مغترب تحت المجهر

سلام عليكم يا مغتربين

بناتا وشباب اليوم راح نحط موضوع للتعرف على المغتربين الموجودين في المنتدى كل على حدى يعني ندعو احد المغتربين وننتظر تلبيته للدعوة ونطرح عليه مجموعة من الاسئلة نتعرف فيها عليه في حياته ككل من مدة الاغتراب طريقة العيش وهكدا سيكون الموضوع متجدد مع كل اسم لدلك اطلب المساعدة من مشرفة القسم في تنسيقه

بانتضار موافقتكم قومو باقتراح اسم لبدء الحوار معه وخليونا نحركو قسمنا شوي ونعملو نشاط للمغتربين باش يتعرفو على بعض بطريقة اكبر وفي نفس الوقت يعرفو الناس الي ماش في الغربة حياة المغترب كيفاش تكون بالعموم

​

 

[ام الحلوين]

صباح الخير ام الحلوين واقيلا انا لي حانبدا بيك بسم الله
صباح النور يا وجه النور
بسم الله بديت و على النبي صليت
ماهو اسمك الحقيقي اذا حبيتي تقولي ؟
اسمي هو اسم اول سورة في القران الكريم
وشحال عمرك؟
28 عام و 4 اشهر
ومن اي ولايه اصلك؟
من ولاية الشلف
وكم عدد افراد الاسره تاعكم وماهي الرتبة تاعك؟
حنا 7 الله يبارك و انا 3 كاين 2 ولاد كبار عليا و 3 صغار عليا و اختي هي اخر العنقود عندها 9 سنين
وشحال عندك الدراري وما اسماءهم ؟
عندي اسراء و اسحاق و الثالث في السكة الله يجيبو بالسلامة
وكم عمر زوجك؟و وش يخدم؟
45 عام و يشتغل ميكانيكي ،هيا لي تخسرلها سيارة زوجها تجيبها و نساعدوكم هههههههه.
وهل انتي متحصلة على شهاده ؟ وما تخصصك؟
انا ماكنتش نحب نقرا بصح عندي ديبلوم انفورماتيك .
وشحال عندك وانتي مغتربة

هاد جوان نكمل 6 سنين .
مشكورة اختي على الاسئلة .

 

[lina-67]

صباح النور ام الحلوين
هل عندك فاميليا معاك في الغربة
شحال عندك صديقات و وين تعرفتي عليهم
كيفاش علاقتك مع دار راجلك و هل تديلهم هدايا
داركم و دار زوجك قراب من بعضاهم و لا بعاد
كيفاش تعرفتي على زوجك
كيفاش جاتك الغربة كي جيتي اول مرة
نخلي شوية لبناتت خيرما يقولو ما صبنا ما نصقصو

 

[ام الحلوين]

صباح النور ام الحلوين
صباح الورد و الياسمين
هل عندك فاميليا معاك في الغربة
لا ماعنديش فاميلتي هنا
شحال عندك صديقات و وين تعرفتي عليهم
عندي 5 صحاباتي 4 نسا صحاب زوجي و 1 كي سكنت هاد الدار تعرفت عليها و دروك رجالنا رجعو صحاب .
كيفاش علاقتك مع دار راجلك و هل تديلهم هدايا
علاقتي بناس داري شوية شوية ، ايه نديلهم هدايا بصح غير 1 و لا 2 من دار .
داركم و دار زوجك قراب من بعضاهم و لا بعاد
ماشي بعاد بزاف تقريبا 20 حتى 30د في السيارة .
كيفاش تعرفتي على زوجك
اخو زوجي صاحب بابا و جارهم يخدم مع بابا لي قالو عليا .
كيفاش جاتك الغربة كي جيتي اول مرة
صعيبة و مرة .
نخلي شوية لبناتت خيرما يقولو ما صبنا ما نصقصو

براحتك حنونة سقسي واش تحبي
و راني نستنا في الاخوات .

