كرسي التعارف الضيفة ~Lovely ღ smile~

[شاعرة الأمل]

رد: كرسي التعارف الضيفة ~Lovely ღ smile~

سلام ختيتي انشاء الله راكي بخير وتلقاي هادي الحاجة ويطلعلك المورال
المهم انا عن جد عجبتني شخصيتك ونقولك راكي في مستوى و اخلاق ما شاء الله داوميها ونتمنى ليك غير الخير
وما عندي ما نسقسيك بسك هادوك القرعاجيين ربي يخليهم داولي كامل لي كاستيون
سلام

 

[sosobibicha]

رد: كرسي التعارف الضيفة ~Lovely ღ smile~

سلام عليكم
رجعت و معي حقيبة من الاسئلة ان شاء الله تكون خفيفة و واش راكي مع مجموعة المحققين :thumb_up02:
هذه هي اسئلتي :
*رتبي الكلمات التالية حسب أهميتها عندك:الحب -العائلة -المستقبل المهني-الصداقة-المال:
*أغمضي عينيك لدقيقة وتخيلي أنك تملكين العالم بين يديك ماأول أمرين تفعلينهما؟؟:
*-كتاب حياتك بما تصفينه؟؟"
*لوعاد الزمن ما الشيء الذي ستفعلينه مرة أخرى؟؟؟
ومالشيء الذي لن تفعلينه مرة أخرى؟؟
*لا أسمع لاأرى لاأتكلم متى تطبقينها؟؟:
*حقيبة أسرارك عند من تودعها؟؟:
*سؤال كنتي تتمناي وجوده هنا في كرسي الإعتراف؟؟
اسفة على كثرة الاسئلة و بالتوفيق لك
تفضلي (ما عرفتش واش تحبي ):thumb_up02:

​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

راني رجعت . . الحمد الله لقيتها ! الي يخلي أمره لربي عمره ولا ربي يخيبه

نبدا نجاوب باسم الله !

صباح الخير و لامسلخير منعرف ..الموهيم هاني جيت :d

مسآ الأنوآر أهلين أمون

قتلتيني ختي هدى بهاذيك تاع لاتزاgات عليا تعليم:-o يادلالي كملوا عليا معليش


هههههه لا ما يكذبوش عليك ماكانش كي التعليم مهنة نبيلة + أحسن مهنة تناسب المرأة . . الله غالب الباك تاعي ما جبتهش بمعدل يسمحلي ندخل لمدرسة عليا تع متوسط ولا ثانوي "ما عدا موسيقى و ما بغيتش نقراها " !

هاليك الدفعة الثانية :sport01:


ههههههه باسم الله

*ترتيبك فالعائلة ..؟؟


أول العنقود :-h

*قريتي لاليسونس فألجي و لا تيارت ؟؟


قريتها في ألجي !

*واش رايك في لاسيتي و وش حال قعدتي باه والفتيها ؟؟


سوفرونس × ميزيرية × . . مازال لضوك ما والفتها .. صح العام الأول تاعي انغبنت بصح مبعد الحمد الله كومام والفت شوية

*شحال خطرة رحتي لساحة الشوهاداا خخخخ


ههههههه ما نخرجش بزاف تأمني . . نعجز على الخرجة بصح نروح ثم كي نبغي نجي للدار باه كاش ما نشريلهم راكي عارفة

+ راهم رح ينحوها اجري على روحك لا كاش ما راكي مسحقة من ثم :p

*العطر المفضل؟؟

ماكانش عطر محدد . . نبغي العطر الخفيف الحلو لي يقعد !

راني في عامين مع narita ما نبدلهاش راهي عاجبتني !


*ديري حجاب طويل ولا سروال ؟؟ ستيل تاعك عموما ؟؟


نلبس حجابات طوال ♥ ! جامي لبست السروال أصلآ . . . ملي تحجبت نلبس حجابات

*ماكلة تاعك كي طيبي تجي بنينة و لالا؟؟:d


تجي بنينة كي الرهج خخخخ . . نتمسخر برك ! على حساب كل مرة و كيفاش

*في رأيك وش هي صفات الزوجة المثالية ؟


تكون تخاف ربي . . مطلعة على دينها خاطر لي تعرف دينها تعرف حق راجلها و والديه صبووورة بالها طويييييييييييييييييييييييييييييييييييييييييييل . . عاقلة و شاطرة ! + ركزيلي على تعرف تهدر ههه باه تقضي صوالحها

*تبكي كي تشوفي فيلم حزين و لا تشديها ههه؟؟


نبكي حتى نشلفط .. خليها لربي

*سورة أو آية قرآنية تحبيها ؟؟


سورة مَريَم . . .

