مرحبا بيك أسومة في كل وقت
وعليكم السلام ورحمة الله تعالى وبركاته
الحديث في موضوعك أختي يطول ويطول ياسر
وكل طفلة تمد رأي وكل راجل يمد رأي وكل انسان
يحب حاجة بصح الواقع يفرض أنوا لكل انسان عقلية
ولكل انسان مبدأ يمشي بيه وكل عائلة كيفاه تربت
_____
أهلا أخي
أكيد لكلّ منا رأيه الخاص به تفضّل
كاين بنات من صغرهم يحبوا يطيبوا ويحبوا يعاونوا
يعني في مصطلح جداتنا بنات قافزات :d وشاطرات
وعليهم الكلمة هكا هوما يقولوا وكاين بنات خاصة الي
قروا ودخلوا للجامعة ومن بعد للشغل ديما دير الوقت
سبب ماتعرفش اطيب ماتعرفش تغسل مانيش عارف
_____
وي الخدمة تمن الصغر تخلي الطفلة توالف وتتقنها مليح
أما لي تتهرب منها تجي غير فيها
لقراية تفض ومباعد تتزوج وتقابل الواقع المرير
باش نكونوا متفاهمين هو كل انسان يحب مرته
تكون تعرف كلش تعرف تغسل تعرف اطيب تعرف تعجن
بصح على حسب البلاصة وعلى حسب الظروف كاين
في بعض الاماكن والولايات ماعندهم حاجة في المراة
ديما اطيب هكا الكسكس وطيب الخبز والرخساس والحوايج
هذه ويكونوا مهملين لجانب الاكل يعني ماعندوش حاجة
الراجل في الاكل بصفة كبيرة يعني الي طاب مرحبا بيه
مم قصدك كاين راجل يهتم بالجانب تاع الطياب ويحب مرتو تطيبلو
وكاين لي معندوش حاجة واش تطيب ياكل نورمال معندوش قصة
وي صح كاينة هادي النقطة وانت بينتهالنا
______
اما كاين رجالة تحب تتشرط وتحب ديما هي الي تطلب الماكلة
مثلا يحب ديما الكسرة تكون يوميا ولا في الجمعة والخميس
ديما طعام اي كسكس وكل واحد وكيفاه هو كاين عايلات
نعرفهم يوميا يطيبوا الخبز وكاين ناس بلاك نسوه طول
الي يحب ياكل يجيب مراة قافزة والي مايحبش يجيبها فنيانة
ههه وهو في الاصل لازم كل طفلة تولي تعرف اطيب
الا ماتعرفش معليش تحاول بالعقل بالعقل حتى الطفلة الجامعية
ولا الي تقرا عندها فرصة باش تتعلم في الصيف ولا العطل
وكاين بنات يتعلموا حتى كي يكونوا في الجامعة
_____
هه تسمى كل واحد وزهرو خخ ياسعدو لي طاح في الفحلة ويامحنتو لي طاح في لبرا كاسي خخخخ
التطياب حاجة مفروغة منها اما الحوايج تاع الكسرة والعجين ووو
بالعقل بالعقل تتعلم المرة الاولى تبدأ تشوف والمرة ثانية
تشارك في التطياب حتى وين تهز الخبرة وتولي هي طيب وحدها
:pأواه لي تخلي روحها روطار متتعلمش الخدمة على أصولها
حتى الطياب عندو تكنيك
أي وحدة تعرف تطيب بصح ماش أي وحدة تتقن
اما طفلة تقولك مانتعلمش وماندخلش للكوزينة ووو مش منطق
وبالنسبة الي يشروا الكسكسي ويكسكسوه نقولوا عندنا
مابقاتش كي بكري ومابقاش القمح ومانعرف واش
خاطر كلش ولى يتباع في السوق حاضر غير اشري
وطيب وانت وعلى ذراعك الا تعرفي,,,
هههه وي كلش في السوق
