مغترب تحت المجهر

سلام عليكم يا مغتربين

بناتا وشباب اليوم راح نحط موضوع للتعرف على المغتربين الموجودين في المنتدى كل على حدى يعني ندعو احد المغتربين وننتظر تلبيته للدعوة ونطرح عليه مجموعة من الاسئلة نتعرف فيها عليه في حياته ككل من مدة الاغتراب طريقة العيش وهكدا سيكون الموضوع متجدد مع كل اسم لدلك اطلب المساعدة من مشرفة القسم في تنسيقه

بانتضار موافقتكم قومو باقتراح اسم لبدء الحوار معه وخليونا نحركو قسمنا شوي ونعملو نشاط للمغتربين باش يتعرفو على بعض بطريقة اكبر وفي نفس الوقت يعرفو الناس الي ماش في الغربة حياة المغترب كيفاش تكون بالعموم

​

 

[روعة انثى]

ام امين كي تدخل روعة سور يتحرك المجهر :dو كي تدخل فالبيت سور بلي يتحرك و يشع بالنور هههههههههه
حوحو يشكر روحو :yahoo01:
ام الحلوين تحبي دراري بزاااف ؟ شحال معولة تزيدي بعد الثالث ان شاء الله ؟
واش هو جنس الجنين اذا علابالك ؟ شتا اخترتي اسم للبيبي ؟
في لانجليز المرا تخدم بالخمار و لا ممنوع ؟

 

[ام الحلوين]

و الان ام الحلوين ادا تقدري طبعا حطينا بعض الصور من منطقتكم:p
و قوليلي كاين تعامل مباشر بينكم و بين السكان الاصليين اصحاب البلد و كيفاه نوعية هدا التعامل و لي يدي الجنسية يصبح عندو نفس الحقوق تاع السكان الاصليين

ربي يجازيك حنونة على القهوة و الكروكي .
الصور من بعد ان شاء الله نحطلكم .
نعم انا عندي الجنسية يعني راني كيما الانجليزي و عندي نفس الحقوق و التعامل فيه ناه انجليزيين و ماشاء الله يحترمو العرب و المتحجبين و كاين لي مايحبوناش .
ربي يخليك على الاسئلة .

 

[ام الحلوين]

صباح الخير راني جيت واش راكم راه تحركت شوي الدعوة مليح يلا
صباح الخيرات
خليني اولا نعلق على حاجة:
تفضلي علقي كيما تحبي .
دارك كبيرة شحال عندك من بياس
عندي صالون و كوزينة تحت و 2 غرف فوق و حمام
يعني راكي كارية في دار ارضي ماشي بطيمة والا كيفاش نحب نفهم انا هههه
شوفي حنونة لي ساكن التحت عندو تحت و فوق و انا يعني في 2 ايتاج و تاني عندي تحت و فوق .من بعد ان شاء الله نصورلك داري .
واش اتبعي في البارابول وكاين عندكم واش من ساتيلايك يعني هوتبورد والا النايل والا؟؟
مخلط هههههه نتبع الجزائر و المغرب و نحب شميشة و دبي و اقرا و mbc .
جرى وحصلت مشكل بسبة الحجاب والا عادي؟
عادي و اكثر من عادي .
كايني الي ما يحبوش العرب اكيد طحطي فيهم والا لا؟ وواش هو الموقف الي جرالك ؟
عندي جارتي انجليزية ماتحبنيش و الباقي كلهم عاديين كاين انجليز و الهند و باكستان ،هدي جارتي كنت نقلها هالو ماترجعليش تشنف و نتوف و دروك نشوفها و مانقلهاش .
كي تدخلو للسبيطار للولادة شحال تقعدي؟
مثلا ادا ولدت اليوم غدوة الصباح يديرو vaccain للبيبي و نخرج ،و في وليدي بقيت 4 ايام بسكو طلعتلي الحمة و متحبتش تهبط و هما خافو ماحبوش يخرجوني .
وكيما تروحي يحكموك والا كيما البلاد روحي حتى يعود الصغير راح يهبط باش تجي :p؟ا
في بنتي رحت الصباح قالولي مازال روحي تمشي شوية وارجعي و رجعت على 7 تاع العشية و في الولد رحت على 3 تاع الصباح شدوني .
اليوم احنا عندنا سوق اسبوعي انتو ثاني عندكم هاد الاسواق والا لا ؟ بصح ماشي تاع الخضرة فيه كل شيء سوق
كاين اسبوعي و كاين شهري يبيعو فيها الملابس و الماعن و الادوات المنزلية الجديدة و القديمة ، بصح الزين مايحبش يشري القديم .و مانروحش ليه .
قلتيلي تمشو بالباسبور فيه مدة صلاحية والا لا؟؟
فيه .
وشحال المدة الا فيه؟
الكبار 10 سنين و الصغار 5 سنين .كيما بنتي هاد الشهر نعاودلها .
تحبي تستعملي الالات الكهرومنزلية بزاف والا تفضلي خدمة اليدين بخلاف الغسالة طبعا هاديك لا غنى عنها اكيد:d:d