*آخر كتاب قريتيه؟؟


آخر كتاب قريته "رواية حوجن " . . . شحاال شابة مختلفة عن كل الروايات التقليدية

ياسر للوقت الراهن :d أني نرجع متحلفيش ههه

ربي يعاونك :thumb_up02:


​

عجبتيني كي قلتيلي ما تحلفيش هههه . . مرحبا بيك في كل وقت الزينة ♥

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

شكون ما يعرفش السوقر ؟:d رانا قاع من ولاية تيارت ههه


مرحبا بيك ولد ولايتي . . . !

وي كاين و اسمها
IRBS SOUGUEUR
و مرات سمعت جماعة صحابي من السوقر يغنو * فلاح ولد الحمرا ...و انشالله يبرا....و يرجع كيف زمان ..* ونظنها الغنية تاع لي سيبورتور بصح سمعتها في شحال من عام يعني وحد 14 عام ربما تكون تبدلت ..


و اعذرونا على اقتحام موضوع الاخت نور الهدى علابالي خاطيها ستاد و البالون :d
​

ههههه ما نعرفهاش مع أني نسكن حدا السطاد القديم بكري كانو يضلو يغنو هنا -_- مخرجينلنا العلل تهنينا منه كي بلعوه. . . يعطيك الصحة على المعلومة . . و مرحبا بيك في كل وقت

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

السلام عليكم هدهودة كيفاه صبحتي اليوم؟


و عليكم السلام و رحمة الله و بركاته

أهلين بمينوشتي . . راني بخير بشوفتكم حنونتي و انت كيراكي

برديلي قلبي وكي تخلصي من الكرسي احبسيلنا فيولا في بلاصتك
حابة نهبلها بالاسئلة هاد المصيبة هههه


ههههههه و علاه ما نحبسكش انت . . قاعدة غي تتفرجي و تستشفاي

هادو ليك باه نحليولك القعدة

الله يحلي أيامك . .

دركا نرجعو للأسئلة:
بسم الله

لو نبداو بالجانب الديني:
هل هدى مواظبة على قراءة القرآن؟


الحمد الله . . كل يوم قبل لا نرقد . . و باه ما ننساش دايرة application في التيليفون تفكرني دايما

واش هي السورة لي تحسها هدى قريبة من قلبها؟

سورة مريم و سورة يوسف

مارأيك في الجلباب؟


في خاطري نديره .. . في الوقت الحالي مجال قرايتي شوية ما يساعدنيش بصح راني نحاول قدر المستطاع باه يكون حجابي مقارب للشرع !

لو زوجك مرة اخرى يفرض عليك لبس الجلباب توافقي؟


لا ما فرضهش هو نديره أنا وحدي هههه !

لو يخيروك بين أهم احلامك والحجاب واش تختاري؟
مثلا يقولولك حلم معين ومستنيتو يتحقق لكن بشرط تنحي الحجاب


جاتني العام لي فات فرصة باه نكمل ماستر chimie criminalistique بصح ما نقدرش نلبس فيها حجابات طوال يعني لازم سروال . . و ما بغيتش نديرها ! ماكانش حاجة في الدنيا تستاهل باه نتخلى على حجابي على جالهاا

درك نروحو لأسئلة عامة:
واش هو اللون المفضل عندك؟


نبغي وحد الدرجة من الأزرق هادئ ما نعرف شا اسمه . . و نبغي الأحمر ! وسيد الألوان الأسود . .

وتحبيه كلون فقط؟ ولا تحبيه في ملابسك؟


نبغي نلبسهم هههه . . .

هدى تحب تلبس الطالو ولالا؟؟


نلبس طالو كومـpـونصي مع الحجابات . . ما نقدرش للطالو لاخر بصح في الأعراس نلبسه عادي

الماكياج مانسقسيش راكي كي حالتي ههههه
هيا نحبسو هنا نخليوك ترتاحي شوي من بعد نرجع ان شاء الله
تحياتي ليك حبيبتي

​

ههه راكي عارفة خاطيتني هاديك البنتورة الحمد الله . . !

