مغترب تحت المجهر

سلام عليكم يا مغتربين

بناتا وشباب اليوم راح نحط موضوع للتعرف على المغتربين الموجودين في المنتدى كل على حدى يعني ندعو احد المغتربين وننتظر تلبيته للدعوة ونطرح عليه مجموعة من الاسئلة نتعرف فيها عليه في حياته ككل من مدة الاغتراب طريقة العيش وهكدا سيكون الموضوع متجدد مع كل اسم لدلك اطلب المساعدة من مشرفة القسم في تنسيقه

بانتضار موافقتكم قومو باقتراح اسم لبدء الحوار معه وخليونا نحركو قسمنا شوي ونعملو نشاط للمغتربين باش يتعرفو على بعض بطريقة اكبر وفي نفس الوقت يعرفو الناس الي ماش في الغربة حياة المغترب كيفاش تكون بالعموم

​

 

[روعة انثى]

امين يا رب و راكم خفاف كيما ريش النعام .
ربي يتمملك على خير و نفرحو بيك و يجمعك نتي و خطيبك عاجلا غير اجلا ،يا رب استجب دعائي في هذه الجمعة المباركة .

مساء الخير حنونة كي راكي اليوم
ههههههه فرحت كي قلتي ريش النعام يا ام الحلوين عندك هدرة حلوة و تذوب و قلبك كبير الله يبارك راني معاك من نيتي
و تفرحني اكثر دعواتك ربي يستجيب بإذن الله الجمعة و ما نسيتينيش ربي يهنيك اكثر و اكثر
نولي نسأل :
-تصبغي شعرك ؟ تديري ليماش ؟

 

[ام الحلوين]

صباح الانوار ام الحلوين ويوم سعيد ان شاء الله
صباح الورد حبيبتي و يومك اسعد .
والله ياختي من اجاباتك ماشاء الله عليك وعلى الزين حب حقيقي تاع الصح ملقري مزوجين زواج تقليدي
ايه الحمد لله ربي يخليك .
وانتو مثال على انو الحب الحقيقي يجي بعد الزواج مش كيما لي يقولك كي تزوجي سيرتو كي تجيبي الاولاد تبقى غير العشره والاحترام والحب كامل يروح
ايه راكي تشوفي و مايقوليش نحبك (بلاك يخاف ندور عليه ههههههه)بصح يظل يشكر فيا و خاصة قدام اهله و اهلي و كون نمدلو كاس ما يبقى يفتحلي و يدعيلي و من المعاملات و الاحترام يبينلي الحمد لله.
ربي يهنيك حببتي انتي وزوجك ويحفضلكم وليداتكم
امين يا رب و ربي يهنيك حبيبتي .
و وش تقولي انتي صحيح كي جاو الاولاد نقصو شوي من وتيرة الحب بيناتكم والا بالعكس
شوية بسكو هو يموت على لولاد و انا تاني دايرة العقل مدام يبغي لولاد يعني يبغيني و يظل معايا زيدي ولدي بصح كون نساعفو نجيب 12 ولد و يقول قليل .
وهل اهتمامك بزوجك بقا نفسو قبل الاطفال والا نقص بعد ماجاو وديما هو الاخير لي تفكري فيه
تقريبا عادلة بيناتهم و هو الحمد لله جامي قالي راكي ناسيتني و لا تشوفي غير لولاد يعني متفهمني .
وكي تتزاعفو شكون اول من يبادر بالمصالحه
انا ظالمة و لا مظلومة و الله مانسامح عندي 6 سنين زواج غير هو لي يسامح ،بصح ربي يهديني بسكو هدي طبيعة ماشي مليحة فيا ان شاء الله نولي انا تاني نسامح.
وهل تتذكرو بعضاكم في اعياد ميلادكم بالهدايا والا كلام برك
لا كلام و لا هدايا هو يقولي نمدلك دراهم و شري واش تحبي و مانشريلكش بسكو مشغول كل الوقت و ماعندو حتى اهمية بالهدايا دايما نقولو علاه ماتشريليش يقولي واش من فايدة كي نجيب الهدية و نقلك نحبك و ماشي من قلبي ،و انا الاكثرية نشريلو اللبسة و يعجبو دوقي .
وهل يشتريلك زوجك ورد طبيعي والا لا
كل اسبوعين يشري و غير يدبال يزيد يجيب و كي نكونو مزاعفين يشري الورد الغالي غير باش يرضيني بسكو يعرفني عاشقة الورد.
وماهي اخر هديه درتيها لزوجك واخر هديه دارهالك والمناسبه
العام لي فات راح للبلاد و انا بقيت هنا جابلي خاتم قالي غضتيني كي خليتك وحدك هههههه و انا كل مرة نشريلو حاجة تاع لبسة و اخر مرة قبل اسبوع شريتلو بيجامة .
وهل تحتفلو باعياد ميلاد اطفالكم وديرولهم هدايا والا لا