نحب نستعملهم .
مشكورة اختي .

 

[ام الحلوين]

ام امين كي تدخل روعة سور يتحرك المجهر :dو كي تدخل فالبيت سور بلي يتحرك و يشع بالنور هههههههههه
يسما نتيا لامبا تشعلي الضو هههههههههههههه.
حوحو يشكر روحو :yahoo01:
مرحبا بيك حنونة .
ام الحلوين تحبي دراري بزاااف ؟ شحال معولة تزيدي بعد الثالث ان شاء الله ؟
صراحة اختي انا كنت متمنية 2 ولاد و 2 بنات .بصح كي شفت الولادة قلت 2 بزاف عليا بصح ماشي انا لي نحكم بسكو الزين يمووووووووووووووووت على لولاد و هو لي حبني نزيد .
حتى نشوف الولادة هدي المرة و نقرر شحال نزيد و كلشي بيد الخالق .
واش هو جنس الجنين اذا علابالك ؟ شتا اخترتي اسم للبيبي ؟
في جوان نعرف ، و الاسم مازال بصح ولادي البنت قاتلي ادا بنت نسموها بسمة او ابتهال و الولد قالي لازم يجي ولد و نسموه نضال و هو يقول نزال .و انا مازال ماقررتش .
في لانجليز المرا تخدم بالخمار و لا ممنوع ؟

نعم يخدمو بالخمار و حتى بالحجاب الكامل .
راكي شطورة اليوم و الله فرحت باسئلتك انتي و الاخوات .

 

[lina-67]

صباح النور يا حلوة ام الحلوين
هل عندكم مساعدات في السكن
شحال يعطوكم على لولاد
عندكمsecurité sociale ترومبورسيلكم شحال في المئة كيما احنا عندنا الطبيب و الدواء 90%يعني احنا نخلصو 10%وhospitalisation ب100%باطل

 

[fatouma2012]

سلام عليكم مرحبا بيك تحت المجهر أم الحلوين وخسارة ملحقتش على جهاد psq راني مريضة
أم الحلوين منقدرش نقعد بزاف قدام الكمبيوتر بصح كاين سؤال راح في راسي ومتضحكوش عليا

...... علاه تقولي الراجلك الزين ؟ ؟ هل هادا إسمه أو psq هو شباب وزوين ولا انتوما ف شلف تقولو للراجل هاك
ههههههه

 

[روعة انثى]

نعم يخدمو بالخمار و حتى بالحجاب الكامل .
راكي شطورة اليوم و الله فرحت باسئلتك انتي و الاخوات .