هادوك جداتنا كانو يفتلو
درك الكسكسي يتشرى تفاديا للتهنبير والوقت تاني معندناش
وخاصة للمرأة العاملة
هوما الامهات والجدات عندهم الحق ياسر كي ينصحوا بناتهم
والامر هذا مايتعلقش بالطفلة كونها جامعية ولا في الدار
الي تحب اطيب وتخدم زوجها واطيبله الي يحب ادير المستحيل
وفي المنطق ثاني حتى الزوج مش رايح يكون يتشرط
ولا يتعب مرته يوميا خاطر الحوايج هذه مش ساهلة لهذه الدرجة
باش كل يوم المراة اطيب وبكري كانت المعاونة ووو
يكونوا بنات ونساء ياسر في الدار يتعاونوا اما كي تكون هي وزوجها
مش عيب باش تتعلم وتولي اطيب واش قاعدة دير تتفرج في المسلسل ههه :p
ههه المشكل درك يحبو الساهل والواجد
كون تلقى الراجل ساكتلها تروح فيها ههه
_____
انا بالنسبة لرأيي مش راح نبقى نفرز في الطفلة على جال كوزينة
وحوايج كيما هكا اما الطفلة المليحة تكون مليحة فكلش وتعرف كلش ههه والا ماتعرفش مش عيب تتعلم وبالعقل بالعقل تولي تعرف
حتى الا جات من دار اهلها ماتعرفش بالعقل وتتعلم عادي مانشوفوش
يعني أنت تحط الكوزينة عنصر ثاني غير ضروري جدا جدا
نظرة تاع اول عام وثاني عام والا هي فيها طبع تاع تفنيين
اكيد راح تبقى ماتعرف والو والا ماحبتش تتعلم ثاني
ماعليهم الا ان يشتروا طعاما جاهزا من المطعم كل يوم وتنتهي القصة
:down:
أي تبانلك برك ههه تنتهي القصة مي كي توالف هي وتبقى تتفنين وتجيبلك لبهادل مع داركم خخخ تم تقول ماش آفرا هادي هيا سقمي روحك يامرا لا نقربعلك راسك
الرجال الكل حسب مانعرف يحبوا نساهم يكونوا يطيبوا ويعرفوا ووو
شكرا على الموضوع,,,
أهـــلآ بشبش وليت كي نشوف اسم نعرفو هنا نفرح
وأهــلا بماكانش مدة ما شفتوش الحمد لله كي راه بخـــير
...
واش نقول في موضوعك والله يا شوشو الموضوع هذا والقضية هذي ديما
نتقابض مع ماما في سبتها ... ياك تعرفي بلي جداتنا ولا ماماتنا تقدري تقولي
راهم كيف كيف صح أمهاتنا ضيعوا حوايج مي خفاف واحنا ضيعنا تقريب كلش
أنا صراحة نعرف نطيب كلش من غير الأطباق الثقيلة ,,, تاع شخشوخة ولا
فتات ولا هذو نونو ... مي بصراحة أكثر أمقت الكوزينة وكان طيبت نطيب
حاجة خفيفة ... أمقت الكوزينة وكون نصيب ما ندخلهاش مي ديفوا تحتم عليا
ماما نخبـــز ... نحكيو على الرزواج والخدمة تاع الدار أنا لي يحسب روحو
رايح يديني خدامة لدارو ويشوفلي واش نعرف نطيب ويركز عالجانب هذا
نقولو روح خوك راه في السوق وما يضرنيش أني ما نتزوجش ... أنا حياتي
قانعة بلي مش مأطرة في دار نخبز ونطيب ونسيق رانا في 2012 زمان
التطور والعلــم ,,, يعني ما بقاتش تاع لمرا تفني عمرها في الدار تربي وتطيب
وكيما نقول ديما لماما أنا ما خلقنيش ربي للخدمة هذي ...
