عدنا والحمد لله، ان شاء الله رايحة نحاول نجاوب على كامل النقاط لي ذكرتها كيما وعدتك، خاطر لقيت فيها تجاوب كبير والحمد لله
نبداو بسم الله
وأنت قلتها بنفسك هنا أنا مارانيش ضد الزوجة الصالحة بل ضد الناس المنافقين، درك نتا علاه تحوس على الناس المنافقين؟ يخي كل واحد يتحط في قبرو وحدو؟
ربي وضع قواعد الزواج ويحاسبك نتا وحدك إذا تبعتو ولا ماتبعتوش إذا واش عندك في الناس، تقولي ربما يخوفوني، تجارب الناس ليست معيار، انا كل يوم نسمع
على ناس تحرقو بالنار هل مانزيدش نستخدمها؟ نورمال غدوة نشعل النار ونطيب غدايا وندير عدة أمور بيها، إذن المشكلة في الناس وقلة وعيهم ماش في الزواج
لازم نعيبو الشخص ماش الحاجة الرئيسية لي هي الزواج، وإذا الناس شوهو الزواج كون نتا مثال لصورة مميزة للزواج، أعطي صورة جميلة عليه وتبع واش قال ربي والرسول
تنجح في حياتك، دائما تبع نتا واش يخرج عليك وخوض نتا المغامرة بنفسك ماتستناش تجارب الناس تقررلك طريقك وتحددلك مخاوفك فهمتني يا خويا واش نقصد؟
يعطيك الصحة، راك جبتها قدقد، بما أنك رايح تدير احتياطاتك واش يخصك مالا؟ علاه خايف؟ لو نقولك درك كاينة طفلة بنت عايلة ومتأكدة منها مائة بالمائة غير
اتوكل على ربي تروح ولالا؟ ولا مانقولش انا بالاك انا مافياش ثقة يماك لي هي أقرب شخص ليك تقولك كاينة انسانة مليحة مائة بالمائة تروح تخطبها ولالا؟
هادو ناس لو يقولولك هكا تأمن بيهم وربي لالا؟ عندك صلاة استخارة وعندك فترة خطوبة، وعندك فرصة أنك تتعرف على هاد الإنسان وتسقسي عليها ماش غير في دارهم
من المدرسة الابتدائية تاعها وروح، وتزيد تتوكل على ربي، كاشما يبقى خوف؟ راك درت كامل احتياطاتك، واذا كتبلك ربي تدي وحدة ماش مليحة رغم الظاهر المليح
فهو ماشي لأنك مادرتش احتياطاتك بل لأنو ربي عمدا كتبلك هاد الانسانة لحكمة منو مانرعفها لا أنا ولا نتا، هو كتب فلانة لفلان قبل ما يجيو للدنيا لحكمة ولعبرة معينة
من بعد تعرف قيمتها وتعرف الحكمة منها، ربي يعلم وحنا مانعلموش وهذا جوابي كذلك على النقطة 4 كي تكلمت على زوجة لوط.
