عرض خدمة

[amina6]

ربى يحفضك اختى نسيمة
تامنى والله مكان على بالى بلى عجينة اللوز لى نشروها هى غير السكر
انا عمرى مصنعت عجينة اللوز فى الدار
بصح مين la pate à sucre
كاين منها امالا غادى نولى نخدم بيها
اختى بغيتك تعطينى وصفة la pate filou
شكرا نسيمة

 

[nissma34]

تلاحظي اختي امنة لي نشروها ذوقها sucree بزايدة
اما عجينة اللوز تاع الصح هي
01 مقدار غبرة لوز+01 مقدار سكر رطب
سيرو (02 كيسان ماء +كاس سكر عادي تحطيهم فوق النار حتي يعقد)
ولمي بيهم غبرة اللوز والسكر تحصلي على عجينة اللوز الاصلية
pate a filot ساهلة
04 كيلات فرينة د
1/2 كيلة زبدة او مارغرين
ماء زهر
نشاء او مايزينة
نخلط الفرينة مع الزبدة جيدا ونجمع بماء زهر نحصل على عجينة نديرها في كيس بلاستيكي ونتركها ترتاح
نقسم العجينة على 07 قطع
نحل كل قطعة ونمررها في الة العجينة الرقم 04 ثم 08 نحط القطعة الاولى ونرش بالمايزينة وفوقها الثانية ونرش تاني حتي نكل القطع 07 نممر شوية فوقهم بالحلال وهادي هي la pate a filo

 

[nissma34]

نتمنى منسيتش طلب حتى وحدة ولي نسيت طلبها تفكرني فقط صح صحوركم

 

[moonCne]

merci nisma pour la réponse en fait je cherche un gateau facile présentable et pour une bonne quantité ; merci à l'avance

 

[nissma34]

* 250 غرام زبدة
* 175 غرام سكر رطب
* 500 غرام فرينة
* ملعقة قهوة خميرة
* بيضتان
* فاني
للحشو
nutella
للتزيين
مكسرات بندق -بيستاش -نواى دو كاجو-جوز -لوز غير مكسر حبات كاملة
nappage او جولي
لماع غذائي
نخدم الزبدة مع السكر +البيض+الفاني و الفرينة والخميرة نحصل على عجينة نتركها ترتاح
نحضر سنيوات مربعة تدهن بالزبدة ونضع فيها العجينة تثقب قليلا
نتركها ترتاح في الثلاجة
تطهى في فرن 150 درجة
تملء بملعقة nutelle وتزيين
بالمكسرات وتدهن ب NAPPAGE
تلمع وترش باللماع
هي رائعة وعجينتها زاكية ديرلك بزاف وشكلها روعة

 

[ايمان9]

المساء الخير اختي عيد ميلادي قرب والسنة هدي راني حابة نخدم تورتة وحدي ادا ممكن تعطني الوصة وراني حابتها تكون خفيفة تتناسب مع اكلات شهر رمضاااااااااااان​

 

[nissma34]

المساء الخير اختي عيد ميلادي قرب والسنة هدي راني حابة نخدم تورتة وحدي ادا ممكن تعطني الوصة وراني حابتها تكون خفيفة تتناسب مع اكلات شهر رمضاااااااااااان​

صح فطورك وعيد ميلاد سعيد

صح رنا في رمضان ولازم ديري تارات خفيفة بكريم خفيف
وخيرتلك تارت بكريمة الشانتي كي ديسار​

للجينواز
08بيضات
250 غ سكر عادي
160 غ فرينة لابال
90 غ نشاء
ملعقة صغيرة فاني
نفصل الصفار عن البياض .
نخفق الصفار مع السكر مدة 10 دقائق حتى يتضاعف الحجم ويولي ابيض .

نخفق بياض البيض مع قرصة ملح كالثلج .
نغربل الفرينة مع النشاء والفاني نضيفهم ببطئ للصفار من التحت الى الفوق باه ما يهبطش الصفار المخفوق
نضيف ربع كمية بياض البيض كالثلج الى الخليط ونحرك ثم نكمل كمية بياض البيض ببطء ومن التحت الى الفوق باه ما يتكسرش البيض الطالع باه تطلع مليح وجي كي الاسفنجة

تطهى في فرن 180 درجة حوالي 20 دقيقة

​

نتركها تبرد ونقسمها على 02
ملاحظة : ممكن تقسمي المقادير على 02 وطيبي كل واحدة لوحدها
la creme
04 كيلات غبرة الشانتي
1/2 كيلة سكر حرش
ماء بارد جدا
نضغ غبرة الشانتي في صحن ونضيف السكر بالباتور نخدم ونضيف الماء البارد ونخفق حتى تطلع الكريمة
نرش الجينواز المقطوعة بالسيرو (02 كيسان ماء +كاس سكر يعقد فوق النار) ةنطلي القطع الاولى بالكريمة تقدري تضيفي الفواكه ةتغلقي بالاخرىنلبسها كامل بالكريمة وعلى الحواف ندير لوز
ايفيلي محمص
ونزين من الفوق بالفواكه لي تبغي وتدهني الفواكه ببقية السيرو
ممكن تزينيها كيما تبغي نقلتلك بعض الصور تعاونك في الديكور تاعها معليك غير تبدل الفواكه بفاكهة الموسم العنب الاحمر مثلا

