كرسي التعارف الضيفة ~Lovely ღ smile~

[الزهرة الحمراء]

يــســرنــا نــحــنــ في منتدى اللمة الجزائرية ..
وفي منتدى أهنا فرغ واش كاين فى قلبك
أن نفتح بوابة التعارف والتآلف الذي سيجمع الأعضاء والمشرفين والمراقبين تحت سقف واحد
أو فوق كرسي واحد
هو

فكرة هذا الموضوع لـلعضو
رجل من الزمن الجميل
http://4algeria.com/forum/members/173666/
والذي نوجه له تحية
وهي أننا سنصطاد في كل مرة
عضوا من أعضائنا الكرام كضيف شرف ليجلس على الكرسي
لمدة أسبوع
وسيقوم الأعضاء بطرح أسئلة على الضيف لغرض التعرف أكثر عليه وعلى شخصيته وأفكاره
ملاحظات
-عدم طرح أسئلة محرجة للضيف
-للعضو الضيف الحق في عدم الرد على الأسئلة التي لا يريد الاجابة عنها
- في حال كان الضيف غير متصل توضع الاسئلة في الموضوع ليجيب عنها عند اتصاله وعودته للموضوع
ولكل ضيف بعد أن ينتهي من الإجابة أن يعين ضيفا آخر وهكذا دواليك

في الأخير أملنا أن نرقى بالمنتدى ونصل رباط الأخوة بين جميع الأعضاء
كأسرة واحدة

تقبلوا تحياتنا ومرحـــــبا بالجميع



اما ضيفتنا لهذا العدد أخت لطالما رسمت الابتسامة على محيانا فهي كالعبق الفواح في ارجاء منتدانا
Lovely ღ smile
http://4algeria.com/forum/members/75864/

والآن انسحب لأترك المجال لكم ولضيفتنا العزيزة
مرحبا بك غاليتنا
تحياتي
​

 

[الحلم الوردي]

رد: كرسي التعارف الضيفة ~Lovely ღ smile~

الســلآم عليكي الرحمة
يعطيك الصحة اختي ماجدة
اسئلتي
اهتماماتك؟
ثلاتة اشياء تريدين تحقيقها؟
كيف وصلت الى اللمة ؟اي كيف عرفتها.
شيئ تحبينه اكثر
شيئ تكرهينه
من شاعرك المفضل
ماهو شعورك وانت على كرسي التعارف؟
لي عودة​

 

[Hakan]

رد: كرسي التعارف الضيفة ~Lovely ღ smile~

السلام عليكم نسيت باش نخلي وصاية اعتماد الموضوع
وماكنتش معول نكونيكتي الليلة
مالا رجعت خخخ
المهم مرحبا بالاخت الجميلة الانيقة نور الهدى
وكي العادة نعرف بعض الاشياء فقط عليها لكن
كاين اشياء ما نعرفهمش ورايحين يكونو في هاذ الاسئلة :
انت من اي ولاية وبالتحديد اي منطقة او مدينة ؟
العمر؟
تخصصك الدراسي ؟
ممكن طموحاتك بعد الدراسة ؟
شويا تحكيلي على صفاتك ماشي لون عينيك وشعرك لالا
احكيلي على هذاك الواش اسمو نتاع عاطفية وشريرة خخخخ ؟؟
تحبي التفاح ولا؟
متحجبة ولا ؟

ونخلو شويا اسئلة للاصدقاء الاخرين ربي يهنيك ..​

 

[sosobibicha]

رد: كرسي التعارف الضيفة ~Lovely ღ smile~

سلام عليكم
اهلا بيك معنا في كرسي الاعتراف
ان شاء الله تقضي اوقات ممتعة
لي عودة ان شاء الله ​

 

[ريحـان]

رد: كرسي التعارف الضيفة ~Lovely ღ smile~

اهلاا بالأخت الكريمة

ما اسمك
في اي مستوى تدرسين
هدف الذي تريد ين تحقيقه
ماذا تعني لك اللمة
من الاقرب لكي في المنتدى ​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

السلام عليكم و رحمة الله و بركاته

مرحبا بيا عندكم في كرسي التعآرف . . . مشكورة حنونتي على الإستضافة

ان شا الله نفوتو يامات ملاح مع بعضانا تتعرفو بيا فيهم . . و ما نكونش سامطة تكرهو مني بالخف :p

ضوك نرجع نجاوب على الأسئلة : )

سلآمي


​

 

[الحلم الوردي]