ماعندنا حتى اهمية باعياد الميلاد و هاد العام مادرتلهمش بسكو كنت مع الحمل و هو جا تاع الولد ماتفكروش كامل و سمانة من بعد تاع البنت عيطلي قالي لازم تشريلها تارت(يخاف البنت تشنف كثر من يماها يعني لازم يرضيها) و قتلو علاه البنت على الولد حتى العام الجاي ان شاء الله و نديرلهم مع بعض.
مشكورة حبيبتي حتى الاسئلة .

 

[ام الحلوين]

ام الحلوين اذا تقدري تحطيلنا صور من داخل دارك باش نشوف الديكور و ننقل عليك هههه
اذ امكن سي نون ماعليش

معليش حنونة نحط بصح بلاكي تضحكي ،كي شفت روحي هابطة للبلاد مراني حابة ندير والو في هاد الدار بسكو كون نهبط يدوها و علاه ندير من بعد نرمي كلش املا قلت للزين نخبيهم دراهم و نشري في البلاد ان شاء الله .
هذي الغرفة تاعي .

هذي غرفة لولاد و دروك بدلت المطارح شريتلهو في اللون الابيض.

هذا المطبخ .

هذا الصالون لقيت غير جهة و الجهة الاخوة مالقيتهاش و هذيك الطابلة القجور تاعها طيروهم ولادي و الطابلة البرتقالية تاني راحت الله يبارك حاجة مايخلوهاش .

و هذو ولادي ربي يحفظهم في العيد الكبير تاع العام لي فات.

 

[lina-67]

يا عمري ماشاء الله عليهم الوليدات ربي يحفضهملك و يسهلك فلي جاي ان شاء الله
و دارك هايلة سامبل و مشمسة تقريبا كيما داري حتى انا ما عندي والو المخلوق غير نقولو نشرو يقولي حتى نرحلو ما نكثروش
ربي يهنيك و يسعدك ان شاء الله

 

[ام الحلوين]

مساء الخير حنونة كي راكي اليوم
ههههههه فرحت كي قلتي ريش النعام يا ام الحلوين عندك هدرة حلوة و تذوب و قلبك كبير الله يبارك راني معاك من نيتي
و تفرحني اكثر دعواتك ربي يستجيب بإذن الله الجمعة و ما نسيتينيش ربي يهنيك اكثر و اكثر
نولي نسأل :
ربي يخليك حنونة و الله حتى انا نحبكم .
-تصبغي شعرك ؟ تديري ليماش ؟

ايه نصبغ و نحب ليماش بزاف بصح في البلاد نحرقلي من ليماش بزاف و العام لي فات شريت برودوي منا بسكو مايحرقش الشعر و دارتهملي جارتي جاوني هايلين و في البلاد كامل عجبوهم ،و هاد العام مع الحمل مانيش عارفة ندير و لا لا .
شكرا حبيبتي .

