قاطو العيد/ قاطو تاع الناس

[الامين محمد]

و الله في خاطري واحد السؤال قلت نسقسيكم
غي حنا عندنا المدام كي تخدم القاطو تتقلق و لا عندكم تاني انتوما
ياتل ترجع الهدرة معاها قليلة



تقول راها تفكك في بونبا و لا قنبولة


كي توصل عند عتبة باب الكوزينة تسمع تتواغا
ارججججججججججع ماااااا تقرررررربش روووووووووووح من هيييييييييه
و باش تذوق لازم تكون عندك واسطة كحلة
و اذا و ركز مع اذا و اذا خلاوك تذوق
يعطوك هاذاك الطرف اللي في قنت السينوا
ولا كاش حبة فات ليها الطياب او حبة طاحت زيادة في الحساب تاع زوج حبات فوق بعض
و الكاااارثة
باش ترقد فالشومبرة لي فيها الڨاطو تاع العيد
لازملك تكون مأدي اليمين الدستوري
وتكون عندك حسن السيرة وحسن السلوك


المهم قاطو الناس حتى اشعار اخر


خبرونا على هاذ المقريبة اذا تان عندكم ولا ق عندنا


موضوع على السريع سلااام
ــــــــــــــــــــــــــــــــــــــــــــــــــــــــــــــــــــــــــــــ
الحمد لله ربي يخليلي نيفي هههههه
​

 

[لمعانُ الأحداق]

كامل البيوت الجزائرية نظن كيفكيف
- عقلية واحدة متوارثة -
مي صح نتعبو عليها باينة خلو نهار العيد و تشوفوها و تذوقوها
اذا فتحنا العلبة الآن تخلاص قبل العيد
و " الضياف " وش نحطولهم ؟

نظن التفكير هذا جاي من مبدأ - إكرام الضيف -
الأحسن ديما يبقى للضياف
الجزائري لي يُحسن الضيافة و لو ماعندوش ^^

 

[حاتم خليفة]

عندنا كامل بصح أنا نفضل لحواشي نتاع البقلاوة غير تطيب البقلاوة نقوللهم واحد ما ياكل لحواشي من غيري
​

 

[الامين محمد]

الحمد لله ربي يخليلي نيفي هههههه

 

[حاتم خليفة]

الحمد لله ربي يخليلي نيفي هههههه

مشاهدة المرفق 170244

الحمد لله على سلامتك هههه

 

[النورس]

ركزلي كي يمدولك غير الحواشي ههه الباقي تع الناس

 

[حاتم خليفة]

ركزلي كي يمدولك غير الحواشي ههه الباقي تع الناس

لحواشي هوما لي فيهم البنة

 

[إلياس]

صراحة لست من عشاق الحلوى تع العيد لاني اعتبرها مصروف زايد

 

[أبو عاتكة]

بعد اسبوع من العيد تحوس عليه بفرق الحماية المدنية وفصيلة غطاسين و فرقة 90 من لواء المظليين وما تلقاهش

اك تعرف كلاوه الناس اللي كان نتاعهم من اللول

 

[حاتم خليفة]

ڨاطو العيد

جبتلكم أهم البلايص لي مخبيين فيهم الڨاطو وإذا لقيتوهم خلولي حبات 😂🤣 تحت السرير تحت البيفي فوق البيفي وراء لخزانة تحت لفراش الجديد في لفريڨو تحت البوطاجي

www.4algeria.com

​

 

[space-cowboy]

ههههههههه

لا يعطوك ذوق، من الكاطو المحروق، واللي زايدلو الطياب... يعني يا إما في الدرجة الأولى ولا الثانية من الحرق، ولا المعوج، ولا اللي مهرس، ولا اللي ما صدقش... ولا من يعاني من هشاشة العظام، يعني ترفدوا بالبالا ههههه

مهم كل متردية ونطيحة وما أكل السبع

النسا القافزات يدسو الكاطوا لمليح لتحت ويخليو العيّان لفوق كقربان للصوص الليل...
ما تجي توصل للكاليطي المليح تكون صليت صلاة العيد ههههه
والنساء البارعات يدسو بيدويات القاطو في أماكن لا تخطر على بالك... تلقى ذهبهم وما تلقاش القاطو

المهم كلشي فايت والله يخلي لنا انوفنا
طلب غير الصحة والسلامة

 

[*amani*]

حنا تنوض الدبزة نورمال والضغط تقول رانا في مسابقة مع لخر ناكلوه غير حنا الضياف مايكثروش ههه