الله يسلمك ام الحلوين عجبتني لانجليز كي قلتي يخدمو بالخمار ههههه يعني مكانش راسيزم بزاف
- شتاهي الوجبة التقليدية اللي تحبيها و ما خطاتكش حتى و انتي تماك ؟
-تدي الطعام معاك ؟ يعني الكسكس
-الزين يحبو و لا ؟
-الزين صح زين و لا انتي تسميه هكدا ؟
-نهار جيتي اول مرة وين اداك الزين و حوس بيك ؟
-واش هي اول اكلة اجنبية حبك تذوقيها و تعجبو هو تاني ؟
-خلافاتكم تطول و لا ما تطولش ؟
-حسيتي بلي الغربة قربت بيناتكم و لا يهتم بيك اكثر باش ما تحسيش؟
- واش هي المنتوجات الجزائرية اللي لقيتيها تماك و شريتيها ؟
-اذا عندكم منحة و لا مساعدة للمرا اللي ماتخدمش؟ اذا كاين شحال ؟

 

[روعة انثى]

سلام عليكم مرحبا بيك تحت المجهر أم الحلوين وخسارة ملحقتش على جهاد psq راني مريضة
أم الحلوين منقدرش نقعد بزاف قدام الكمبيوتر بصح كاين سؤال راح في راسي ومتضحكوش عليا

...... علاه تقولي الراجلك الزين ؟ ؟ هل هادا إسمه أو psq هو شباب وزوين ولا انتوما ف شلف تقولو للراجل هاك
ههههههه

ربي يشافيك فطومة و سارة كي راهي؟ ان شاء الله تكونو بخير
مرحبا بيك اختي نورتينا

 

[أم أمين23]

بسكو هو معمري و انا محمدية .
انا ديما نركز باش نفهم واش معناها هههههه
صحيتو هكا يكون النشاط والتفاعل بالشوي توالفو ومع كل عضوة زيدو في الدوز لازم الي تدخل تكره هههههه

 

[روعة انثى]

بسكو هو معمري و انا محمدية .
انا ديما نركز باش نفهم واش معناها هههههه

حنونتي ما تركزي ما تحيري سقسي الشلفيات يجابوك و يقنعوك ياك راكي في موضوع المجهر سقسي و ام الحلوين تجاوبك:p

 

[روعة انثى]

ام الحلوين اختي :
-راكي ناوية تدخلي للبلاد و لا ؟ وقتاش اذا رايحة تدخلي ؟
ههههههه سؤال خفيف برك

 

[أم أمين23]

حنونتي ما تركزي ما تحيري سقسي الشلفيات يجابوك و يقنعوك ياك راكي في موضوع المجهر سقسي و ام الحلوين تجاوبك:p

هاداك واش درت جبوبة راني صقصيت ونستنى في الرد

 

[ام الحلوين]

صباح النور يا حلوة ام الحلوين
مساء الورد و الياسمين .
هل عندكم مساعدات في السكن
نعم عندنا .
شحال يعطوكم على لولاد
£20 للواحد في الاسبوع .
عندكمsecurité sociale ترومبورسيلكم شحال في المئة كيما احنا عندنا الطبيب و الدواء 90%يعني احنا نخلصو 10%وhospitalisation ب100%باطل

حنا المستشفى باطل و الطبيب لي تحت 18 عام و فوق 60 عام باطل و الحوامل باطل .
مشكورة حنونة .

 

[ام الحلوين]

سلام عليكم مرحبا بيك تحت المجهر أم الحلوين
وخسارة ملحقتش على جهاد psq راني مريضة
سلام حنونة و ربي يشفيك .
أم الحلوين منقدرش نقعد بزاف قدام الكمبيوتر بصح كاين سؤال راح في راسي ومتضحكوش عليا

...... علاه تقولي الراجلك الزين ؟ ؟ هل هادا إسمه أو psq هو شباب وزوين ولا انتوما ف شلف تقولو للراجل هاك
ههههههه

يا لحبيبة علاه نضحكو عليك سقسي واش تحبي و ماتحشميش و راني هنا نجاوبك بكل صراحة ، اما كلمة الزين غير انا نقولها و خلاص و في الشلف يقولو راجلي .
ربي يخليك حنونة و ماتشوفي شر و ادا تحبي تسقسي اي حاجة تفضلي راني اختك .