 

[أم أمين23]

راني جيت لتيت برك في المواضيع الاخرى ووليت :
بما اننا حولنا الوجهة لالمانيا لزمنا نعرفو الدعوى لتم كيفاش ماشية:
قداش قعدت الفيزا باش جاتك؟
القنصلية تاع المانيا في الجزائر واش من ولاية ؟
ومع من رحتي وقداش قعدت الفيزا باش اعطاوهالك؟
هي تدفعي الدوسي يقعد مدة ونهار تروحي انت مدهالك والا زدتي استنيتي مورا ما رحتي؟
شحال سلكتي عليها؟
باش راكي ماشية في المانيا ضرك ؟
واش اسمها الورقة والا الكارطة الي يعطوهالكم؟
الا تقدري تصوريهالنا ما نقولوش لا خخخخ؟
واش هوما الاوراق الي عندك لتم؟
اولادك كي ولدو واش هوما الاوراق الي اعطاوهملهم يعني جنسية والا اي ورقة؟؟
التعليم والطب مجاني والا تسلكو؟
التيليفون واناها خير للبلاد الفيكس والا البورطابل ؟ وغالي والا رخيس؟
والنترنات نفس الشيء؟
ايا ردي على هادو ونولي ان شاء الله

 

[ام الحلوين]

راني جيت لتيت برك في المواضيع الاخرى ووليت :
معليش يا لحبيبة خذي راحتك
بما اننا حولنا الوجهة لالمانيا لزمنا نعرفو الدعوى لتم كيفاش ماشية:
انا مغتربة في بريطانيا ماشي المانيا
قداش قعدت الفيزا باش جاتك؟
دفعت في اوت و ماعطاوهاليش في نفس اليوم لان زوجي قالي قولي عندنا شهر ملي تعارفنا و هما قالولي كيفاش شهر و زوجتو (نورمالمون نقلهم عندي بزاف ملي نعرفو) و قعدت حتى لافريل مدوهالي .
القنصلية تاع المانيا في الجزائر واش من ولاية ؟
تاع بريطانيا كانت في تونس انا رحت لتونس و دروك حولوها للجزائر العاصمة .
ومع من رحتي وقداش قعدت الفيزا باش اعطاوهالك؟
رحت مع بابا و خويا و الزين راح وحدو و ثم تلاقينا (الزين قالي نروحو غير حنا 2 في الطيارة و جدتي ماحبتش )و قعدت 8 اشهر .
هي تدفعي الدوسي يقعد مدة ونهار تروحي انت مدهالك والا زدتي استنيتي مورا ما رحتي؟
مدة 8 اشهر
شحال سلكتي عليها؟
ماشفيتش .
باش راكي ماشية في المانيا ضرك ؟
عندي باسبور british
واش اسمها الورقة والا الكارطة الي يعطوهالكم؟
قبل مايمدولي باسبور عطاوني free يعني يكاشيولي في الباسبور تاع الجزائر كيما الفيزا.
الا تقدري تصوريهالنا ما نقولوش لا خخخخ؟
نصور الباسبور و لا الفري .؟؟
واش هوما الاوراق الي عندك لتم؟
ما عندي حتى اوراق هنا الصح في الباسبور .
اولادك كي ولدو واش هوما الاوراق الي اعطاوهملهم يعني جنسية والا اي ورقة؟؟
خرجتلهم شهادة الميلاد و عقد الزواج تاعي و مدولهم الباسبور في مدة 3 اسابيع .
التعليم والطب مجاني والا تسلكو؟
مجاني و كاين بريفي بصح انا مارحتلوش بسكو يخلصو بزاف كيما ايكو يديروه 200£ و في المستشفي باطل .
التيليفون واناها خير للبلاد الفيكس والا البورطابل ؟ وغالي والا رخيس؟
في 2 غالي بصح انا نشري الكارطة كي نعيط للفيكس نحكي شوية بصح البورتابل 2 كلمات تكمل .
والنترنات نفس الشيء؟
دروك راني دايرة نخلص كل شهر 40£ و عندي الهاتف هنا في البريطانيا الفيكس باطل و انترنت باطل يعني مع بعض .
ايا ردي على هادو ونولي ان شاء الله

هاني رديت يا لالة .
يعطيك الصحة راني نستنا في المزيد .

