السلام عليكم
و عليكم السلام و رحمة الله وبركاته
هدهدتي فالكرسي وانا هدا وين لحقت معلش
هههههههه وين هادا وين لحقتي يا بنتي راني قعدت غي البارح في الكرسي ماكان لاه تتخلعي
راني نشوف راهم عصروك يا ختي هههه جيت باش نفش قلبي فيك
لقيتهم شفاولي غليلي منك ههه
امممممم لي يشوفكم تستشفاو يقول هادي شريرة راهم يسالوهالها :-o ههه مالكم فرحتو كي حطوني في الكرسي ؟
بما انك تحبي الروايات باي واية تنصحيني ؟
ننصحك ب في قلبي أنثى عبرية . و مبعد قراي رواية أنت لي "اذا كان عندك الوقت على خاطر طويلة بزااف "
الاقلام لي تعجبك هنا فاللمة وتحبي تابعيها ؟
نتبع حكيم خويا .نبغي كتابات أخي ياسين الله يذكره بالخير ان شا الله يكون مليح . شوية من كتابات إيمان لؤلؤة ملاك نجيب كارلا . . . . شوية من كل شي
هدهد قوليلي تعرفي تحكي بلهجة الشرق هه؟
ههههههههههه شوية برك مش بزاف بصح نفهمها مليح
لو كان زعما خطيبك يفرض عليك تبقاي فالبيت ما تخدميش تقبلي ؟
اممم على حسب الظروف . عموما أنا وحدة نبغي الإستقلال المادي نحاول نقنعه بخدمتي . . بصح اذا خشن راسه و كان الإختيار بينه و بين الخدمة و كنت نبغيه . . نتنازل بشروط
وهدا سؤال لي ديما يدور فبالي وتقدري ماتجاوبيش عليه
الرجل لي ديما تحكي عليه فمدونتك هو خطيبك حقيقة ولا من نسج الخيال فقط ؟
هههههههههه و علاه مخلياته يدور في بالك .. لوكان جيتي سقسيتيني ولا زعما حشمتي
واش من خيال ابنتي علاه زعما كاين خيال واسع كيما هاك ؟ حقيقي :$
وش هما الولايات لي زرتيهم ؟
امم زرت وهران . مستغانم . تلمسان . سعيدة . العاصمة . بومرداس . تيبازة . منطقة الشفة "ما نعرف لواش من ولاية تابعة هادي "
وكاش ما نتفكر نجيك
لا داعي للتوضيح و الشرح اختي ... انا عشت في السوقر ونعرفها مليح ونعرف فيها ناس ما شاء الله قمة في الاخلاق و واحد منهم افضل اصدقائي .... ونعرفها كيما قال القذافي -زنقة زنقة - ههه....
الله يسلمك أخي .. الحمد الله كي عرفت فيها وحدين ملاح !
الأكيد أن في كل بلاصة كاين المليح و القبيح
و نظن ثانوية زكريا مجدوب يسموه -الليسي الفوقاني - انا يعجبني التيكنيكوم *قاديري خالد* يعني المرتبة الاولى وطنيا في نسبة النجاح وهذا فخر كبير ليها
نيشان. التيكنيكوم مانبغيش الضغط لي فيه تحس روحك راك في غوانتانامو بصح الله يبارك تع صح يقراو ! ان شا الله يبقا ديما هاك و يلحقو بيه الليسيات لخرين
+
نظن دخلتي على 5 سنين البريمار و لا راني غالط ؟
ههههه واه دخلت على 5 سنين ! ما شبعتش لعب gـاع:p
لاكاش اسئلة نعاودو نرجعو
وتحية كبيرة ليك
دمتم
و عليكم السلام و رحمة الله و بركاته
أهلين توينكل . . منورة القعدة غاليتي . .
على بالكي وسوستيني كي قلتي لا يمكنني . . ! ياك ماكان غير الخير ؟..
و اذا كاين حاجة باغية تسقسي عليها تفضلي ما عندي حتى مشكل
السلام عليكم جبتلك قهوة المساء ومعاها حاجة انا نحبها بالاك تعجبك :.
