السلام عليكم ورحمة الله وبركاته
آآآه في الموضوع هذا أحكي برك وخاطيك من عندي الأمان ويمنع منعا باتا حظر كل عنصر أنثوي يحكي في الموضوع هذا
صراحة الأمور هذي كاملة تنرفزني بصح كاينة حاجة ما فهمتهاش ولاماه الأخت تتسخر لخوها ؟ يعني فرض ولا واجب ولا هك برك هي تحب خوها مالا تتسخرلو ؟
طبعا هذي تاع تتسخر ع حسب كل عايلة كاين لي كي يقول خوها حاجة وفق دستور الدار تعتبر أمر والأخت عبد مأمور في الحالة هذي وتنوض حبت ولا كرهت تتسخرلو بصح أنا صراحة عمري ولا تسخرت من غير لبابا لي قليل وين يسخرني بصح خويا والو كون يبوس عينو ماكانش يعني ماكانش !! يعني هو عجزان يدير الحاجة هذيك لعمرو وواش القانون لي يقول أنو أنا مش عجزانة !! وواش يحتم عليا نخلي راحتي ونروح نتلهى بيه في وقت هو مش حايب يلهى بروحو
من لي كنت صغيرة ما نخدمش خدمة التسخيرات هذي كل واحد مسؤول عن نفسو لاماه نتحمل مسؤوليتو !!
بصح كلش كوم والجاست هذاك تاع راجل ومرتو قاعدين في زوج والراجل يعطش يعجز ينوض يشرب يقول لمرتو روحي جيبيلي نشرب وهي تنوض
هذي عييت نفهمها ما فهمتش علاه حتى هو ما ينوضش على خاطر عجزان وهي في ميزو فرحت كي تنوض تجيبلو يشرب !! لي يعجز يدير حاجة لعمرو ما يتوقعش بلي الناس أم يفرحو كي يديروهالو مي تلقى هذو مغلوب ع أمرهم ينوضو وهوما يسبو فيه في قلبهم بصح معرف بالاك هك في دستور دارهم دايرين. وما نحكيش ع الحالة تاع هي حبت تنوض تجيبلو من قلبها على خاطر بزاف نشوفهم يتنرفزو من الجاست هذا بصح يحكموها في قلبهم ما فهمتش علاه ما يعبروش وما يقولولش نوض جيب لعمرك لاماه أنا نجيبلك ! أنت عجزان تنوض وأنا مش عجزانة !
زعمة اتخيلي لمرا قاعدة وتعجز تنوض تشرب وتقول لراجلها روحي جيبلي نشرب ! نص من الشعب الجزايري يعتبرها دصارة وصحانية وجوه ! مالا لاماه الراجل كي يطلب هك مش دصارة وصحانية وجوه !!
شعاري في الحياة ما نتسخرش بصح كي نلقى لي يتسخرلي ما نوفروش المهم من غير بابا ما نخدمش الخدمة هذي لي فوق قلبي كي نحب نحنن قلبي ع خويا أوك أما تاع نديرها فوق خاطري أبدا، عمري غسلتلو حاجة واعتبرتها واجب كي طلب، عمري تسخرتلو فوق قلبي في دستور دارنا ماكانش واحد يخدم واحد غصب ومش كي هو راجل معناها احنا عبيد نخدموه .
مغسي ع الموضوع لي نرفزني على خاطر نكره عزرين الرجال في النقطة هذي ونتغزل كي نشوف لبنات يتسخرو مغلوب عليهم نحب ننطق في بلاصتهم مي واش دخلني