 

[أم أمين23]

عندي باسبور british
واش اسمها الورقة والا الكارطة الي يعطوهالكم؟
قبل مايمدولي باسبور عطاوني free يعني يكاشيولي في الباسبور تاع الجزائر كيما الفيزا.
الا تقدري تصوريهالنا ما نقولوش لا خخخخ؟
نصور الباسبور و لا الفري .؟؟
اوك اولا اسمحيلي على الغلطة خربطت بينك وبين فطوم ههه
بالنسبة للتصوار ماكان لاه مادام تمشو بالباسبور يظهرلي الباسبورات كامل كيف كيف
بصج والله فكرة مليحة تاع الباسبور يعني يقضو امورهم بيه وخلاص
مالا قوليلي عندكم الكارطة يعني بطاقة تعريف والا لا؟؟
واشنو الفرق بين باسبورك وباسبور البريطاني؟
اونتوما عندكم ثاني لازم ادير طبيبك الخاص ليك وللاولاد والا اي طبيب يعقبك كيما البلاد؟
تشري من الانترنات الحوايج والا ما ما فيهمش الامان؟
انت الي تقضي والا المخلوق ؟
المخلوق يغيب بزاف على الدار بسبة الخدمة والا راه في جنبك ديما :p؟
البيي للبلاد كي يغلى يغلى شحال يوصل وكي يرخص شحال يوصل؟؟
كي تروحي كاين خيارات بزاف للولايات بين بريطانيا والجزائر والا محدودين الطيارات؟؟
احنا عندنا التوانسة يسلكو البيي ارخص وزادة المراركة انتو زادة والا البيي غالي على الغاشي كامل؟
واش هوما الامكلات الي تعلمتيهم على الانجليز؟
حقا ما قلتيلناش واش من مدينة ساكنة والا كبيرة المدينة والا برك قرية؟
الكرا غالي والا معقول؟
الكرا ساهل يعني كي تحبي تبدلي تلقاي دون اي مشكال والا لازمك تحوسي وتزيدي؟
ساكنين على حسابكم والا عندكم مساعدة ؟
ديارهم ملاح والا ماكان ماكان؟؟
اكثر حاجة تعجبك في ستيل الدار البريطانيا وفي فن العمارة بشكل عام؟

 

[joumane]

ام الحلوين متحسيش بلي كاين فرق كبير بينك وبين زوجك
وكيفاه تتعاملو مع بعض يعني هو ميحطكش صغيره عليه بزاف
ربي يخليلك ولادك شحال عمرهم وكشما يعرفو لغه شوي
وانتي نرمالمو لغتكم هي الانجليزية كيفاه لقيتي روحك فيها
وحطيلنا شوي صور بريطانيا رايعه انا من بكري نحب نزورها تعجبني
بلاك نشوفو نخدم لافار انا وياك تبعثيلي ليبرجومون نجيك زياره وتحوسي بيا شوي هههههه
واسمها بلاصه لي ساكنه فيها وهل غاليه المعيشه عندكم والا لاباس وماهي العمله تاعكم
كشما سافرتي وزرتي اماكن في بريطانيا وخاجها سميهالنا وقوليلنا ليعجباتك

 

[ام الحلوين]

