوبك مباشرة على اسئلتك
العزوف عن التخصص ... هذا قرار مبدئي مني ... حاليا راني مع الطب العام و يعطيك نكمل السنوات هذو برم
و مبدئيا مانيش معول على الاختصاص نهائيا ... بالاك صح كيما راكي تقولي سنوات الاختصاص ممتعة ... لكن ...كل واحد و الطريق الي يسلكها
بالنسبة لسوالك الثاني .... الطب ماكانش حلمي صراحة حلمي كان حاجة اخرى
لكن الله قالب ...
بالنسبة لقضية تخصصين ... السر انو كل تخصص في جامعة ..يعني جامعتين مختلفتين. و راني نقرا فيهم و عادي ما كان حتى مشكل ..​

 

[ضآحكة مستبشرة]

السلام عليكم
اهلا و سهلا بك في هذه القعدة المتواضعة
ان شاء الله يعجبك الحال

عندي سؤالين ولا ثلاثة ولا كثر منعرف هههه

اول سؤال :
- تفضل الصلاة في المسجد ولا في المنزل ؟
- واش هي الولاية لي زرتها و تتمنى ترجع ليها ؟
- رأيك في جارتكم ولاية المدية ^_^ ؟
- هل التقيت بأحد الاعضاء من هذا المنتدى ؟


اكتفي بهذا القدر
و لي عودة ​

 

[Salah eddin]

السلام عليكم
و عليكم السلام
اهلا و سهلا بك في هذه القعدة المتواضعة
ان شاء الله يعجبك الحال
شكرا الله يحفظك و اكيد يعجبني الحال ههه
عندي سؤالين ولا ثلاثة ولا كثر منعرف هههه
ياودي هاتي برك ...
اول سؤال :
- افضل الصلاة في المسجد ولا في المنزل ؟
اكيد الصلاة في المسجد هذي ما فيهاش نقاش قاع ...
- واش هي الولاية لي زرتها و تتمنى ترجع ليها ؟
الولاية الي زرتها و نتمنى نرجع ليها هي ولاية سطيف ... عجبتني ياسر هذي الولاية
- رأيك في جارتكم ولاية المدية ^_^ ؟
المدية يا حسراه ..ههه..عندي ياسر صحابي من المدية ناس ملاح الله يبارك
و المدية منطقة زينة ياسر ... عندك شوي باردة ياسر في جيهة بني شكاو و البرواقية ههه امالا على العموم ... مدينة الله يبارك و اهلها من خيرة الناس
- هل التقيت لأحد الاعضاء من هذا المنتدى ؟
جامي تلاقيت بواحد من الاعضاء تاع المنتدى ...ههه...
اكتفي بهذا القدر
و لي عودة
مرحبا بيك دايما اختي اسما ... راني نستنا اسئلتك الاخرى ...​

شكرا اختنا اسما ​

 

[chirine zina]

سلاااام سي خونا لاباس
جبتلك أسئلة جدد
* إسم صديق مقرب ليك ؟
* واش رايك في مادة الفلسفة ؟
*أقرب واحد ليك في المنتدى ؟
* أول واحد تعرفت عليه في المتدى ؟
* واش رايك في الوسائل الإجتماعية فايسبوك ، فايبر ، واتساب ، منتدى؟
*إذا قالك واحد أنت شخصية فيها غموض ومتناقضة ومتخليش الواحد يفهمك واش تقلو ؟
* هههه واش تفطر الصباح قهوة ولا حليب ؟
* ويناه البلد لي تحبو بزاف بعد بلادك ؟
​

 

[Salah eddin]

