اني جيت هنا كنت نستنى النقاش لهيت هربتولي ههههههههههه
ربي يحفظك حبوبتي بوليانا عالدعوة للموضوع
وشكرا اخي محمد موضوع مفيد
انا مخطوبة وتقدرو تقولو متزوجة لأني عاقدة لكن العرس مازال
مشكلتي الخجل :blush:
مرات نحكي مع زوجي في التيليفون كي يقولي برك نحبك نكوبي عليه وهاذي العفسة تقلقو بزاف وانا ثاني نتنارفا بعدها ونقول لوكان غير ماكوبيتش مهبولة وخلاص وش حندير
مانحكيوش بالتيليفون بزاف
لكن النت يدخل بزاف من اجلي
وراهو بالتقريب ضيف دائم على اللمة باه يشوفني وش نحكي وش نقول ومع من نحكي؟؟؟
ومرات يزعف لمجرد اني نرد على موضوع او مع اخ هنا وكي نقولو راهم خاوتي يقولي مانيش نقولك ماتدخليش للنت لكن ماكان لاه تحكي مع الرجال اصلا عبالي عندو الحق لكن والله احيانا نبغي نغيّرو علابالي راني غالطة فهاد الحكاية مي وش حندير ياخي قلتلكم اختكم سندس مهبولة
ربي يعلم اني نحبو وديما دعائي ليه هاهو وقبل مايخطبني كنت ندعي وننوي عليه هاذ الدعاء هههههه
'اللهم اجعلني سكنا لمن تحب وترضى واجعله سكنا لي في حياتي وبعد مماتي ولا تخلف عليا بزوج اخر غيره'
هاكم فضحتوني درك ههههههه
مي مرات ندير دي جاست نندم ونقول لوكان غير مادرتش هكدا
ربي يهديني وخلاص
نموت بالفرحة كي يقولي كلام مليح
لكن نلقا روحي مانعرفش نرد ونقعد ساكتة مرات حتى في النت كي نحكيو نفس الشي ات غير يقول حاجة يشكرني ولا تلقايني ساكتة خلاص ومانعرفش نرد رغم اني لو جاب موضوع تاع مشاكل تلقايني ماكانش ثرثارة قدي
وعلى فكرة الصورة الي راني مدايرتها هو الي قالي ديريها لأنها تشبهلك :heh:قلتلو ربي يهديك