رد: كرسي التعارف الضيفة ~Lovely ღ smile~

هاني وليت اختي
نور الهدى

_اسكو تحققت احلامكي
_هل تؤمنين بالصداقة بين الرجل والمراة وكيف تنظرين اليها؟
_هل انتي مجاملة ام صريحة والى اي درجة تعمدين الى المجاملة؟
_ هل يوجد شيئ مستحيل بالنسبة اليكي؟
- ما هو اكثر شيء بيشغل تفكيركي الآن؟
ان شاء الله مانكونش كترة عليك
ولي عودة ان شاء الله​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

الســلآم عليكي الرحمة

و عليكم السلام و رحمة الله و بركاته مرحبا بيك ملآك

يعطيك الصحة اختي ماجدة
اسئلتي

تفضلي

اهتماماتك؟

مهتمة بالأدب . . نبغي المطالعة و كتابة الخواطر

ثلاتة اشياء تريدين تحقيقها؟

نرضي ربي و والديا علي


ننجح في قرايتي و نحكم بلاصة


و نكون عائلة سعيدة صغيرة

كيف وصلت الى اللمة ؟اي كيف عرفتها.

كنت مسجلة في منتدى آخر و دلّنٍي عليها أحد الأصدقآء "ربي يجازيه :regards01: "

شيئ تحبينه اكثر

السلآم و الطمأنينة

شيئ تكرهينه

النفاق و الخدآع

من شاعرك المفضل

ماكانش شاعر محدد. . حاليا أنا معجبة بغادة السمان .

ماهو شعورك وانت على كرسي التعارف؟

راني خايفة هههه راهم حالفين فيا :-o
لي عودة​

مشكورة حبيبتي ملآك على أسئلتك الخفيفة

مرحبا بيك في كل وقت

 

[oussama9694]

رد: كرسي التعارف الضيفة ~Lovely ღ smile~

مرحبا بك

السر وراء اسم العضوية ؟

قلت انه من اهدافك تكوين عائلة صغيرة يعني اذا تزوجتي تعيشي معا عجوزتك و شيخك و لا لا ؟ وضعتِ مخطط لعدد الأولاد يعني 2 مثلا و لا لا ؟
و شكرا مسبقا على الاجابات

 

["viola"]

رد: كرسي التعارف الضيفة ~Lovely ღ smile~

السلام عليكم الخاوة

بييييي اختيار موفق ماااجدة مرسي مرسي الطفلة هاذي من بكري نفسي نشيطها :d:d نقسر

أهلا اختي هدى كيراكي خيتي غاية :-r

أتمنى لكي إقامة مريحة على كرسي الجلالة:regards02:

الدفعة الأولى :p

شخصيتك في 3 كلمات

تحبي يعيطولك هدى و لا نور الهدى ولا نور :d

طبقك المفضل؟

هدى و الكوزينة

هدى و السبور

هدى و الماكياج

هدى و السياسة

وش هي الحاجة لي تلفت انتباهك أول مرة تحكي مع شخص

هدى محجبة أو لا؟؟

طويلة و لا قصيرة :d

أكثر حاجة تكرهيها في الرجل؟؟

أكثر حاجة ممكن تنارفيك؟؟

اكتبي قائمة بأجمل خمس اشياء في حياتك ...؟؟


جاوبيلنا على هاذو مبعد نوليلك الزينة​

 

[لؤلؤة قسنطينة]

رد: كرسي التعارف الضيفة ~Lovely ღ smile~

السلام عليكم
واخيراً طاحت هدهودة في الفخ قصدي في الكرسي :d
واش احوالك؟ ان شاء الله عاجبتك القعدة في الكرسي؟
هيا نبداو درك مع أسئلة خفيفة برك مانكتروش عليك بزاف
(بالاكي تأمني راني نضايف برك ههه)

لو نقولك واش تعنيلك هاد المصطلحات؟

العائلة
الحرية
الحجاب
الزواج
الآخرة

ماهي الكلمة التي تعيد التفاؤل في نفسك؟
وهل هدى تؤمن بكلمة "الحظ"؟

هيا بزاف عليك خلي تجاوبي على هادو
وندخل الاسئلة الحارين هههه
تحياتي جميلتي ( قوليلي اخبطيني بالاسئلة وفي الاخير قوليلي جميلتي ههههه)
ربي يحفظك حبيبتي
​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

السلام عليكم نسيت باش نخلي وصاية اعتماد الموضوع
وماكنتش معول نكونيكتي الليلة
مالا رجعت خخخ

و عليكم السلام و رحمة الله و بركاته

الحمد الله كي نسيت هاكا كسبنا شوفتك

المهم مرحبا بالاخت الجميلة الانيقة نور الهدى

الله يسلمك أخي حكيم ربي يخليك :$
وكي العادة نعرف بعض الاشياء فقط عليها لكن
كاين اشياء ما نعرفهمش ورايحين يكونو في هاذ الاسئلة :
انت من اي ولاية وبالتحديد اي منطقة او مدينة ؟