 

[ام الحلوين]

الله يسلمك ام الحلوين عجبتني لانجليز كي قلتي يخدمو بالخمار ههههه يعني مكانش راسيزم بزاف
ايه مليحة و كاين راسيزم بصح برا من لندن يعني راهم بعاد عليا .
- شتاهي الوجبة التقليدية اللي تحبيها و ما خطاتكش حتى و انتي تماك ؟
تقدري تقولي انا كل صبع بصنعة ههههههههههه شوفي اي حاجة جي في بالي نطيبها .
-تدي الطعام معاك ؟ يعني الكسكس
ايه نجيب معيا الطعام عادي و الاسود تاع الشعير .
-الزين يحبو و لا ؟
ياكلو بصح مايحبوش بزاف .
-الزين صح زين و لا انتي تسميه هكدا ؟
ايه زين تاع الصح .
-نهار جيتي اول مرة وين اداك الزين و حوس بيك ؟
جيت بالحمل و رحنا غير لافامي تاعي و تاعو ،كان خايف على البيبي .
-واش هي اول اكلة اجنبية حبك تذوقيها و تعجبو هو تاني ؟
ماكلة المصريين و الاتراك .
-خلافاتكم تطول و لا ما تطولش ؟
شوية كل مرة و كيفاش بصح راني حابة نحي هاد العادة لازم مانوليش نطول .ربي يهديني .
-حسيتي بلي الغربة قربت بيناتكم و لا يهتم بيك اكثر باش ما تحسيش؟
الحمد لله يدير المستحيل باش مانحسش .
- واش هي المنتوجات الجزائرية اللي لقيتيها تماك و شريتيها ؟
طعام عمر بن عمر و جومبو و حمود بوعلام .
-اذا عندكم منحة و لا مساعدة للمرا اللي ماتخدمش؟ اذا كاين شحال ؟

لالا ماكاش غير كي تولد يمدولها منحة يعني كادو هدا ماكان .
سلامي .

 

[ام الحلوين]

بسكو هو معمري و انا محمدية .
انا ديما نركز باش نفهم واش معناها هههههه
يا الزينة هدي معناها انو هما ولادي سيدي معمر و هدا هو العرف تاعهم و في الزواج مالازمش يمدو المهر بزاف و اي حاجة يجيبها الخطيب لخطيبتو لازم تشزفها و ترجعهالهم حتى كي يدوها عروسة و نهار العرس لازم تفرش فراشها و ماتاكلش ماكلة دار العريس حتى تاني يوم و الجوارين يطيبو و يجيبو للعروسة تاكل ، و حنا العرف تاعنا سيدي محمد يعني عادي بصح دروك ماراهمش يطبقو كيما بكري كيما انا ماطبقتش 100 % .
صحيتو هكا يكون النشاط والتفاعل بالشوي توالفو ومع كل عضوة زيدو في الدوز لازم الي تدخل تكره هههههه

يعطيك الف صحة و مليح هكدا نتعرف على بعضانا و على عاداتنا .

 

[ام الحلوين]

حنونتي ما تركزي ما تحيري سقسي الشلفيات يجابوك و يقنعوك ياك راكي في موضوع المجهر سقسي و ام الحلوين تجاوبك:p

حنونة راني جاوبت ام امين .

 

[ام الحلوين]

مشكورات خياتي .

 

[ام الحلوين]

ام الحلوين اختي :
-راكي ناوية تدخلي للبلاد و لا ؟ وقتاش اذا رايحة تدخلي ؟
ههههههه سؤال خفيف برك

اذا كتب الله العام الجاي ان شاء الله .
سقسي واش تحبي ثقيل و لا خفيف انا كلشي خفيف عليا من عند خياتي .

 

[ام الحلوين]

هاداك واش درت جبوبة راني صقصيت ونستنى في الرد

راني جاوبتك اختي .