قالو ناس بكري:
نوصيك يابنتي الدار بلا كبير كي الجنان بلا بير والدار بلا صغار كي جنان بلا نوار زين جماعة كبيرها وزين دار صغيرها..
وعدوك تقتليه بالسكات..
واصبري على طبق جمر..
يجيك طبق التمر...
، زيني فالك كل صباح وعشية وعندك من دسارة الصغير ..
ولاتفرطي بنصح الكبير..
كلامهم حكمة تشهد عليه الجدود والجدودية...
كلمت السوء من مولا بيتك في البحر نسيان ...
طيشيها ..
وكلمة الحق اياك تخافي دسيها...
واذا شفتي بأهلو علة استريها ..
وحاجة السر مع زوجك في البير طيحيها..
وعندك تخلي واحد يشد من كتفك ويقلك قلتي...وقلتي ..
الفم المزموم ماتدخلو ذبانة..
وكلشي في دارك ..
تجماع مع نسا نوم خير منو ...
مش عيب الي تدخل الفم ..
عيب الي يخرج منو...
والحرة كلامها يتحط على الجرح يبرا
ويذوب ...
وتفرح بيها لقلوب ..
والعبيها طرشة حجرة ماتدي الهدرة.. ماتجيب عرة....
تحدثي بالساسية ..
واضحكي بحنانة..
ماتبيني سنيك كالذيب هاذيك دار الراجل مش داركم...
كوني مرة فحلة ماتغلبها غير طنجرة الكحلة...
المرا الحرة شقى ونقى ماتقول الجنب عياني وزمان بلاني..
نيتك زينيها وماكلتك ذوقيها...
واذا خباو عليك سر لاتلوميها ..
همي ياسر نحفظ انا سري...
والي ينصحك بالسر اسمعيه..
ولاتقاطعيه...
وخلي حاجة ضيف ديما مدسوسة.. والحاجة الزينة ديما ملبوسة ..
وديما اغسلي وجهك ماتعرفي مين يلاقيك ..
ونضفي بيتك ماتعرفي مين يجيك..
البيت ماتشدها ركيزة ..يشدوها لوتاد.. والمرا مايشدها غير لولاد.. مالا ولدك على القرآن والدين ربيه ..
ولا تخليه طالق راسو..
بالنصيحة والعلم نوريه..
يقوى مكانو بناسو ..وكبريه بأصلو وساسو..
الولاد كي البيض تحت جناحك..
كاين الي يسجى وكاين الي يجياح...
والكرش تجيب صباغ والدباغ...
،كاين الي جاب ولاد دارهم ركيزة..
وكاين الي جاب ولاد هربت بيهم الدنيا العزيزة..
لايغرك مال اذا كثر ولايغرك طفل اذا كبر..
قالت الام على وليدها:الشجرة الي غرستهانظلل بظلالها ولاتلي سدرة دڨتني باشواكها...
ولدتو قد الفار وكي كبر ولالي نار ..
وكي تزوج ولالي جار ..
مالا ارفدي والدين راجلك يجي نهار تشدي بلاصتهم..
واخدم ياصغري لكبري