أنا من ولاية تيارت و تحديدا من السوقر "زعما تعرفهآ ؟ "

العمر؟

22 سنة

تخصصك الدراسي ؟

سنة اولى ماستر تخصص كيمياء الأدوية

ممكن طموحاتك بعد الدراسة ؟

نخدم اذا كتب ربي و ندي والديا للحج .. و كاين بزااااااااف يا حسراه

شويا تحكيلي على صفاتك ماشي لون عينيك وشعرك لالا
احكيلي على هذاك الواش اسمو نتاع عاطفية وشريرة خخخخ ؟؟

عيني صفرين و شعري اخضر نيهاهاها

جاية شوية ناس ملاح .. لي ما يعرفونيش يحسبوني متكبرة خاطرش مانيش دصارة بزاف .. دايما نضحك

امم و هذا ماكان

تحبي التفاح ولا؟

هههه شا جاب التفاح في بالك .. ما عنديش حاجة بيه

متحجبة ولا ؟

واه الحمد الله

ونخلو شويا اسئلة للاصدقاء الاخرين ربي يهنيك ..​

الله يحفطك حكيم مرحبا بيك في كل وقت خويا
​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

سلام عليكم
اهلا بيك معنا في كرسي الاعتراف
ان شاء الله تقضي اوقات ممتعة
لي عودة ان شاء الله ​

و عليكم السلام و رحمة الله و بركاته

الله يسلمك اختي .. مشكورة

مرحبا بيك في كل وقت ..تنوري
​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

اهلاا بالأخت الكريمة

أهلين بيك اختي

ما اسمك

نور الهدى

في اي مستوى تدرسين


سنة اولى ماستر تخصص كيمياء الأدوية

هدف الذي تريد ين تحقيقه

نكمل قرايتي قبل لا نهبل .. خاطر ما بقاليش عقل صايي

ماذا تعني لك اللمة

أكثر من مجرد منتدى .. نحس روحي مرتاحة هنا اكثر من اي بلاصة


من الاقرب لكي في المنتدى ​

كاين بزاف نخاف نذكر وحدين و ننسى وحدين يزعفو مني

مشكورة على مرورك حنونتي مرحبا بيك في كل وقت
​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

هاني وليت اختي
نور الهدى

مرحبا بيك في كل وقت حنونتي
​

_اسكو تحققت احلامكي

راني موراهم وحدة وحدة .. كاين لي تحققو و كاين لي مازال

_هل تؤمنين بالصداقة بين الرجل والمراة وكيف تنظرين اليها؟

ما نامنش بيها .. خاطر تتحول عن مسارها بنسبة 90 % الا ما رحم ربي

_هل انتي مجاملة ام صريحة والى اي درجة تعمدين الى المجاملة؟

صريحة لدرجة وين ما نعرفش نجامل خلاص .. ساعات حتى يولو يكاموفلو عليّ كي نطبزها بالصراحة هاذيك

_ هل يوجد شيئ مستحيل بالنسبة اليكي؟

المستحيل كلمة اخترعها الإنسان ليبرر فشله ..

ماكانش حاجة مستحيلة .. كاينة حاجة صاعبة و حوايج مش كاتبهم ربي هاذا ماكان

- ما هو اكثر شيء بيشغل تفكيركي الآن؟

دراستي .. عياتني بصراحة

ان شاء الله مانكونش كترة عليك
ولي عودة ان شاء الله​

لا حنونتي ما كثرتي ما والو مرحبا بيك في كل وقت
​

 

[Skor m@k]

رد: كرسي التعارف الضيفة ~Lovely ღ smile~

السلام عليكم
مرحبا مرحبا بك فالكرسي
ان شاء الله لاباس لحوال
إسمك جامي تفكرتو هههه كاين أنت وحد العضوة دمنشفاش على أسمكم ديجا نسيتها هي هههههه
المهم السوقر نسمع بيها
ماشي كاين كيبا اسمها إتحاد السوقر ولا راني غالط هههه

تيارت والبرد كاش جليد عنكم

المهم واش من جامعة تقراي ؟

كاش خفافات فليموديل ولا انت من هذوك الناس لي يقراو
ولا تاع المعريفة لي يدو النقاط بالتكسال هههههه

البوجغللو تاكليه ولا متبغيش هههه

أنت خفاشة تاع البرتابل ولا الفايسبوك ولا اللمة

أيا أبقاي على خير
رنا نوليو اذا كنا من الحيين​

 

[الزهرة الحمراء]