 

[روعة انثى]

ما شاء الله لولاد يغيرو ربي يحفظهم و تاني دارك سامبل و المهم كي مشمسة هاداك هو الصح

 

[ام الحلوين]

يا عمري ماشاء الله عليهم الوليدات ربي يحفضهملك و يسهلك فلي جاي ان شاء الله
امين يا رب يسهلي و يسهلك .
و دارك هايلة سامبل و مشمسة تقريبا كيما داري حتى انا ما عندي والو المخلوق غير نقولو نشرو يقولي حتى نرحلو ما نكثروش
ايه عادي و الديار تاع هنا مام يكونو فارغين يبانو ملاح و ان شاء الله يجيك البيبي و تبدلي الدار و تعمريها كي اليوم .
ربي يهنيك و يسعدك ان شاء الله

تعيشي حبيبتي ربي يعطيك صحتك و يهنيك .

 

[ام الحلوين]

ما شاء الله لولاد يغيرو ربي يحفظهم و تاني دارك سامبل و المهم كي مشمسة هاداك هو الصح

يبارك فيك يا لعميرة و العقوبة لعرسك و ربي يجمعك نتي و زوجك عن قريب يا رب .

 

[روعة انثى]

يبارك فيك يا لعميرة و العقوبة لعرسك و ربي يجمعك نتي و زوجك عن قريب يا رب .

امين يا رب من فمك لربي صحيتي حنونة

 

[أم أمين23]

ما شاءا لله على اولادكم يهبلو ربي يحفظهم ان شاء الله
الدار كلنا كيف كيف في الغربة ما اديري والو خاصة الي معول اروح الي كاين يقضي الشغل المهم كاين فوق ماه نرقدو وفوق ماه ناكلو ونحطو التيفي وخلاص هههه
نرجع لاسئلتي "
مع اقتراب رمضان تفكرت "
تروحي تصلي الطراويح والا الاولاد يمنعوك؟
عندكم في رمضان ريحة رمضان والا والو؟
يبيعو حوايج رمضان ماكان لاه نسميهم باش ما تسخفش المتوحمة هههه؟
الطبق الي ما يغيبش في رمضان؟
حاجة اخرى ضرك كي تروحي ان شاءا لله تبقاي تطلعي لبريطانيا على الورق الا لالا؟؟
اكثر حاجة اظني راح تفتقديها في بريطانيا كي تجي للجزائر؟

 

[ام الحلوين]

ما شاءا لله على اولادكم يهبلو ربي يحفظهم ان شاء الله
ربي يخليك حبيبتي و يحفظلك معاذ و امين و يجيب مريم بالسلامة .قولي امين .
الدار كلنا كيف كيف في الغربة ما اديري والو خاصة الي معول اروح الي كاين يقضي الشغل المهم كاين فوق ماه نرقدو وفوق ماه ناكلو ونحطو التيفي وخلاص هههه
ايه لي نخسرها هنا و من بعد نرميها نديرها في البلاد جي باينة .
نرجع لاسئلتي "
تفضلي يا لحبيبة .
مع اقتراب رمضان تفكرت "
ان شاء الله ربي يخلينا لهذاك اليوم و نفرحو .
تروحي تصلي الطراويح والا الاولاد يمنعوك؟
لالا مانروحش على جال لولاد ،و حتى الامام قالهم العام لي فات لي عندها لولاد ماجيبهمش لانهم صغار و مايديرولهمش الحفاضات و كي يكونو الوالدين يصلو هما يوسخو المسجد و الزربيات و يفسو الما .
عندكم في رمضان ريحة رمضان والا والو؟
شوية في الدار نحس بيها بصح برا ماكان والو كامل الناس يمشو و ياكلو .
يبيعو حوايج رمضان ماكان لاه نسميهم باش ما تسخفش المتوحمة هههه؟
ايه كاين كلش الحمد لله ، ربي يعينك حنونة .
الطبق الي ما يغيبش في رمضان؟
الحريرة لازم 30 يوم و زوجي يحب الفتوش اللبناني اذا تعرفيه مرات نحضرو في الدار و مرات يشريه من برا .
حاجة اخرى ضرك كي تروحي ان شاءا لله تبقاي تطلعي لبريطانيا على الورق الا لالا؟؟
مافهمتش قصدك مليح بصح دروك عندي الباسبور يعني مانستحق حتى اوراق منا ،و في الباسبور كاتبين لازم مانقعدوش برا من هاذي البلاد كثر من 10 سنين يعني لازم نجي و لو مرة قبل 2022 لان الباسبور مدوهولي في 2012.
اكثر حاجة اظني راح تفتقديها في بريطانيا كي تجي للجزائر؟

لبسة لولاد و الهنا بسكو علبالي كي نروح للبلاد نولي مع مشاكلهم سيرتو العام 1 بسكو كيما نديرو نحيرو مع العرب تاعنا نبقاو في الغربة يقولو علاه نهبطو يقولو علاه و .
ربي يهدينا و يهدي جميع المسلمين و المسلمات .