نتا هنا غلطت في كلمة وقلت لأني نخاف على قلبي منقدرش ندخل كل بيت، وهي العكس لازم تدخل كل بيت باه تحفظ كرامتك وقلبك، الاختيار الأمثل والبحث
في تأني هو لي يضمنلك كرامتك، نهار تروح تشري سيارة يخي ماشي تدخل لي تلقاها قدامك تهزها وتجي رايح؟ يخي تكبر بالك وتشوف وتتمعن وتفيريفيها مليح علاه؟
باه تحفظ دراهمك، وقلبك ماحبيتش تتعب عليه وديرلو قيمة؟ وتخير لي جات برك؟ لازم تفتش مليح، وهادي 100 بالمائة نلقى مرأة مليحة، شوف يا خويا الكمال لله
سبحانه وتعالى، شوف درك مع نفسك إذا نتا مثالي، يخي عندك عيوب؟ كذلك المرأة وكل البشر عندهم عيوب، والزواج هو تقبل عيوب الطرف الآخر والنظر لإيجابياته
نتا لما تروح تختار طفلة ترعفها من هدرتها معاك إذا تحشم وإذا متربية تسقسيها نهار الرؤية الشرعية كيفاه حابة تعيش حياتها؟ أعطيها الأمان، لأنو الطرف الآخر لما
مايلقاش الأمان فيك يولي يكذب باه يكسبك، نتا خبرها بلي راهي حرة تتكلم واش تحبو تحكي على حلمها في حياتها الزوجية كيفاه يكون واحكي معاها كذلك واتفاهمو
من خلال هدرتها تدي نظرة أولية، يعني 50 بالمائة تضمنها و50 بالمائة الأأخرى تضمنها بثقتك بربي، شفت الراحة النفسية لي تجيك كي تتقرب من إنسان؟ هاديك
هي 50 بالمائة لي يبعتهالك ربي باه تكملم وافقتك، خاطر يستحيل تعرف انسان من قبل، واشوا حط في بالك بلي بعد الزواج مرتك تكتشف فيك حوايج ماش ملاح
ونتا تكتشف فيها حوايج ماش ملاح بصح النسبة الكبيرة هاديك تاع الايجابيات تخليكم تتغلبو على السلبيات، إذا أمرك خليه على ربي وماتعتمدش على آراء الناس
ومواقف الناس كل واحد واش كاتبلو ربي ورزقك ماش كيما رزق فلان فهمتني.
هاد النقطة عجبتني بزاف، أولا نتا قلت لو نلقى لي تحبني، وين راه الحب والطفلة ماتعرفكش؟ تجي تخطبها تشوفك سيبو مسلسل مكسيكي ليه ليه تبدا المشاعر؟
يا أخي راك رايح تخطب وحدة ماتعرفكش جامي شافتك ولا تعرف عقليتك مثل ما نتا خايف منها هي خايفة منك، تحكي معاه وتتعرف عليها خلال فترة الخطوبة
من خلال أفكارها من خلال أحلامها وتقديرها للرجل وطريقة تربيتها للأطفال، هنا ترتاح نفسك كيما قلت من قبل وهي كذلك ترتاح نفسيتها كي تسمع منك ما يسر
تما يجي القبلو المبدئي، ونقدرو نقولو إعجاب، مانقدروش نقولو حب خاطر ماكانش مواقف، نتا صديقك تعيش معاه حياتك كاملة يديرلك موقف فاسد تكرهو
كذلك الحب مايجيش هكاك، كي تتزوجو وتشوف منك أخلاقك وطيبتك ولطفك وبلي تقدرها وتحترمها وتعرف قيمتها كإمرأة تما تحبك وتشوفك أغلى رجل في الدنيا
ونتا تاني نفس الشي، لما تشوفها تحترم يماك وتقدر والديك وتحتارمك وتقوم بواجباتها وامرأة مصلية وتحثك على دينك وتدي بيديك للخير تولي تحبها، الحب مواقف
ماش من النظرة الأولى، وعمرو لا كان من النظرة الأولى، إذن هنا بعد عندك نقطة غالطة، وهي ندي طفلة شرط أنها تحبني على شخصتي، كيفاه تحبك على شخصيتك
وهي ما تعرفك ما تعرف شخصيتك، بالعشرة يجي الحب، واصلا ربي قال على العلاقة الزوجية مودة ورحمة يعني أسمى وأجمل من الحب، فهمتني؟ إذن بدل
أول فكرة غالطة، وقول نختار الطفلة لي تشاركني أحلامي الكبيرة لي ناوي نحققها، ولي تحفظ شرفي وتصون داري وعرضي، كي تشوف نتا منها هاد الأمور وأكثر
تلقائيا راح تشوفها أجمل واروع النساء في العالم، هادي بغضا لنظر عن الجمال لأنو الجمال مسألة ترجع ليك وواحد ما عندو الحق يتدخل فيها.