اوك اولا اسمحيلي على الغلطة خربطت بينك وبين فطوم ههه
سماح حنونة
بالنسبة للتصوار ماكان لاه مادام تمشو بالباسبور يظهرلي الباسبورات كامل كيف كيف
ايه الباسبورات كيف كيف
بصج والله فكرة مليحة تاع الباسبور يعني يقضو امورهم بيه وخلاص
ايه يعني الباسبور هو الصح.
مالا قوليلي عندكم الكارطة يعني بطاقة تعريف والا لا؟؟
كاينة بصح انا ماعنديش.بسكو مايستحقوهاش و مايطلبوها حتى في حاجة .
واشنو الفرق بين باسبورك وباسبور البريطاني؟
الباسبور تاعي هو نفسه الباسبور البريطاني .
اونتوما عندكم ثاني لازم ادير طبيبك الخاص ليك وللاولاد والا اي طبيب يعقبك كيما البلاد؟
ايه لازم طبيب خاص بصح تقدري تبدلي .يعني تسجلي عند طبيب لي في المنطقة لي قريبة ليك .
تشري من الانترنات الحوايج والا ما ما فيهمش الامان؟
عادي نشري و فيه امان .
انت الي تقضي والا المخلوق ؟
انا نقضي بالويكند و هو يجيب غير اللحم و اكلات العرب من عند العرب .
المخلوق يغيب بزاف على الدار بسبة الخدمة والا راه في جنبك ديما :p؟
كل مرة و كيفاش لكن عادة يغيب من 9 صباح حتى 7 عشية .
البيي للبلاد كي يغلى يغلى شحال يوصل وكي يرخص شحال يوصل؟؟
كي يرخص يوصل 180 و كي يغلى 450 .
كي تروحي كاين خيارات بزاف للولايات بين بريطانيا والجزائر والا محدودين الطيارات؟؟
كاين المطار الكبير و قريب ليا هو لي نروح منو و تروح غير الجزائر هواري بومدين يعني ماكاش الولايات الاخرى .
احنا عندنا التوانسة يسلكو البيي ارخص وزادة المراركة انتو زادة والا البيي غالي على الغاشي كامل؟
و الله ماعندي علم .
واش هوما الامكلات الي تعلمتيهم على الانجليز؟
صراحة ماتعلمتش اكلات خاصة لكن ناخد الفكرة فقط .
حقا ما قلتيلناش واش من مدينة ساكنة والا كبيرة المدينة والا برك قرية؟
قرية كبيرة شوية و عندي فيها عام و نص برك .
الكرا غالي والا معقول؟
غالي و خاصة المناطق لي ملاح .
الكرا ساهل يعني كي تحبي تبدلي تلقاي دون اي مشكال والا لازمك تحوسي وتزيدي؟
ساهل تحوسي في انترنت او تروحي لاجونس .
ساكنين على حسابكم والا عندكم مساعدة ؟
كنا كاريين و الراجل خرجنا حب يبيع دارو و دروك مدولنا هاد الدار مدة مؤقتة .
ديارهم ملاح والا ماكان ماكان؟؟
كاينين لي ملاح و كاين لي شوية .لكن معظمهم صغار .
اكثر حاجة تعجبك في ستيل الدار البريطانيا وفي فن العمارة بشكل عام؟
[/QUOTE]
يعجبوني الديار لي على الارض يعني ماشي العمارات و لي يكونو بالجاردان .

 

[ام الحلوين]

ام الحلوين متحسيش بلي كاين فرق كبير بينك وبين زوجك
احيانا
وكيفاه تتعاملو مع بعض يعني هو ميحطكش صغيره عليه بزاف
يعاملني على اساس بنت صغيرة ، مع اني ماشاء الله لي يشوفني يقولي عقلك كبير على عمرك ،و هو يقولي تعجبيني كيفاش تخمي و كاين بنات في سنك مايخموش هكدا .
ربي يخليلك ولادك شحال عمرهم وكشما يعرفو لغه شوي
في مارس ايراء دارت 5 سنين و اسحاق دار 4 سنين ، يهدرو العربية مليح و الانجليزية اسراء تسلك راسها و اسحاق شوية ،بصح يحشمو بزاف .
وانتي نرمالمو لغتكم هي الانجليزية كيفاه لقيتي روحك فيها
الحمد لله نسلك راسي .
وحطيلنا شوي صور بريطانيا رايعه انا من بكري نحب نزورها تعجبني
ان شاء الله تزوريها و تزوريني ،دروك نحوس على صور و نحطهم .
بلاك نشوفو نخدم لافار انا وياك تبعثيلي ليبرجومون نجيك زياره وتحوسي بيا شوي هههههه
مرحبا بيك يا لحبيبة على راسي و عينيا .
واسمها بلاصه لي ساكنه فيها وهل غاليه المعيشه عندكم والا لاباس وماهي العمله تاعكم
كشما سافرتي وزرتي اماكن في بريطانيا وخاجها سميهالنا وقوليلنا ليعجباتك

البلاصة لي نسكن فيها اسمها northolt و زرت مناطق ماشي بعيدة عليا بسكو مانحبش نطول في السيارة ،و المناطق تقريبا متشابهة لكن في السونتر تحسي راكي في عالم اخر .
العملة تاعنا هي الباوند £ .
و المعيشة مليحة ماشي غالية و ماشي رخيصة .