 

[joumane]

الله يبارك على وليدات وربي يحفضهملك والله عندك الحق كي سمتي روحك ام الحلوين
وعلى الديار كيما قاتلك ام امين المهم تدخلها الشميسه وزيد فراش سرير هايل عجبني
وقوليلي عندك كميرا رقمية و مانوعها وتحبي تتصوري والا مش بزاف
هل تتعاملي مع جيرانك وتدخلو بيوت بعضاكم والا لا
و ماهي الاكله لي يحبها زوجك وانتي متحبيهاش مي طيبيها علاجالو
وزيد واش هيا الماكله لي انتي بروفيسيونال فيها يعني كي طيبيها تحسي واحد مايديرها بنينه كيفك
وهل زوجك من نوع لي يتشها الاكل ويشرط والا لي يلقاها توالو ياكلها معندوش مشكل

 

[ام الحلوين]

الله يبارك على وليدات وربي يحفضهملك والله عندك الحق كي سمتي روحك ام الحلوين
تعيشي حنونة ربي يخليك .
وعلى الديار كيما قاتلك ام امين المهم تدخلها الشميسه وزيد فراش سرير هايل عجبني
يسلمك و هذاك الفراش هبطتو للبلاد .
وقوليلي عندك كميرا رقمية و مانوعها وتحبي تتصوري والا مش بزاف
عندي كاميرا JVC بصح ماشي عاجبتني بزاف بلاك كي نحب نهبط نشري وحدة جديدة ،و التصاور ملي جيت هنا صورت غير تاع الباسبور مانحبش نصور.
هل تتعاملي مع جيرانك وتدخلو بيوت بعضاكم والا لا
لالا جواريني كامل انجليزيين و مخلطين جامي دخلت عندهم و عندي جارتي جزائرية ساكنة في بلوك قريب ليا نروح مرات عندها بصح ماشي بزاف بسكو كل يوم نتلاقاو برا نروحو نجيبو ولادنا من المدرسة .

و ماهي الاكله لي يحبها زوجك وانتي متحبيهاش مي طيبيها علاجالو
البروكلي انا مانحبش ناكلو و نعجز على طيابو بصح هو مايحبوش بزاف و السفنج عندي قريب عام و نص و انا نوجدولو كل احد يحبو بزاف بالعسل و لولاد ياكلو شوية و انا مانحبوش مرات نذوق شوية و مرات مانذوقوش .
وزيد واش هيا الماكله لي انتي بروفيسيونال فيها يعني كي طيبيها تحسي واحد مايديرها بنينه كيفك
الحريرة و البسبوسة و المسمن بشهادة زوجي و كامل صحباتي ،و الحريرة طيبتها في داري في البلاد كي دخلتها درت عشا لافامي و كامل عجبتهم و بقاو يسقسو شكون طيبتها. الحمد لله.
وهل زوجك من نوع لي يتشها الاكل ويشرط والا لي يلقاها توالو ياكلها معندوش مشكل

لي يلقاها ياكلها و مايشرطش في الماكلة ،غير كاين اطباق ياكلهم بصح مايحبهمش بزاف كيما الكسكس و طاجين الزيتون .
مشكورة حنونة.