راني فهمت واش تقصد خويا، ولو قريت ردودي السابقة وركزت معاهم تلقاني ركزتلك على هاد النقطة بالذات، وعلى هادي قتلك ماتديرش قيمة لنفسك
بالدراهم باه ماتديش وحدة تديك على مصلحة، نتا قلت نلم الدراهم مكرا باه وحدة ماترفضني، قتلك نهار تروح نتا لي تتحكم في شروطك، لي رفضتك على دراهمك
ماعندك مادير بيها ولي تفضلك على شخصيتك هاديك هي الصح، وماش شرط لي تدي راجل عندو الدراهم يسما ماش مليحة، يمكن توافقت كل الشروط مع هاد الشخص
مثلما الرجل يدي وحدة جميلة ونقولو داها على جمالها برك ماش على شخصيتها، وهي تقدر الشروط تكون متوافقة مع الإنسانة هادي، يعني فهمتني؟
والبنات اليوم غير يتزوجو بغني ومتدين برك مايهمش، ماتخيروش برك غني وهو خارج من رحمة ربي وقمار وخمر وووو والعياذ بالله
أولا أخي قتلك الحب بعد الزواج يجي ويجي من المواقف، فكيفاه إنسانة تخليك بعد الزواج؟ هادي تعتبر خيانة زوجية ويعاقب عليها الشرع والدين يعني ماتحتاجش
اثنين يهدرو فيها، اما بالنسبة للأم والأخت الكريمة، لو نذكرك يا أخي بأحد ردودك السابقة قلت المرأة ماصبرتش مع والديها تصبر على واحد براني؟ وهنا تقول
بلي ختك تعيش معاك في الدار نفس المشاكل وتوقف معاك؟ على هادي قتلك كاين بعض التناقضات، واصلا يماك بعد أليست زوجة؟ كيفاه وقفت مع زوجها؟
وكيفاه صبرت على الظروف؟ ماكانتش هي تاني عندها عائلة من قبل؟ المرأة منين تتزوج تتأقلم مع حياتها الجديدة باه ولدها خطرة خلاف يتزوج ويدير عايلة ويجيب
مرأة لي تصبر معاهوتبكر العايلة مع بعض وهكا تمشي الدنيا، واصلا الأم لي زعما عزيزة وولادها طيشوها وكاين حتى لذبحو أمهاتهم، فهل كل الأبناء كذلك؟ كل واحد
وعلاواه تربى، ولما تقولي زوجتي نقوم معاها بواجباتي بصح مانعطيهاش الحب، هناك تجربة داروها على النبات، النبتة لي يوقولها كلمة أحبك تنمو وتكبر وتزهر ولي يقولولها كلمة
غير جيدة تذبل، هذا نبات؟ ولي انسان تحبو يعيش على واجباتك الزوجية وفقط؟ الزوجة ماتحوسش عليك ماتضربهاش وتوكلها وتشربها وخلاص، راهو عصفور لو تربيه
تعاملو أحسن من هكا، عندها الحق انك تعطف عليها وتعاملها بمودة، الرسول صلى الله عليه وسلم وكان يعبر على حبو لزوجتو علنا، ونتا بينك وبينها تقولي مانقدرش؟
علاه هادا؟ عدوك لي يدير فيك المنكر ولو يتراجع على أعمالو ويطلب السماح تولي تحبو، ولي مرتك تتعب على راحتك وتربيلك ولادك وتسهر عليك كي تمرض
ماتستحقش تدي حقها من الحب؟ وماتقوليش مارانيش قادر نحب، مادام مازلت تقدر تحب يماك وباباك وختك يسما قلبك مازال يتحرك.
سأرد على بقية النقاط في رد آخر بحول الله الرد هادا طويل بزاف