و عليكم السلآم و رحمة الله و بركاته
أهلينو حكيم زاارتنا بركة هادي غيبة
يعطيك الصحة خيوو و الله غي هاذاك ما كان خاصني مع هاد العية
المهم بسم الله نبدا الحنا خخخ نبدا الاسئلة :
هههههههه باسم الله
كملتي قراءة رواية انت لي ممكن تعطيلي انطباعك عليها وهل كان اختياري ليها موفق باسكو راني درت اشهار لهذي الرواية هنا والجميع قراها ؟؟
قريتها كي كنت في لاسيتي . هبلت الغاشي بيها خخخ انت درتلها اشهار هناا و انا درتلها اشهار في الواقع
صراحة اختيار جد موفق . صح طويلة و دارتلي الإكتئاب ماجات تكمل حتى كملتني خخخ بصح تهبل
ماهي الاشيااء اللي تنتقديها في الكلمات نتاعي وماهي الاشياء اللي تجذبك ليها ؟؟
ما عندي ما ننتقد صراحة و لوكان جات كاينة حاجة ما تعجبنيش نقولك عليها. . يعجبني فيها العفوية البساطة قريبة من القلب و ساعات نلقا في مدونتك الكلام لي ما عرفتش أنا نقوله !
من بين الاشياء اللي تعجبني في المدونة نتاعك هي التنظيم الراقي ماهو السر في انو هدى تعرف تخير الصورة المناسبة للكلمات نتاوعها ؟
:$ ربي يحفظك ! . . ساعات نلقا صورة و على حسابها نعبر و ساعات نعبر و نقلب راسي على صورة مناسبة ما نريحش حتى نلقاها
واش هي الحاجة اللي خلاتك ما تقرايش في ولايتك وتروحي للجزائر العاصمة ؟
في هاداك العام التخصص لي راني دايراته مدوه في ولايتي بـ10 غاضتني عمري كيفاش جايبة 13 و نقرا كيما لي جابو 10 :tongue02: رحت زعما درتها في العاصمة صح كاين فرق كبير بين شا قريت أنا و شا قراو هوما بصح في الأخير ؟ نهايتها الشوماج في أغلب الحالات
وفي الاخير درتو الخاتم ولا مازال ؟؟
مازال بسبب المشكل لي راك على بالك بيه ! دعيلي ربي
وملاحظة خفيفة :
شكرا لانك صنفتي كلماتي واخترتيها من بين الكلمات اللي تعجبك ربي يهنيك ان شااء الله
لأنها تع الصح تستاهل . . أنا لي نشكرك على خاطر كتبتها !ربي يهنيك حتى انت و يرزقك ما تتمنى
وملاحظة اخرى تاريخ ميلادك يكاد ينطبق مع تاريخ ميلاد هذيك سلام .
اهلا حنونة نور
أهلا ملآك مرحبا بيك من جديد الزينة
ان شاء الله راكي مليحة
الحمد الله . . راني مليحة بشوفتكم غاليتي
الى كاش سؤال معاود
جاوبيني و خلاص
باسكو مزال ماقلبتش الصفحات الي فاتو
هههههه اوك مش مشكل نعاودلك
اكلة تقليدية مشهورة بيها ولاية تيارت؟
ااممم الغرب مشهور كامل بأكلات مشتركة . كيما الحريرة المعقودة المحمر . بصح يقولو الطعام التيارتي لا يعلى عليه و ما نعرف . كاين تاني المشوي لي كاين بزاف لي يديروه في لعراس و المناسبات"بصح مش مشهور في تيارت برك كاين بزاف مناطق معروفين بيه" و المسفوف "هادا مشترك بين كامل ولايات الوطن في بالي "
واش الاكلات الي تحب طيبيهم ؟و لا تحبي تنوعي في الاكلات ؟
نبغي نطيب المخبوزات . بصح نبغي نوع في الأكلات باه مبعد ما نحصلش
واش هو الفصل الي تحبيه؟
نبغي الشتآ ♥ بالأخص في المطر ولا الثلج ♥
اسكو تتقلقي بالخف ولا نوغمال ؟
على حساب . مرات نكون سريعة الإلتهاب كلمة صغيرة تشعلني و مرات لا بالعكس نكبر خاطري حتى خلاص !
تسامحي الي غدرك من قلبك؟
ولا تسامحي وماتنسيش؟
نسامحو كي يطلب السماح و ما نعاودش نجبدلو عليها بصح تبقى غايضتني شوية منه بالأخص لا كنت نبغيه !
لي عودة حنونة
يعطيك الصحة ملآكي على أسئلتك الظراف . . ♥ مرحبا بيك في كل وقت ♥ تنوري القعدة الزينة
تفضلوا و ما تحشموش ** البوراك خلوه لنور الهدى ههه **
-----------------