 

[amina6]

شكرا جزيلا اختى نسمة
حبيت نسقسيك على طريقة صنع الفواكه بجوز الهند يعنى حلويات بلا طهى
شكرا

 

[sabira]

مساء الخير اختي نسمة .اريد منك حلوة اسمها وريقات اللوز او السبولة يلا كنت دايرتها من قبل

 

[nissma34]

مساء الخير اختي نسمة .اريد منك حلوة اسمها وريقات اللوز او السبولة يلا كنت دايرتها من قبل

مساء الانوار ماشي اختي لي جي شكلها كي الورقة وفوق منها يجو ورقات في كل ورقة حبة لوز وتتعسل

 

[sabira]

نعم هي لي راني نحوس عليها

 

[lina07]

مسا ء الخير اختي حبيت تعطني مقادير لابات بريزي وواش من ما رغرين لي تصلح بيها
وصحا فطورك خيتي

 

[nissma34]

نعم هي لي راني نحوس عليها

1. نكتبلهاك هدا المساء انشاء الله اختي

 

[nissma34]

مسا ء الخير اختي حبيت تعطني مقادير لابات بريزي وواش من ما رغرين لي تصلح بيها
وصحا فطورك خيتي

250 غ فرينة
125 غ زبدة من الافضل وجي باي نوع من المارغرين
قرصة ملح
قرصة سكر
صفار بيضة اختياري تقدري مدريش
ماء حسب الحاجة
ديري الفرينة+قرصة السكر و الملح زيدي مكعبات الزبدة ماشي سائلة شادة روحها ودخلي مليح +صفار البيض بلا ما تعجني اجمعي فقط كان تلمت كوريها لاكان جات شوية يابسة زيدى شوية ماء مهم فيها متعجنيش لمي فقط
صح فطورك

 

[الهاملية]

شكرا لك اختي ومبروك عليك
انا حبيت نسقسيك على حلوى الياسمينة الحبات ميجونيش كامل نفس الحجم وماشي مسقمين
وحلوى المشكلة ثاني في التنقاش منعرفش نعدلها ومتتنقشليش
صح ختي الله يعاونك
صح فطوركم

 

[nissma34]

نعم هي لي راني نحوس عليها

04 كيلات فرينة
01 كيلة مارغرين
قرصة فاني
ماء زهر +ملون غذائي اخضر
فرينة +مارغرين +الفاني ونجمع الكل بماء زهر نحصل على عجينة بلون اخضر فاتح نتركها ترتاح
نحضر الحشو
03 كيلات لوز+كيلة سكر رطب +مبشور ليمون ونجمع بالبيض نحصل على حشو
نحل العجينة ونمررها في الماكنة رقم 04 ثم 07
نحل الحشو على سمك 01 سم
نقطع ورقات من العجينة وورقات من الحشو
نلصق ببياض البيض ورقتين في وسطهم ورقة الحشو
من نفس العجينة نقطع ورقات صغار ندهن بباض البيض في وسط كل ورقة نضع لوزة بقشورها ودهن سطح الحبة دائما ببباض البيض ونثبت الورقات فوق الحبة تطهي في فرن يجب ان تحافظ على لونها ما تحمارش تعسل (عسل +ماء زهر)

 

[nissma34]

شكرا لك اختي ومبروك عليك
انا حبيت نسقسيك على حلوى الياسمينة الحبات ميجونيش كامل نفس الحجم وماشي مسقمين
وحلوى المشكلة ثاني في التنقاش منعرفش نعدلها ومتتنقشليش
صح ختي الله يعاونك
صح فطوركم

صح فطورك
بالنسبة لحلوى الياسمينة باش يجوك الحبات كامل قياس واحد قصي مربع من ورق 8سم *8سم واقطعي بيه العجينة وكذلك كرات الحشو حاولي تكوريهم بنفس الحجم في الواقع المحترفات في صنع الحلوى يوزنو كل كرة ديرو فيها 25 غ بالميزان لكن حنا نحاولوا نبسطو الامور وعينك هي ميزانك لما ديري القياسات كيما قتلك اكيد رايحة جيك الحبة مسقمة وربما تاني راكي ديري الحشو سائل شوية ياثر على الشكل حاولي ديري الحشو متماسك لما طيب يجيك شئ مليح
نسقسيك باش تجمعي الحشو ?
ما المشكلة اتركيها ترتاح مدة قبل متبدى تنقشي فيها وربما النقاش تاعك اسنانوا ماشي بزاف ميرفدش العجينة يلعب تاني دور

 

[أم أريج]

أختي نسمة قليلي بالتفصيل كيفاش ندير بالفوندون وكيفاش لونو رمضان كريم و يعطيك الصحة

 

[nissma34]

أختي نسمة قليلي بالتفصيل كيفاش ندير بالفوندون وكيفاش لونو رمضان كريم و يعطيك الصحة

رمضان كريم
تحطي الفوندون في كسرونة فوق النار وتحركي بالشوية +شوية فقط تاع ماء دافئ وحركي حاى يدوب ويولي كي القلاصاج واطلي بيه الحلوى كي القلاصاج العادي
اما التلوين ضيفي ملون فقط

 

[21maria]

اختي نسمة من فضلك طريقة عمل لقريوش والمقرقشات
صح بعد الفطور