 

[أم أمين23]

يلا خليك اليوم ترتحي ومن غدوة نوليلك باسئلة جديدة ان شاء الله

 

[ام الحلوين]

ان شاء الله ام امين
و الخيات لخرين وين راكم .؟؟؟

 

[أم أمين23]

الخيات ديما مشاهدة فقط كي العادة هههههه المزية لاليشكا عوضاتك والا راني قعدت غير انا نصقصي وجهاد مسكينة الله غالب راه الوحم حبسها

 

[lina-67]

واش هي الاكلة اللي تطلبيها و هل تحبي تاكلي برا
دارك كبيرة شحال عندك من بياس
تحبي القهوة كحلة ولا بالحليب هههه
شحال قعدتي مور الزواج و حملتي
ولادتك كانت نورمال ولا دارولك آنيستيزي
تسوقي السيارة!
واش هي الحاجة اللي خاصاتك في الدار ماشريتيهاش
ما هو نوع حجابك
خطبوك قبل راجلك و لالا
هل كنت مترددة بالنسبة للغربة ولا نورمال

 

[ام الحلوين]

واش هي الاكلة اللي تطلبيها و هل تحبي تاكلي برا
نحب كلشي من برا ونطلب لحم بالعجين تاع لبنان و نحب الكفتة تاع الاتراك و دجاج مشوي تاع باكستان .
دارك كبيرة شحال عندك من بياس
عندي صالون و كوزينة تحت و 2 غرف فوق و حمام .لي تحب جي ضيف عندي مرحبا بيها .
تحبي القهوة كحلة ولا بالحليب هههه
نموت في حاجة اسمها قهوة و نحب الكحلة و بالحليب بصح دروك مع الحمل كرهت الكحلة راني غير بالحليب .
شحال قعدتي مور الزواج و حملتي
في نفس الشهر .
ولادتك كانت نورمال ولا دارولك آنيستيزي
في البنت نورمال و في الولد دارولي ليبيديغال.
تسوقي السيارة!
راني ناوية نفوت البارمي قبل ما نهبط للبلاد ادا كتب الله.
واش هي الحاجة اللي خاصاتك في الدار ماشريتيهاش
صراحة هنا مراني حابة نشري والو راني نخمم غير على البلاد بصح خصني فريتوز و عجانة .
ما هو نوع حجابك
سراول او جيب و ليكات و نلبس حجاب طويل يعني نخلط.
خطبوك قبل راجلك و لالا
ايه جات وحد العجوز و بنتها بصح دارنا ماحبوش .
هل كنت مترددة بالنسبة للغربة ولا نورمال

كنت مترددة بسكو هدرة البلاد تمرض .
مشكورة حنونة على الاسئلة .

 

[روعة انثى]

صباح الخير لبنات
ام الحلوين راكي منورة تحت المجهر نسقسيك حنونة اليوم
-على بالي تبغي الذهب
شحال كان عندك ذهب كي تزوجتي ؟ و شحال زدتي شريتي من بعد الزواج ؟
الزين واش دارلك ذهب كادو ؟
-شحال كان المهر تاعك ؟
-واش درتي لبسات في المحضر تاعك ؟ لبستيهم بعد الزواج و لا والو ؟ يعني استغليتيهم و لا والو ؟
-كي تخرجي لعراس تلبسي تقليدي و لا تلبسي عصري ؟
-البيي نهار جيتي اول مرة شكون خلصو ؟
-قلتي دفعتي الدوسي تاع الفيزا في اوت و مدوهالك في افريل
انتي وقتاش درتي العرس ؟ يعني درتي العرس و استنيتي الفيزا ؟ و شحال قعدتي باش رحتي ؟
و لا حتى مدولك الفيزا باش درتي العرس و رحتي ؟ و لا درتي عرس و حدك و من بعد بعثوك ليه ؟
-اول مرة كي رحتي شحال ديتي من فاليزة ؟
-واش ديتي ديتي معاك قاطو ؟ شاهم الانواع ؟

 

[SAMIRA25]

صباح الخير عليكم
اولا يعطيك الصحة جهاد على الاجوبة ربي يهنيك و يسهلك حملك و يجازيك الله كل خير حنونة
ثانيا مرحبا بام الحلوين و اقامة طيبة :d

 

[SAMIRA25]

وهدي للضيافة شوي كروكي درتو البارح

قهوة سرقتها من النت:d

 

[SAMIRA25]

و الان ام الحلوين ادا تقدري طبعا حطينا بعض الصور من منطقتكم:p
و قوليلي كاين تعامل مباشر بينكم و بين السكان الاصليين اصحاب البلد و كيفاه نوعية هدا التعامل و لي يدي الجنسية يصبح عندو نفس الحقوق تاع السكان الاصليين