مشكورة على أسئلتك زينوشتي ☻

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

مريم وش راكي تقولي :scared01: ..و أنا علاه :-o ..

أصلا عادي أنا مهبولة من بكري ما تهبليني بالأسئلة ما والو :d

هدى مديريش عليها راهي تقسر ههه​

راهي باغية تباصيك ههههه ! باينة كاش ما تسالك انت تاني

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

سلام ختيتي انشاء الله راكي بخير وتلقاي هادي الحاجة ويطلعلك المورال
المهم انا عن جد عجبتني شخصيتك ونقولك راكي في مستوى و اخلاق ما شاء الله داوميها ونتمنى ليك غير الخير
وما عندي ما نسقسيك بسك هادوك القرعاجيين ربي يخليهم داولي كامل لي كاستيون
سلام

و عليكم السلام و رحمة الله وبركاته راني بخير الحمد الله بشوفتكم و انت حنونتي كيراكي ؟

ربي يخليك حنونتي . . الحمد الله راني لقيتها

ربي يحفظك . . :$ شهادتك أعتز بها

مرحبا بيك في كل وقت . . سقسي الي بغيتي ما تحشمي ما والو !

في انتظآر عودتك :regards01:

 

[Amine7N]

رد: كرسي التعارف الضيفة ~Lovely ღ smile~

الســلام عليــكم
جيـــت ندير طلة لقيت لوفلي سمايل ع الكرسي
هــاذي مــدة وباغي نشوفـك مريحة فيــه :d
إن شـــاء الله يشبعــوك أسلئــــة

لازم نســأل أنـا تاني

أسلـوبك في الكـتابة ســاحر يجمع بين البسـاطة والإبـداع
وش هو السـر ( خبرينا خلينا نتعلمو منك )

يــادرى أخـر طبخـة حرقتيها وقتـاه ؟
يـادرى كيفاش تديري في العطلة ويتغير عليك الروتين تاع العاصمــة لروتيـن تيـارت ؟

بالتوفيــق في كرسي التعـارف​

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

سلام عليكم


و عليكم السلام و رحمة الله تعالى و بركاته

رجعت و معي حقيبة من الاسئلة ان شاء الله تكون خفيفة و واش راكي مع مجموعة المحققين :thumb_up02:


راهم قايمين بالواجب و زيادة . .

هذه هي اسئلتي :


باسم الله

*رتبي الكلمات التالية حسب أهميتها عندك:الحب -العائلة -المستقبل المهني-الصداقة-المال:


العائلة . الحب . الصداقة . المستقبل المهني هو الي يجيب المال مالا يجو مع بعض

*أغمضي عينيك لدقيقة وتخيلي أنك تملكين العالم بين يديك ماأول أمرين تفعلينهما؟؟:


القضآء على الحروب و إحلال السلآم . .

القضاء على الفقر و الجوع في العالم

*-كتاب حياتك بما تصفينه؟؟"


مبعثر . . !

*لوعاد الزمن ما الشيء الذي ستفعلينه مرة أخرى؟؟؟


نعيش يامات الليسي مرة أخرى

ومالشيء الذي لن تفعلينه مرة أخرى؟؟


ما نعاودش ندير وحد التجارب في حياتي

*لا أسمع لاأرى لاأتكلم متى تطبقينها؟؟:


كي نكون زعفانة و مقلقة تع الصح . . تع الصح ما نولي لا نسمع لا نشوف و ما نوليش قادرة نهدر

*حقيبة أسرارك عند من تودعها؟؟:


نخليها عندي . . سرك كي يضيق بيه صدرك كيفاش رح يوسعه صدر الناس ؟

*سؤال كنت تتمنى وجوده هنا في كرسي الإعتراف؟؟


ماكانش سؤال في بالي ضوكا . . الله يبارك سقساو على كل شي راهم قايمين بواجبهم التقرعيجي

اسفة على كثرة الاسئلة و بالتوفيق لك


لا بالعكس حنونتي تنوري في كل وقت :regards01:

تفضلي (ما عرفتش واش تحبي ):thumb_up02:

​

يا عمريي . . صحيتي الزينة ربي يحفظك و يحلي أيامك

مرحبا بيك و بأسئلتك في كل وقت

 

[sosobibicha]

