تقديم دروس في صنع الحلوى لي تحب تتعمل تتفضل

[nissma34]

بسم الله الرحمن الرحيم
صح رمضانك
وتقبل الله منكم الصيام و القيام
بطلب من بعض الاخوات الكريمات
يشرفني ان اقدم لكم دروس في صنع الحلويات التقلدية والعصرية مع الشرح المفصل من الالف الي الياء فعلى الرغبات التعلم فمرحبا بها
توضع كل الدروس هنا وكذا الاستفسارات
كل مرة اقدم نوع من الحلوى
شكـــــــــــــــــــــــــــرا​

 

[ريمة الجزايرية]

بارك الله فيك اختي
فكرة مليحة ، بانتظار ابداعاتك

انا برأيي هذا المنتدى ، منتدى الحلويات ، نبداو نديرو مواضيع من عندنا
يعني الي تخدم كاش قاطو تصور المراحل وتكتب الطريقة
هكذا خير منستافدو من بعضياتنا
وتكون المواضيع حصرية
واش رايكم لبنات؟؟؟

 

[امينة00]

فكرة هايلا ننتضر الدروس اختي العزيزة شكرا لكي و لمجهوداتك

 

[ازهار الربيع]

مشكوووووووووووووورة اختي على الطرح الموفق
بانتضارك

 

[zahira92]

شكرا جزيلا

 

[moon2653]

rabi yahfdek w ywafkek nchalah w ya3taik ma ttmanay danya w akhra nchalah

 

[meimeifati]

مشكورة اختي لكن قبل العيد باش نتمكنو من انجازها في العيد انشاء الله

 

[lina20]

أنا أشارك في الدوره ، و أرجو كاقتراح على كل المشاركة وضع تطبيق ما نتعلمه منك و أنت تقيمه.
ما رأيك ؟ و ما رأي البنات
جزاك الله عنا كل خير، ولك دعوة في ظهر الغيب

 

[t.nouha]

شكرا نحن في الانتظار و نتمنى قبل العيد... دائما مميزة اختي.

 

[AHLEM1992]

شكرا لكي اختي على الفكرة الرائعة
بارك الله فيك
​

 

[lina20]

ممكن أختي نسمه، توضعي لنا صور حلوياتك إلي درتيها في السابق و نختارو أي نوع نبداو فيه بالتصويت .
ممكن تقولين لنا موعد الدوره حتى نكونو في الموعد

 

[nissma34]

نبدأ اخواتي الكريمات
بسم الله الرحمن الرحيم
الدرس الاول
البقلاوة الكلاسيكية عروس الحلويات الجزائرية

درجة حرارة الفرن:180 درجة
المدة:من 45 د الى ساعة ​

المكيال المستعمل: pot تاع الفلان الصغير لي ب لتر حليب تملي بيه 08 قيس السنيوة لي في الصورة تتحصلي بيها على 15 حبة بقلاوة ان قطعتيها متوسطة الحجمة وتوصلي الى 18 حبة ان قطعتيها صغيرة .
المقادير:
04 كيلات فرينة
01 كيلة سمن طري
ملعقة صغيرة فاني
قرصة خميرة
ماء زهر
صفار بيضة لسنيوة صغيرة اما كبيرة تزيدى صفار
للحشو
03 كيلات كوكاو +عطر اللوز (دائما نفس المكيال) او لوز
01 كيلة ماشي معمرة سكر حرش(تقدري حتى ديري نصف فقط لميحبش السكر بزاف).
مبشور ليمونzeste de çitron
ماء زهر
للتعسال:
عسل +ماء زهر
طريقة التحضير:
نضع الفرينة نضيف لها السمن طري وندخل مليح باليدين +الفاني والخميرة ونغربل الكل في غربال نيف صفار البيضة ونجمع بماء زهر نحصل على عجينة طرية ماهي سايلة ماهي يابسة نضعها في كيس بلاستيكي ونتركها ترتاح حوالي 1/2 ساعة.
نحضر الحشو نرحي الكوكاو خشن+عطر اللوز +مبشور الليمون +ماء زهر منشمخش بزاف شوية فقط لازك الحشو يجي كي الرمل المشمخ.
نجيب سنيوة ندهنها بالسمن
ندوب السمن +قرصة خميرة باه ندهن الطبقات
يسخن الفرن
نجيب العجينة نحلها فوق سطح مرشوش بالنشاء ونمررها في الماكنة رقم 04 ثم 08 ونغطي سنيوة كامل حتى الاطراف

​

وندهن بالسمن نعيد العملية 06 طبقات نفرش الحشو
ونعادو نفس العملية نغطي ب 06 طبقات اخرى وندهن بالسمن
نعقب الحلال فوق السنيوة باه يسقط الزائد من العجينة
نقطع مقروطات بالسكين حتى اسفل السنيوةونرشق في كل مقروطة حبة كوكاو كاملة
توضع في الفرن عند احمرار الحواف نشعل من الفوق ولي عندها فرن يشعل من الفوق والتحت تتركها حتى تحمر .
ندوب العسل فوق النار مع ماء زهر لازم يخف شوية نعسل البقلاوة .
عفسات خاصة بالدرس:
1-تعمليها بالزبدة جي اخف
2-لما ديري الزبدة طرية متخرجش ملدنة بزاف
3-لما تستعملي ماكنة فرد العجينة جيك اسهل واوراقها جي شفافة
4-لما تحلي العجينة فوق النشاء جي الاوراق مقرمشة
5-لما ديري قرصة خميرة في سمن لي تدهني بيه الطبقات عند الطهي الطبقات رايحة تتفرق على بعضها وجي هايلة (فكرة عضوة ربي يذكرها على خير)
6-لما تعسلي البقلاوة اتركيها تبات وغدوة انزعيها من السنيوة ​

7-حضري البقلاوة بليلة قبل الطهي
8-ارشي مليح حبة اللكوكاو داخل الطبقات واتكدي من دخولها هي لي تشد الطبقات ومايتفرقوش على الحشو
9-حمصى الكوكاو في الفرن قبل ما ترحيه
10-استعمال القرفة اختيارية
الدرس القادم بعد الفطور نوريلك اللمسات العصرية للبقلاوة

صح فطوركم​

 

[lina20]

ما شاء الله روعه يعطيك الصحه
عجبتني النصائح روعه

 

[s_luna]

بارك الله فيك أختي نسمة و جعلها في ميزان حسناتك
​

 

[hayota]

الله يحفظك الاخت الكريمة

 

[amina6]

ما شاء الله عليك اختى نسمة
الله يحفضك من العين
الصراحة سعد اللى يديرك فى داره :heh:
عجبتنى بزاف النصائح
ربى يجازيك

 

[lina07]

بارك االله فيك اختي ربي يحفظك

 

[assia19]

بارك الله فيك أختي أول مرة نسمع بالخميرة فالبقلاوة وأيضا أنا نديرها بالسمن ذايب مش طري، انشاء الله نجرب وصفتك

 

[nissma34]

بارك الله فيك أختي أول مرة نسمع بالخميرة فالبقلاوة وأيضا أنا نديرها بالسمن ذايب مش طري، انشاء الله نجرب وصفتك

قرصة فقط في العجينة تجعل الورقات مقرمشة وفي نفس الوقت ميش يابسة وقرصة في السمن لي نورق بيه تجي الاوراق تبان متفرقة على بعضها رائعة وكي نستعمل السمن طري موش دايب العجينة لما نكون نخدم فيها متتلقش ليدام بزاف

 

[nada242008]

يعطيك الصحة نسمة على مواضيعك المفيدة وجعلها الله في ميزان حسناتك
رمضان كريم