سلاااام سي خونا لاباس
و عليكم السلام اهلا شيرين ... الحمد لله لاباس
جبتلك أسئلة جدد
* إسم صديق مقرب ليك ؟
كاين ياسر في الحقيقة ... بصح و ماكاش تفاضل بينهم
* واش رايك في مادة الفلسفة ؟
الفلسفة نشوف فيها مادة عادية جدا... من جانب الدراسة الاكاديمية
امالا الفسلفة كمجال و كعلم ان صح القول ... فيها و عليها
*أقرب واحد ليك في المنتدى ؟
كن نقول تقوم عليا الدنيا ...ههه...لذلك ما نقولش
* أول واحد تعرفت عليه في المتدى ؟
اول من تعرفت عليه في المنتدى كانت الاخت عفاف " الوردة السوداء "
* واش رايك في الوسائل الإجتماعية فايسبوك ، فايبر ، واتساب ، منتدى؟
صراحة انا ما نشجعش وسائل التواصل مهما كانت ...سواء فيسبوك او تويتر او فايبر او غيرها
اما المنتديات حاجة اخرى ... و الفرق واضح جدا
*إذا قالك واحد أنت شخصية فيها غموض ومتناقضة ومتخليش الواحد يفهمك واش تقلو ؟
نقولو " دز معاهم " ههه نقسر برك
وش نقولو مثلا الله قالب ...ههه كل واحد و نظرتو و كل واحد وكيفاه و ما نقدرش نقرض اسلوبي على الاخر مهما كان
* هههه واش تفطر الصباح قهوة ولا حليب ؟
نفطر بالقهوة وحدها و ساعات معاها شوي حليب ههه هذا مكا ...هه
* ويناه البلد لي تحبو بزاف بعد بلادك ؟
بعد بلادي ... نقدر نقولك فلسطين لان كل جزايري يحب فلسطين
امالا لو نستثنو فلسطين ... ماكاش دولة اخرى بالاك مصر تعجبني شوي و السعودية
​

 

[chirine zina]

شكرا على صراحتك
وهادو أسئلة أخرى :
*مثلا لكان نتاوع الدار يروحو وتبقا وحدك في الدار ....تطبخ ولا تشري من برا ...وزعما تعرف تطبخ ؟
* واش هي الحاجة لي تحبها في هادا المنتدى ؟
* واش هي نوع الأغاني لي تحب تسمعها ؟
* أفلامك المفضلة ؟

 

[Salah eddin]

شكرا على صراحتك
العفو ...
وهادو أسئلة أخرى :
*مثلا لكان نتاوع الدار يروحو وتبقا وحدك في الدار ....تطبخ ولا تشري من برا ...وزعما تعرف تطبخ ؟
صراحة ما نعرفش الطبخ ...حاجة سامبل كيما فريت و لا اومليت و لا حاجة مفورة ممكن
اما الصوالح الاخرى نشري من برا
* واش هي الحاجة لي تحبها في هادا المنتدى ؟
ياسر حوايج تعجبني هنا ... منها الtheme تاع المنتدى ههه
و الاعضاء هنا ناس الله ييارك
* واش هي نوع الأغاني لي تحب تسمعها ؟
ما نسمعش الاغاني اصلا ... ههه
* أفلامك المفضلة ؟
كاين ياسر افلام مفضلة عندي منها افلام الواستارن و الكوبوي
كيما pour une poignee de dollars
و الافلام الاجتماعية ثاني

​

 

[chirine zina]

اعضاء هنا الله يبارك .....ييي كيما أنا ههههه
نولو للأسئلة :
* عضو تعرفو في المنتى وشايفو في الحقيقة ويناه ؟
* عضو تتمنى أنك تشوفو في الحقيقة ؟
* عضو تحب تقسر معاه بزاف
* عضو تحسو كوميك ...ويضحكك بهدرتو ؟
* عضو تحتارمو لقوة شخصيتة ؟
* هل حصل و أزعجك أحد هنا في المنتدى ؟ ​

 

[Salah eddin]

​

اعضاء هنا الله يبارك .....ييي كيما أنا ههههه
ههه اكيد نتي وحدة من الاعضاء الي هدرت عليهم هههه
بصح ما تبدايش اديريلنا فالسمير ...ههه
نولو للأسئلة :
* عضو تعرفو في المنتى وشايفو في الحقيقة ويناه ؟
ماكاش ...ما عدا كاين واحد صاحبي مسجل هنا بصح جامي دخل
* عضو تتمنى أنك تشوفو في الحقيقة ؟
كل الاعضاء نتمناو نتلاقاو بيهم ههه بصح ما شكيتش ههه
* عضو تحب تقسر معاه بزاف
كاين ياسر هنا لي نقسر معاهم و ما نحبش نذكر البعض و نخلي البعض لذلك خلي هاك خير
و نتي راكي معاهم ههه ق تهناي ههه
* عضو تحسو كوميك ...ويضحكك بهدرتو ؟
كاين خونا @*حزن النبلاء* و خونا @محمد إبن الصحراء
هذو زوج شوي يضحكو ... بصح ما شكيتش يلحقوني فالضحك و الفكاهة ههه
* عضو تحتارمو لقوة شخصيتة ؟
كاين خونا @aljentel ...انسان الله يبارك نحتارمو و نقادرو ياسر ياسر ...
* هل حصل و أزعجك أحد هنا في المنتدى ؟
كاين بصح ..عفا الله عما سلف ​