رد: كرسي التعارف الضيفة ~Lovely ღ smile~

يا عمريي . . صحيتي الزينة ربي يحفظك و يحلي أيامك

مرحبا بيك و بأسئلتك في كل وقت

شكرا على صراحتك و اجباتك المميزة
ربي يحفظك
:regards01:​

 

[شاعرة الأمل]

رد: كرسي التعارف الضيفة ~Lovely ღ smile~

يعيشك ختيتي وتحية ليك ولناس تيارت كامل
راكي مصرة اني نسقسيك ماشي
هل واجهت عقبات في حياتك في شتى المجالات -غير محدد-؟
هل تعرضت لمواقف محرجة -تزلقي قدام الغاشي وحوايج هكدا-
وشن هي هادي الحاجة العزيزة على قلبك لي تودرتلك -طبعا إذا كان الجواب ممكن -
هل هدى تستمع إلى الغناء - وإن شاء الله الجواب بلا- بصراحة
بصراحة هل كنت خفيفة أم ثقيلة الظل عليك
و علابالي بلي كترت الأسئلة
شكرا مسبقا سلام

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

الســلام عليــكم


و عليكم السلام و رحمةالله تعالى و بركاته

جيـــت ندير طلة لقيت لوفلي سمايل ع الكرسي


الحمد الله كي تفكرتنا و جيت طليت هادي غيبة خويا أمين

هــاذي مــدة وباغي نشوفـك مريحة فيــه :d


هههه تسالهالي ولا شاهي ؟

إن شـــاء الله يشبعــوك أسلئــــة

لازم نســأل أنـا تاني

طبعا لازم

أسلـوبك في الكـتابة ســاحر يجمع بين البسـاطة والإبـداع
وش هو السـر ( خبرينا خلينا نتعلمو منك )

:$ حشمتني . . ربي يحفظك

ماكانش سر . . أحسن طريقة لتعلم الكتابة هي القراءة ! نضل نقرا في كل وقت . . ! هادي هي

يــادرى أخـر طبخـة حرقتيها وقتـاه ؟


كنا في لاسيتي و غفلت على الفطور . . :$ بصح لحقت على شوية تغدينا بيها الحمد الله ما تحرقش كامل

يـادرى كيفاش تديري في العطلة ويتغير عليك الروتين تاع العاصمــة لروتيـن تيـارت ؟


العطلة = القعاد في الدار . . نجي متوحشة الحيطان تع دارنا ! نزور شوية العايلة و خلاص

+ تقريبا نفس الروتين تع العاصمة في تيارت شاهي ثم متحملة مسؤوليتي وحدي . . أنا نصرف أنا نخمم شا ندير و شا ما نديرش و هنا كاين الي مسؤول عليا و يخمم عليا هاذا ماكان

بالتوفيــق في كرسي التعـارف​

يعطيك الصحة خويا أمين . . ان شا الله نكون وُفقت في الإجابة

مرحبا بيك في كل وقت

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

شكرا على صراحتك و اجباتك المميزة
ربي يحفظك
:regards01:​

العفو حنونتي . . ربي يوفقك في دراستك ان شا الله انت تاني ♥ !

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

يعيشك ختيتي وتحية ليك ولناس تيارت كامل


الله يحفظك . . تحية ليك انت تاني

راكي مصرة اني نسقسيك ماشي


و علاه تخليها في قلبك
ههه


هل واجهت عقبات في حياتك في شتى المجالات -غير محدد-؟


ماكانش لي ما واجهش عقبات في حياته . . . ماكانش حاجة تجي بالساهل في هاد الدنيا

هل تعرضت لمواقف محرجة -تزلقي قدام الغاشي وحوايج هكدا-


اييه و الله غي صراولي مواقف يبهدلو ههه . . بالأخص كي يكون الحس في القاعة و نهار ننطق أنا يصمت الجميع فجأة و يسمعوني كاملين :$ نتبهدل

وشن هي هادي الحاجة العزيزة على قلبك لي تودرتلك -طبعا إذا كان الجواب ممكن -


تودرتلي خاتم جاتني هدية تع السوتنونس تاعي العام لي فات ! الحمد الله كي لقيتها سي نو نهبل

هل هدى تستمع إلى الغناء - وإن شاء الله الجواب بلا- بصراحة


بصراحة نكذب عليك لوكان نقلك ما نسمعش . . نسمع صح مش دايما بصح . .! ربي يهديني ان شا الله