 

[SAMIRA25]

كنت ررايحة نورقد و من بعد جيت طليت نلقا هدوك الملاك هنا ما شاء الله عليهم و ربي يحفظهم و يعيشهملك و تفرحي بيهم امين يا رب و ديار رانا كامل في الهوى سوى واحد ما يجينا واحد ما يشغل العام الاول صح شوي الوحدة تتهلى شوي في الدار بصح من بعد كي يجيو الاولاد و يبدا التكسار خلاص
ربي يهنيك ام الحلوين و صح حلوين الله يبارك ​

 

[أم أمين23]

سلام عليكم وصباح الخير
خليني نصقصي على علاقتك بالنت واش اكثر حاجة اديريها في الانترنات يعني المنتديات التفراج القراية والا؟؟؟
القراية تاع الاولاد ساهلة والا صعيبة؟
الطفلة في المدرسة والا مزالت؟
الحضانة تاعكم واش يسموها احنا يقولو ازيلو وانتوما واش يقولو؟
شحال تسلكو والا بلاش؟
الا تقرا الطفلة في المدرسة كيفاش السيستام يعني من قداش ولقداش يقراو وثاني تاع الحضانة واجباري والا لا؟
هنايا كاين بزاف روحو وما ركلاماوش بلي روحو وعندهم اولاد يقراو المفروض وكانو يساعدوهم ومن بعد كي فاقولهم عملولهم غرامات عندكم انتو ثانيو الا لالا ؟؟؟
واشنو الي غالي اكثر عندكم المالكة اللبسة والا الحوايج تا ع الالكتروميناجي والا الفراش والحوايج تاع الدار والا الماعن والحوايج الرخيصة ثاني؟
عندكم حوانت الشناوة والا لا؟

 

[ام الحلوين]

سميرة ربي يخليك حبيبتي و تربي بنتك بالصحة و الهنا .

 

[روعة انثى]

صباح الخير لبنات كي صبحتو اليوم
ام الحلوين الميكرو كي صبح قاوري كيفاش تجاوبي على الاسئلة كي شغل العربية تقنع خير
نولي للاسئلة :
- وصفيلنا العيد الصغير تماك كيفاش فوتيه؟
-و العيد الكبير اذا فوتيه تماك كيفاش فات ؟
- قولينا على نهارك واش تديري فيه من الصباح حتى الليل ؟
- ولادك على شحال الساعة يرقدو ؟
-الصباح تنوضي بكري ؟

 

[ام الحلوين]

سلام عليكم وصباح الخير
و عليكم السلام و صباح الورد .
خليني نصقصي على علاقتك بالنت واش اكثر حاجة اديريها في الانترنات يعني المنتديات التفراج القراية والا؟؟؟
منتديات و نسمع قران سيرتو كي نكون نخدم في الشغل و نقرا اي حاجة مانعرفهاش .
القراية تاع الاولاد ساهلة والا صعيبة؟
عادي بصح يعلموهم مليح و يعرفو كيفاش يوصلو الفكرة للاطفال .
الطفلة في المدرسة والا مزالت؟
الطفلة راهي في التحضيري و العام الجاي ان شاء الله تدخل سنة 1 و الولد عندو عام و نص و هو يقرا في الحضانة ،بسكو لي يدخلو قبل ديسمبر يقراو عام حضانة برك و وليدي دخل في مارس يعني غير كمل 3 سنين دخل و قرا نص العام لي فات و زاد هاد العام و سبتمبر يدخل تحضيري .
الحضانة تاعكم واش يسموها احنا يقولو ازيلو وانتوما واش يقولو؟
حنا nursery نورسري .
شحال تسلكو والا بلاش؟
باطل .
الا تقرا الطفلة في المدرسة كيفاش السيستام يعني من قداش ولقداش يقراو وثاني تاع الحضانة واجباري والا لا؟
نعم الحضانة او التحضيري اجباري يعني كون يغيبو يعيطولي و يحوسو يفهمو علاه غيبو ،الطفلة تبدا من 8:45 حتى 15:10 و الولد من 8:45 حتى 11:45 على هكدا لازم نخرج 2 مرات في اليوم و في الصيف انا نديهم الصباح و في الشتا ابيهم .و العام الجاي ان شاء الله يولو يدخلو مع بعض و يخرجو مع بعض .
هنايا كاين بزاف روحو وما ركلاماوش بلي روحو وعندهم اولاد يقراو المفروض وكانو يساعدوهم ومن بعد كي فاقولهم عملولهم غرامات عندكم انتو ثانيو الا لالا ؟؟؟
ايه هنا تاني لازم نديكلاريو كي نجو هابطين نهائيا و لا فيها غرامة .
واشنو الي غالي اكثر عندكم المالكة اللبسة والا الحوايج تا ع الالكتروميناجي والا الفراش والحوايج تاع الدار والا الماعن والحوايج الرخيصة ثاني؟
عادي الادوات الالكترونية على حساب لامارك و يبيعو تاع هديك الشركة يجو رخاص انا مرات نشري منهم هنا الريدوات غاليين ،و كاين حوانت يبيعو فيهم كلشي 1£ كاين البسكويت و ادوات منزلية و الماعن و الصبيغة تاع الشعر و الشمبوان وووووووو .كيما انا شريت ميزان تاع لي فاليز 1£ باش كي نجي هابطة للبلاد نوزن الفاليزات في الدار و في حانوت اخر لقيتو 5£ .
عندكم حوانت الشناوة والا لا؟
كاين في منطقة بعيدة عليا بزاف .
و هنا ماكاش حوانت صغار بزاف كاين غير الكبار كيما لي ماقزان و تلقاي فيهم كلش (لبسة تاع صغار و كبار و الصبابط و الملابس الداخلية و الفراش )