​

​

 

[chirine zina]

هههههه أنا راني معاهم أيا مليح كي منسيتنيش
نبدا نسئل رح نهبل علابالك ههه
* ماهو تعليقك عندما إرتفعت أسعار الموز ؟
* ماهو تعليقك على فيديو #منسوطيش اللذي أنتجة شمس الدين العمراني واللذي إشتهر به ؟ أعجبك أم لا ؟ أثر فيك أو لا ؟
* ماهو تعليقك على لطفي دوبل كانو كي يقعد يحكي على سلال ؟ آسكو تكون معاه في كلامو ...يعني في نظرك راهو يهدر في الحق ؟ ولا ماكش معاه ومتسيبورتيش كلامو ؟
* إسم كتاب قريتو ؟
*إسم رواية قريتها ؟
* إسم بروف متحبوش في الجاميعة ؟
* زعما ظرت خطرى واحد يقرى معاك ؟ وإذا ضربت علاه ؟​

 

[*حزن النبلاء*]

لحقتني للضحك برك ... ^^

 

[Salah eddin]

هههههه أنا راني معاهم أيا مليح كي منسيتنيش
ههه ياك قلتلك هه
نبدا نسئل رح نهبل علابالك ههه
* ماهو تعليقك عندما إرتفعت أسعار الموز ؟
ماكانش عندي تعليق ...لاني اصلا قلييييل وين نشري الموز ههه
هذاك يهدرو عليه جماعة الدوفيز اما حنا مع الللوبيا و العدس و السلام ههه يعطيك ما يطلعولناش في سومة العدس ههه
* ماهو تعليقك على فيديو #منسوطيش اللذي أنتجة شمس الدين العمراني واللذي إشتهر به ؟ أعجبك أم لا ؟ أثر فيك أو لا ؟
فيديو رائع صراحة و المونتاج اروع و التركيب و كل شي في هذاك
الفيدو اعجبني ياسر ياسر ... بصح حكاية أثر و لا لا ...بالاك شوي
* ماهو تعليقك على لطفي دوبل كانو كي يقعد يحكي على سلال ؟ آسكو تكون معاه في كلامو ...يعني في نظرك راهو يهدر في الحق ؟ ولا ماكش معاه ومتسيبورتيش كلامو ؟
صراحة ...انا ما نحبش الي ينقد الشخص ... من المفروض ينقد السياسة
هو صح كلامو في جانب كبير صحيح ...لكن على العموم ..الي يروح وراء البحار و يبدا ينقد ما نسيبورتيهش ياسر

* إسم كتاب قريتو ؟
كتاب " لاتحزن "
*إسم رواية قريتها ؟
le portrait de Dorian Gray
* إسم بروف متحبوش في الجاميعة ؟
ههه
الاستاذ تاع البيوشيمي ههه يسموه هشام ههه
* زعما ظرت خطرى واحد يقرى معاك ؟ وإذا ضربت علاه ؟
هذيك بكري من كنا في السيام كنا ق على ماكاش دبزة ههه
واحد النهار واحد في السيام ...واحد مانيش عارف علاه دوست عاه هاك برك ههه
تميت نخبط فيه حتى جاتو الموت ههه ايا وبمعد تصالحنا و السلام ههه​

 

[Salah eddin]

لحقتني للضحك برك ... ^^

ههه
الله قالب هه هذاك ما حلبت البقرة ههه​

 

[ضآحكة مستبشرة]

السلام عليكم أخي صلاح لقد عدت من جديد ههههه

- واش هو الكرتون لي كنت تحبو كي كنت صغير ؟
- واش هي الشخصية الكرتونية لي تأثرت بيها و كنت تحسها قدوة ليك هههه ؟
- واش هو المجال لي تحب تخدم فيه بعد الطب و القانون ؟
- اسكو انت عندك حرفة في يدك و واش هي ؟
- تحب الساحل ولا الصحراء و علاش ؟
- شكون هو اللاعب في رياضة كرة القدم لي تحبو ؟
- شيء متحبوش في المنتدى ؟
- قسم فرغ واش في قلبك vs واش راك تهدر شكون خير ؟
- عضو تأثرت بقصته ؟
- سؤالي المفضل رايك في عاشقة الجنة هههه ؟

نكتفي بهذا القدر ^^​