بصراحة هل كنت خفيفة أم ثقيلة الظل عليك


خفيفة كي النسمة ما تتقلقي ما والو حنونتي

و علابالي بلي كترت الأسئلة


لالا عادي ما تكسريش راسك

شكرا مسبقا سلام

العفو حبيبتي . . مرحبا بيك و شكرا على أسئلتك

و عليكم السلام و رحمة الله وبركاته

 

[oussama9694]

رد: كرسي التعارف الضيفة ~Lovely ღ smile~

السلام عليكم

راني رجعت ببعض الاسئلة و لكن لازم نضيفوك و راهو وقت العشا :d

شوفي كولي في غرضك على راحتك و مبعدا جاوبي على الاسئلة تاوعي

و راكم كامل معروضين ونظن نور الهدى ما عندهاش مانع :smile02:

-------------
و اي سؤال مابغيتيش تجاوبي عليه على راحتك اختي

ما هي أكلتك المفضلة ؟ ..... شوف ياخويا بعد ما شَبْعتْ رُحْتْ نسقسيها شوف هاذيك الفهامة :-o.....
قدوتك من النساء في الحياة ؟
احلامك الدنيوية البعيدة المدى ؟ وماتقوليش خدمة و عايلة صغيرة ههه
نور الهدى فتاة حالمة او واقعية ؟
تتمنين لو تعودين لمرحلة الطفولة ؟
وش عجبك بزاف فيكل مرحلة ... البريمار ؟ ..السيام ؟ ... الليسي ؟ ... الجامعة ؟
السوقر ذوكا و سوقر قبل 17 عام كاين فرق و لالا ؟ للاحسن و لا للاسوأ ؟
افضل كرطي *حي*في السوقر ؟
افضل سيام ؟ افضل ليسي ؟
شاهي الحاجة لي حابه تغيريها في السوقر ؟
مكان الميلاد ؟ التاريخ ؟
شخص غير حياتك ؟
فكرة غيرت حياتك ؟
و نختمو بالسؤال المشهور وش رايك في العبد الفقير اسامة ؟ .... فقير و داير عشا ملوك ماكانش منها :d....
وربما نرجعو
دمتم
​

 

[همس الوُرود]

رد: كرسي التعارف الضيفة ~Lovely ღ smile~

السلام عليكم أختي المبتسمة
والله مني لك ألف سؤال أود طرحه لك
لكن للأسف لا يمكنني.. .... ااسفة أختي

 

[همس الوُرود]

رد: كرسي التعارف الضيفة ~Lovely ღ smile~

سؤال واحد فقط

وش تعرفي عليا!!

 

[AmiR@RoRo]

رد: كرسي التعارف الضيفة ~Lovely ღ smile~

السلام عليكم
هدهدتي فالكرسي وانا هدا وين لحقت معلش
راني نشوف راهم عصروك يا ختي هههه جيت باش نفش قلبي فيك

لقيتهم شفاولي غليلي منك ههه

بما انك تحبي الروايات باي واية تنصحيني ؟
الاقلام لي تعجبك هنا فاللمة وتحبي تابعيها ؟

هدهد قوليلي تعرفي تحكي بلهجة الشرق هه؟
لو كان زعما خطيبك يفرض عليك تبقاي فالبيت ما تخدميش تقبلي ؟
وهدا سؤال لي ديما يدور فبالي وتقدري ماتجاوبيش عليه
الرجل لي ديما تحكي عليه فمدونتك هو خطيبك حقيقة ولا من نسج الخيال فقط ؟

وش هما الولايات لي زرتيهم ؟

وكاش ما نتفكر نجيك

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

السلام عليكم


و عليكم السلام و رحمة الله وبركاته
مرحبا بيك من جديد


راني رجعت ببعض الاسئلة و لكن لازم نضيفوك و راهو وقت العشا :d

شوفي كولي في غرضك على راحتك و مبعدا جاوبي على الاسئلة تاوعي

و راكم كامل معروضين ونظن نور الهدى ما عندهاش مانع :smile02:


اووو ربي يحفظك . . . يعطيك الصحة . . هاياا ابداو باسم الله مالكم حشمانين ؟

-------------
و اي سؤال مابغيتيش تجاوبي عليه على راحتك اختي


طيب ^^

ما هي أكلتك المفضلة ؟ ..... شوف ياخويا بعد ما شَبْعتْ رُحْتْ نسقسيها شوف هاذيك الفهامة :-o.....