رد: كرسي التعارف الضيفة ~Lovely ღ smile~

السلام عليكم شيبانية واش حوالك معليكش
راهم جاااو لي كانوا متحلفين فييك
نبدأ على بركة الله
الأسم
العمر
هههههههههههه نضحك برك ماهمش هاذو أسئلتي
الآن وقت الجد
لاحظنا أن لنور الهدى كتابات راقية حقا ,,,,,متى صافحت نور القلم لأول مرة ؟
ماهي أكثر المواقف التي تجعل قلمك يكتب ؟
يقال أن الحب يجعل القلب ينبض بأفضل ما لديه من نبض ,,,,,هل عاشت نور الهدى هذه اللحظات ؟
بما أننا على موعد مع يوم الأم ,,,,,,كلمات تقدمينها لأمك ؟
سأكتفي بهذا القدر غاليتي ولي عودة أن شاء الله ​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

أسفة مشكل تع كونيكسيو احسنو العون
​

مرحبا بك


الله يسلمك . . مرحبا بيك انت تاني

السر وراء اسم العضوية ؟


نبغي ديما نبتسم و لو ما نعرف واش يكون عندي . . و يقوولو "و الله أعلم " ابتسامتي شابة :-o على بيها سميت روحي هك

قلت انه من اهدافك تكوين عائلة صغيرة يعني اذا تزوجتي تعيشي معا عجوزتك و شيخك و لا لا ؟ وضعتِ مخطط لعدد الأولاد يعني 2 مثلا و لا لا ؟
و شكرا مسبقا على الاجابات

عادي نعيش معاهم ما عندي حتى مشكل . .

أما على مسألة الأولاد الي يعطيها ربي فيها بركة مانيش مخططتلهم gـاع

مشكور على اسئلتك . . بانتظار عودتك ان شا الله

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

السلام عليكم الخاوة


و عليكم السلآم و رحمة الله و بركاته

مرحبا بيك أمون منورة حنونتي

بييييي اختيار موفق ماااجدة مرسي مرسي الطفلة هاذي من بكري نفسي نشيطها :d:d نقسر


هههههههههه تساليهالي ؟

أهلا اختي هدى كيراكي خيتي غاية :-r


أهلين بيك ايمان راني بخير بشوفتكم و انت حنونتي كيراكي ؟

أتمنى لكي إقامة مريحة على كرسي الجلالة:regards02:


ههههههههه لحد الأن الإقامة راهي مريحة و منا لجاي ما نعرف

الدفعة الأولى :p



تسما كاين دفعات وحدخرين ؟ لازم نوجد روحي :sport01:

شخصيتك في 3 كلمات


حنونة . صريحة . حشامة.


تحبي يعيطولك هدى و لا نور الهدى ولا نور :d


كيف كيف . عموما صحاباتي تع الواقع ما يعيطولي لا هدى لا نور لا هدهد :s

طبقك المفضل؟


بكري كنت نتقلش ضوك راه كل شي طيبه ماما "طبقي المفضل" ههه بصح كاين البوراك نموت عليه . .

هدى و الكوزينة

نبغي نطيب بالنفحة .. نكره هاذيك تع كل يوم

هدى و السبور


طليتي على قلبي راه سالخني السبور هاد ليام كي حسيت روحي تسوديت راني نجري على عمري . بصح لا قصدك على نتبع السبور 'الفرق و الأخبار .. ' لا خاطيني

هدى و الماكياج


ما نتلاقاوش أبدا . . ما نعرفش نديره !

هدى و السياسة

خاطيني وخاطيها !

وش هي الحاجة لي تلفت انتباهك أول مرة تحكي مع شخص


طريقة نقاشه و تفكيره . . !

هدى محجبة أو لا؟؟


نعم متحجبة الحمد الله

طويلة و لا قصيرة :d


1.60 م . . نشوف روحي نورمال بصح يقولو عليا قصيرة

أكثر حاجة تكرهيها في الرجل؟؟


ما يستعرفش بالأخطاء تاوعه

أكثر حاجة ممكن تنارفيك؟؟


البنادم لي يكذب بزاف . ولا لي يزوخ -_- !

اكتبي قائمة بأجمل خمس اشياء في حياتك ...؟؟


والديا .

خاوتي .

صحاباتي .

2 الباقيين نخلوهم مفتوحين يدخلو فيهم بزاف صوالح شابين هههه !

جاوبيلنا على هاذو مبعد نوليلك الزينة​

هاني جاوبتك

مرحبا بيك في كل وقت . . تنوري

 

[اكارينا]

رد: كرسي التعارف الضيفة ~Lovely ღ smile~

سلام اختي انا مانكثرش عليك سؤال واحد برك
هل حققت حلمك الذي طالما حلمت به في طفولتك