مشكورة حبيبتي .

 

[روعة انثى]

اه نسيت واش هو الفتوش اللبناني اللي يحبو الزين ربي يحفظو ؟
اذا ممكن دريلنا الوصفة ؟
زيدي وصفات اجنبية اللي تحبوهم تماك ؟
البسبوسة ديرلنا المقادير نتاعها ؟
الحريرة نتاعك اذا عندك عفسة و لا حيلة باش تخرج بنينة قوليها لي ؟

 

[ام الحلوين]

صباح الخير لبنات كي صبحتو اليوم
صباح الفل حبيبتي .
ام الحلوين الميكرو كي صبح قاوري كيفاش تجاوبي على الاسئلة كي شغل العربية تقنع خير
خلاص رجعتو عربي شفت فيه برك رجع عربي وقيلة خافني .
نولي للاسئلة :
تفضلي حنونة سقسي واش تحبي .
- وصفيلنا العيد الصغير تماك كيفاش فوتيه؟
صــــامط مانحسولوش بزاف غير الصومال يصبحو معيدين و ملبسين لولادهم .
-و العيد الكبير اذا فوتيه تماك كيفاش فات ؟
يا حي على العيد الكبير و الكبش حتى النهار الثاني في الليل باش يوصلنا بسكو ممنوع نجيبو لكباش حيين للدار و يدبحوهم بعيد و حنا نروحو عند الجزار نجيبوه مقطع و واجد غير نغسل و نطيب .
- قولينا على نهارك واش تديري فيه من الصباح حتى الليل ؟
نوض الصباح و نوض دراري و نمدلهم حليبهم و نوجد فطور اسراء بسكو تدي معها و نبدللهم يديهم باباهم و انا نوجد الفطور و العشا مع بعض و نقي الكوزينة و نخمل الفوق و التحت و ادا عندي حوايج موسخين نحطهم في الغسالة بصح مانغسلهمش حتى الليل و نشوف النت شوية و نروح نجيب وليدي نفطرو و نصلي و نتفرج من بعد نديه و نروح نجيب الطفلة و نمدلهم الحليب و نقريهم شوية و يبقاو يلعبو و انا راني مع النت حتى العشا نعشيهم و نحطهم في بلايصهم و نهبط حتى نلقاهم رقدو من بعد يجي الزين تاني نعشيه و نغسل الماعن و نروح نرقد ،و الويكاند نحب نخرج كيما اليوم لولاد راحو يقراو العربية و من بعد شوية يجي الزين نخرجو و نقضي و نجيبو لولاد و نروحو نتعشاو برا و ندخل بكري باش لولاد يرقدو بكري و غدوة ان شاء الله يقراو و نعاود نفس اليوم .
- ولادك على شحال الساعة يرقدو ؟
في الشتا على 7 و في الصيف على 9 .
-الصباح تنوضي بكري ؟

7:30 .
ربي يخليك حنونة .