صحا فطورك ختي أمينة وربي يتقبل
شوفي ختي أمينة مناقدرش نقول بلي الشباب ماكانش والإطارات ماكانش وأرباب أسر ماكانش تاني تقوليلي راكدرك تناقض في نفسك وأنا نجاوبك بلا أي مشكل شوفي ختي لوكان اليوم نقضو على الأسباب تختفي حوايج بزاف من المجتمع تاعنا وكل واحد ألسباب تاعو لي دايتو لهذ لحوايج يعني في بعض المرات نظلمو فتاة نراها ساقطة إلى أقصى درجة إن حق لي قول ذلك لكن
نعتبر أنفسنا مسؤولين على ذلك ومرات نظلم شخص نراه خارج الطريق وله ظروف قاهرة جعلته كذلك ومن بين الأمثلة ونقولوها صراحة وين شفتي واحد قدم حاجا لوجه الله لوحدة محتاجة وخلاص المخلوقة مالقاتش كيفاش تدير والله ماتدي حاجا غير بالمقابل يعني مرات حنا نكونو مساهمين في هذ ألأمور بزاف بالنسبة للشباب علاش مانقدروش نحكمو على خاطرش كاين لي كان شيطان ودار رايو ومن بعد هداه ربي ورجع إنسان أخر وكاين لي كان ماشاء الله تقولي عليه ملايكة ورجع أعوذ بالله يخدم خدايم الشيطان في روحو و يبقى حاير فيها وعلى هذي الحكم على المجهول ولا المستقبل يبقى دايما مجهول بصح كامل واش يدير الشباب مايلحقش واش راهم دايرين الشياب فالوقت الحالي وهما سباب خلاها وسباب هذ الشباب كامل هذي النقطة اللولة ونتمنى تفهميني مليح فيها ولواش راني نقصد .
أما قضية كل واحد وصاحبتو نقولك والله يا ختي أمينة رجعت عامة وفي كل بلاصة يعني تلقاه مازال
السنةالأولى مادخلهاش يعرف حوايج والله غير مرات يقعد مخك حابس ولوكان تهدر معاه والله غير يحبسك تاني بصح النقطة المهمة ولي نهدر عليها بزاف ونركز عليها ماشي تاع واحد عندو وحدة ويحبو بعضهم صح وراهم كيما يقولو يبنو في حياتهم مع بعض لكن نهدر على الخلاطين لي من واحد لواحد وهو من وحدة لوحدة وهذو لي نشرو لفساد كثر وهذو لي زرعو قلة الثقة لي رانا نشوفو فيها بين الطفل والطفلة ولحقت حتى لبعد الزواج ولي ظاهرة راها كثرت يعني يكتب المكتوب ويتزوجو وكي تفوت مدة يبدى يرجع لكلام واش درتي ومع من مشيتي وماتقوليليش مامشيتيش ومثل هذ الهدرة
وكيما قلتي الليسي والجامعة يكفي واش راه يتحكى عليهم نخلوهم يتنفسو بصح كاين نقطة لي هي كيما قلتي الشباب ولا عقليتو غير فالعلاقات ونقولك كاين منها كامل كي الشباب كي الشابات وهذ الظاهرة ماتدوخكش على خاطرش يشوفو فيها المتنفس الوحيد ليهم من الهموم والمشاكل لي راهم عايشينها ولي تهدر معاه يقولك أيا خلينا نزهاو الناس ولا الغاشي إناث وذكور من كثرت الديقوطاج ومن كثرت لي كرهو حياتهم ولاو يشوفو هذ الطريق شغل يلقاو فيها راحتهم بصح راحة كامل يعرفوها مؤقتة يعني حاجا تاع مرحلة ومنها تبدى الأمور الجدية لي يحوس يفكر فيها لكن مع الوقت ليرانا فيه يصطدم مع واقع مر يخلي التفكير في الأمور الجدية متعبة تاع الصح لتفكير أي شخص الراجل يولي يخمم باش يدير مستقبل ويدير مرى في دارو ويتهنى من كامل دعاوي الشر لي يتبعهم يلقى روحو يحلم بحلم رجع صعيب بالنسبة ليه باش يحققو والطفلة لي تحلم تاني هي تكون أم وتدير دارها تشوف الوقت يفوت وتقولك الوقت راه يفوت فيا والناس تقول عليا راني قعدت وبرت أيا يقولك خلينا نكملولها على جدها يعني كاين ظروف دايما هي لي راهي تساعد في تفشي هذ التخلاط لي رانا نشوفو فيه والناس اللولة تقولك دينار وقاية خير من قنطار علاج وهذا هو الحل الوحيد للأسف ومن غيرو مارايح يتبدل والو
والله ياختي أمينة غير الموضوع منور بمولاتو ولم أجد العبارات الذي توفيك حقك
وأعترف لك بأني سعيد بالنقاش معك كما يسعدني أكثر صراحتك وأسلوبك
في معالجة الموظوع حفظك الله ورعاك وربي يكملك بعقلك ويحققلك لك امنياتك ونقولك
أسمحيلي على الإطالة والموضوع يحتاج أكثر
وتقبل الله الصيام والقيام وصالح الأعمال
hmy: باباباااااااا.. هدي كبيرة :laugh:
