انا من عشاق اللغة العربية و محب كبير للغات ، بحكم دراستي الجامعية لي كانت 6 سنوات طب بيطري باللغة الفرنسية ،فصراحة موضوع اللغات هذا يجيني شيء مؤسف اذا حكينا من الجانب العلمي فمسألة اللغة في العلم ما عادش عندها أهمية كبيرة لانو بتطبيق بسيط تقدر ترجم من اللغة اللي راك تبحث فيها الى اللغة الام نتاعك فماهوش شرط أنك تكون بارع في لغة ما باش طور في البحث العلمي ، صحيح أنو اللغة الإنجليزية لغة علم في الوقت الحالي لكنها ضعيفة جدا لغويا ومافيهاش كلمات واسعة باش تشرح ظاهرة علمية ما ،
ما عنديش مشكلة في اللغة الفرنسية لانو اغلب الكتب لي قريتهم بالنسبة لتخصصي كان باللغة الفرنسية ولو اني ضعيف فيها ،لكن لم أحتاج الى جهد كبير لانو اللغة الاكاديمية تختلف تماما عن لغة الشارع ،ونعطيك مثال بسيط فرق كبير بين لغة العربية في كتاب العلوم الطبيعية وبين اللغة العربية في كتاب الادب ،اذا مسألة البحث العلمي ما تحتاجش انك تتعلم لغة فرنسية او لغة إنجليزي بالتهويل لي رانا نشوفو فيه ،ولو يدرس الشعب الجزائري من سنة أولى ابتدائي الى الجامعي ماهيش رايحة تتغير كفاءاتنا العلمية لان مسألة البحث العلمي تتعلق بالعقليات أولا وبمخابر البحث العلمي ، راك توصل الجامعة وتفهمني ان شاء الله .
نزيدك حاجة كجامعي وكحلول الترجمة راهي متوفرة وباشكال دقيقة إلى حد ما يعني بتطبيق ترجمة تقدر ترجم بحث علمي كامل وماهوش شرط أنك تكون تعرف هذيك اللغة او تتقنها لانو في الأول والاخير اللغة جعلت التواصل ومعرفتك بمصطلحات لغة اخرى ماهيش رايحة تخرج عالم اذا كانت العقلية العلمية ما عندكش ،دولتنا نفتقد لعنصر مهم وهو البحث العلمي ودعم البحث العلمي ، واغلب علمائنا والباحثين في الخارج قراو بالغة العربية و الفرنسية وحققو انجازات كبيرة ، و طالب العلم الحقيقي ما يحتاجش تغيير منظومة كاملة باش يتغير لانو لو كان عندنا الكفائة في ضرف اشهر تقدر تتعلم اي لغة في العالم ،وحنا رانا قرينا الإنجليزية من سنة أولى متوسط الى البكالوريا 7 سنوات وحنا نقراو فيها هل صنعنا انجاز لا ،يعني لما تقريها من الابتدائي وتزيد 3 سنوات لل 7 ماهيش رايحة تغير الكثير والله اعلم .