ههههههه لا لي تجي من عند خويا كي العسل . .

أنا من هاذوك القوم الي ياكلو كل شي خخخ الا بعض الإستثناءات . . ما عنديش أكلة مفضلة بصح نبغي البوراك بزاف

قدوتك من النساء في الحياة ؟


الوالدة . . في خاطري نكون كيفها ! بصح يا حسرااه شحال لازملي

احلامك الدنيوية البعيدة المدى ؟ وماتقوليش خدمة و عايلة صغيرة ههه


هههههه بعيدة المدى . . امم نروح لبيت ربي و من بعده نزور كل دول العالم ما نخليش بلاصة تحزن عليا . . لنشر رسالة . كف أذى . دفع منكر . تقديم مساعدة ! على حساب البلاصة . .

نور الهدى فتاة حالمة او واقعية ؟


حالمة في حدود المعقول باش ما نتصدمش بالواقع . . . !

تتمنين لو تعودين لمرحلة الطفولة ؟


بزااف ! النية الصافية و البال الهاني . ..

وش عجبك بزاف فيكل مرحلة ...

البريمار ؟

نية البريمار غي وحدها . كنا براءة .

..السيام ؟

الإنتقال من الطفولة للمراهقة و طوايشها ههه

... الليسي ؟

العقل الي كان عاطيهلي ربي في الليسي ! و أجمل أجمل عام هو عام الباك . . فيه أحلى الذكريات

... الجامعة ؟


الجامعة عرفت فيها صلاحي . تبدلت بزاف . استعقلت بزاااف . يمكن هاذي أحلى حاجة في هاذي المرحلة

السوقر ذوكا و سوقر قبل 17 عام كاين فرق و لالا ؟ للاحسن و لا للاسوأ ؟


قبل 17 عام ما نعقلهاش مليح بصح كانت صغيرة . فيها ولاد البلاد برك ! الحشمة و الحُرمَة . . ضوكا خلاص السوقر فلست ماهيش كيما كانت . . بصح مازال كاين الناس المسـgـمين ! ربي يكثر منهم

افضل كرطي *حي*في السوقر ؟


و الله ما نعرف ههه . . بصح برايي الكرطي لي كنت نسكن فيه بكري هو أحسن حي . حي مزاد السهلي ولا كيما نقولوله حنا "فيلاج باكير"

افضل سيام ؟ افضل ليسي ؟


السيام " متوسطة اسعد علي " و الليسي نختار الليسي لي قريت فيه " ثانوية زكريا مجدوب "

شاهي الحاجة لي حابه تغيريها في السوقر ؟


نقص منها الفساد الناس راهم يشوفو فيها نظرة مش مليحة و راهم معممين النظرة عليها كاملة

مكان الميلاد ؟ التاريخ ؟


13-8-1994 السوقر

شخص غير حياتك ؟

////

فكرة غيرت حياتك ؟


تحمل المسؤولية. . كي خرجت من الدار و وليت مسؤولة عن كل شي في حياتي تبدلو فيا بزاف صوالح !

و نختمو بالسؤال المشهور وش رايك في العبد الفقير اسامة ؟ .... فقير و داير عشا ملوك ماكانش منها :d....


ولد بلادي . . ما عندي ما نقول فيه صح ما نعرفكش بزاف يعني من بعيد لبعيد بصح تبانلي شوية مشاكس ههه . عاقل
واثق من نفسك ..هاذا ما بانلي عليك و الله أعلم

وربما نرجعو
دمتم
​

مرحبا بيك في كل وقت تنور أخي و بارك الله فيك على العشا . . !

 

[{مُدَلَّلَتُهُ}]

رد: كرسي التعارف الضيفة ~Lovely ღ smile~

السلام عليكم أختي المبتسمة
والله مني لك ألف سؤال أود طرحه لك
لكن للأسف لا يمكنني.. .... ااسفة أختي

و عليكم السلام و رحمة الله و بركاته

أهلين توينكل . . منورة القعدة غاليتي . .

على بالكي وسوستيني كي قلتي لا يمكنني . . ! ياك ماكان غير الخير ؟..

و اذا كاين حاجة باغية تسقسي عليها تفضلي ما عندي حتى مشكل سلآمي