بكري يا شوشو كانو دايرين الدار هي الدنيا وهي لحياة ألوغ كو أنا نشوف
الدار جزء من الدنيا وجزء من حياتي وماهيش من أولوياتي ... علاش
تاع الهارج متقدمين علينا مع أنو مرا ما تقعد في الدار مي ديارهم يسخــفو
واحنا نهار طول وهي تندب وتسود في الدار وتبقى كي تاع لهزارش ,,,
وكل وحدة وكيفاش تربات ,,, أنا تربيت كلش نلقاه عند يدي ما نمدش يدي
وقليل وين يطلبوني نعاون ... نفضل كلمة خايبة على كلمة تدمر مليح
تجيني إهانة كي يقولوا تعرف تخدم ,,,
مغسي عالموضوع خليتيني نعبر عن شعوري لي ديما نعبر عليه مع
ماما وتولي تاكل فيا ... وعلى فكرة لي تحسب بلي الدار هي كلش وهذيك
هي الدنيا وتقضي على صحتها فيها وتأطر حياتها على هذا الأساس
نقوللها عمرك راح خسارة اخـــتي كاينة حياة تقدري تعيشيها وتتهلاي
في دارك ونوغمال ,,, تاع بكري حرموا رواحهم من المتــعة ,,, حتى
صحتهم كاحت بغير وقــت ,,, ســـلآمو بشبش
وعليگم السلآم هــآ شوشو
واش هآد موضوع إنه فآضح ههه
جدآتگ والي گيفهآ الله يرحم يآمآتهم
أمــآ انا نقولگ نگره الگوزينةة موآلفة نليگيدي برگ
مي دگ رآني تهديت ورآني ندخل نطيب وو مي گسرة نوووو ههه مانديرهاش
هيا يامصيبة صحيتي ع الموضوع خخ (فضحتينا)
سلاموو
أسمحيلي على التدخل أختي أما حبيت نوضح حاجات برك
كي الطفلة تدخل للكوزينة وطيب ولا تتعلم عادي القضية
مش مرتبطة بعام ولا قرن ولا حتى حاجة,,,هاكي فسدتي بنات
اللمة الكل ههه تو من اليوم ينوضوا لأمهاتهم ماعاد نمسوا والو
وماعاد نقضوا ليك والو وبشرتي حساسة واظافري ماتستحملش ههه
وكون يمس الصابون يديا وانا وانا ,,, ههه
عادي الامر ببساطة الطفلة لازمها تتعلم لازمها تدخل في التطياب وفي هذا المجال صح مش لازم تعب روحها لدرجة كبيرة كل انسان
وعنده درجة احتمال,,ماراحش تتكلف بفوق من طاقتها,,هذا رأيك
عادي وانا نحترمه,,,
البنت راح تقرا وتتعلم ووو كيما راهم حابين بنات الوقت الحالي ومن بعد لكتب ربي طلع صواريخ ايه واش مزال استنى ادير اقمار صناعية
بصح من بعد رايحة تروح لدار زوجها وراح يكون ملزوم عليها اطيب
وتتعلم ماقال حتى انسان لازم نقهروا المراة ولازم كل يوم اطيب الكسكس ولازم ديما ووو ,,, ولا راكي غلطتي بالعكس كل انسان ويعرف كيفاه يتصرف ممكن تاع بكري خدموا خدمة تاع ضغط كيما نقولوا وتعبوا رواحهم فوق اللازم لكن صحتنا وصحتهم ماتتقارنش
يااختي احنا واحد في عمرو 15 ويقولك ظهري يوجع وواحد تاع بكري والله يكون قريب يموت وظهرك مازال مابيه والو وتعب وخدم ووو
انا والله تو صغير وظهري يوجعني حنا الي بالعكس ماكلتنا ماكان والو
هوما كلوا غير الحاجة المليحة صح بالاك جاعوا في اوقات اما الماكلة الي كلوها مافيهاش حوايج مش مليحة,,ومضرة بالصحة,,
انا والله تعرفي كي قبل كنت نشوف امي تغسل في الحوايج وو
نحير ونستغرب نقول سبحان الله تقوم بهذا العمل مرتين ولا مرة في الاسبوع والتطياب ووو واحنا الان نديروا حاجة برك خفيفة نحسوا بالتعب..هوما صح صبروا ورضوا أزوجاهم ورضوا ربي وخدموا الخير وتعلموا كلش ونجحوا في حياتهم والحمد لله,,,بالاك حتى انا راني نخرف ههه
اما عادي طفلة جامعية ولا قاعدة في الدار لازمها تتعلم ولازمها تعرف اطيب وتكون محيطة بجوانب المطبخ ههه ويزي من الافكار تاع نتعب روحي ومش عارف ابقوا اقلوا في البيض ديما ههه خير :p
اسمحيلي على الرد والتدخل
وشكرا لك ,,,