 

[أم أمين23]

صباح الخير راني جيت واش راكم راه تحركت شوي الدعوة مليح يلا
خليني اولا نعلق على حاجة:
دارك كبيرة شحال عندك من بياس
عندي صالون و كوزينة تحت و 2 غرف فوق و حمام
يعني راكي كارية في دار ارضي ماشي بطيمة والا كيفاش نحب نفهم انا هههه
واش اتبعي في البارابول وكاين عندكم واش من ساتيلايك يعني هوتبورد والا النايل والا؟؟
جرى وحصلت مشكل بسبة الحجاب والا عادي؟
كايني الي ما يحبوش العرب اكيد طحطي فيهم والا لا؟ وواش هو الموقف الي جرالك ؟
كي تدخلو للسبيطار للولادة شحال تقعدي؟
وكيما تروحي يحكموك والا كيما البلاد روحي حتى يعود الصغير راح يهبط باش تجي :p؟ا
اليوم احنا عندنا سوق اسبوعي انتو ثاني عندكم هاد الاسواق والا لا ؟ بصح ماشي تاع الخضرة فيه كل شيء سوق
قلتيلي تمشو بالباسبور فيه مدة صلاحية والا لا؟؟
وشحال المدة الا فيه؟
تحبي تستعملي الالات الكهرومنزلية بزاف والا تفضلي خدمة اليدين بخلاف الغسالة طبعا هاديك لا غنى عنها اكيد:d:d

 

[ام الحلوين]

صباح الخير لبنات
صباح الانوار
ام الحلوين راكي منورة تحت المجهر نسقسيك حنونة اليوم
منورة بيكم حبيباتي .
-على بالي تبغي الذهب
نبغيه و يبغيني .
شحال كان عندك ذهب كي تزوجتي ؟ و شحال زدتي شريتي من بعد الزواج ؟
3 سناسل و 7 خواتم و قورمات و 3 مناقش و في العرس شريت 2 سناسل و 2 خواتم و يما شراتلي مسايس و خويا كبير سنسلة و الصغير قورمات و جدتي خاتم .و بعد الزواج شرالي الزين بارير و العام لي فات هبط للبلاد و انا بقيت هنا و غضتو جابلي خاتم معاه و قالي هاد العام ان شاء الله يشريلي براسلي .
الزين واش دارلك ذهب كادو ؟
2 خواتم تاع الخطبة و تاع العرس .
-شحال كان المهر تاعك ؟
8 ملاين بسكو هو معمري و انا محمدية .
-واش درتي لبسات في المحضر تاعك ؟ لبستيهم بعد الزواج و لا والو ؟ يعني استغليتيهم و لا والو ؟
انسمبل قصير و واحد طويل و لاجيب عريضة يبان غوب د سواغي و منصورية و غوب د سواغي هبطهالي الزين في الخطبة و لباس و سلفت ****و و قسنطينية و لاغوب بلانش تاعي . لي باللون الازرق من نهار العرس مالبستهمس .
-كي تخرجي لعراس تلبسي تقليدي و لا تلبسي عصري ؟
التقليدي و العصري .
-البيي نهار جيتي اول مرة شكون خلصو ؟
الزين.
-قلتي دفعتي الدوسي تاع الفيزا في اوت و مدوهالك في افريل
ايه
انتي وقتاش درتي العرس ؟ يعني درتي العرس و استنيتي الفيزا ؟ و شحال قعدتي باش رحتي ؟
مدولي الفيزا في افريل و درت العرس في اواخر ماي و طلعت سمانة 1 تاع جوان .
و لا حتى مدولك الفيزا باش درتي العرس و رحتي ؟ و لا درتي عرس و حدك و من بعد بعثوك ليه ؟
عرست مع الزين و طلعنا مع بعض.
-اول مرة كي رحتي شحال ديتي من فاليزة ؟
2 وحدة كبيرة و وحدة صغيرة .
-واش ديتي ديتي معاك قاطو ؟ شاهم الانواع ؟

مقروض اللوز و المعسل و عرايش و تاع عجينة اللوز و انواع اخرى ماشفيتش عليها .
مشكورة على الاسئلة .