لقاء مع فنانة

[أم أمين23]

موضوعي يا حلوات ليس استضافة لفنانات التلفاز او الاداعة ولكن استضافة لفنانات الطبخ والابداع حبيت من خلال هاد الموضوع استضافة رائدات المنتدى الطبخ واللاتي تتحفننا دائما بوصفاتهن وتجاربهن بالمطبخ وكل الفنانات اللاتي تزرن القسم حتى بالتشجيع للمبدعات لنتعرف عليهن في المطبخ ولدلك حضرت مجموعة من الاسئلة تجيب عليها ضيفاتنا وفناناتنا في كل مرة فاليكن الاسئلة وكل من ترد تختار بعدها اخت من الاخوات:

1. متى دخلتي المطبخ أول مرة؟
2. ممن تعلمتي الطبخ؟
3. هل تحبين الطبخ وتستمتعين به أو ترين أنه واجب عليك؟
4. هل تحبين أن تأكلي مما تصنع يديك أو تفضلين أكل ما يصنعه الآخرين؟
5. هل تفضلين اكل البيت وتستمتعين به أكثر من اكل المطاعم او العكس؟
6. أكثر طبق تحبين طبخه وتجدينه؟
7. اكثر طبق تحبين أكله لكن للأسف لا تجدين عمله؟
8. طبق أكلته وتمنيتي أن تتعلمين طريقته؟
9. اسهل طبق تعلمتيه؟
10. اصعب أكلة عملتيها؟
11. اصعب موقف حصل معاكي بالمطبخ؟
12. مقف مضحك حصل معاكي بالمطبخ؟
    
13. أكثر من يحب طبخك؟
14. واكثر من ينتقده؟
15. عندما تطبخين تلتزمين بالوصفة عادة أو تكون فيها دائما لمسة ابداعية منك؟؟
16. تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟
    

كان عندي اسئلة أخرى بس قلت بلا ما تملو هاد القدر كافي ليعرفنا عليك في جانب ما
في أمان الله ومستنيا تفاعلكم مع موضوعي الي اتمنى ينال اعجابكم وهو طبعا حصري للمة مش منقول

​

 

[dahbito]

اهلا بيك ام امين موضوع باهي ومليح

 

[روز]

وين راهم اللمويات ،،،؟
نتشرف كي نكون أول وحدة تردفي مواضيع طيوبتنا أم أمين


متى دخلتي المطبخ أول مرة؟

في سن 15سنة​

ممن تعلمتي الطبخ؟

من بنت عمي لي كانت مغرومة بالطبخ بعدها من أمي​

هل تحبين الطبخ وتستمتعين به أو ترين أنه واجب عليك؟

امم مش نستمتع فقط
أنا كل شي نطيبو،،نطيبو بكل حب وتمتع وسعادة​

هل تحبين أن تأكلي مما تصنع يديك أو تفضلين أكل ما يصنعه الآخرين؟

الإثنين معآآآ نحب نذوق أكل الآخرين خصوصا لي من بلدان أخرى​

هل تفضلين اكل البيت وتستمتعين به أكثر من اكل المطاعم او العكس؟

نحب الوجبات السريعة بصرآحة
لكن مش دائما نشتاق بسرعة للشوربة والكسكس
​

أكثر طبق تحبين طبخه وتجدينه؟

ماعنديش مشكل مع التطبيقات
لكن أكثر طبق نحبو يمكن الدجاج إيفيلي​

اكثر طبق تحبين أكله لكن للأسف لا تجدين عمله؟

الحمدلله لي نديرها في راسي ونكون حابة نذوقها
مايكونش عندي مشكل معاها​

طبق أكلته وتمنيتي أن تتعلمين طريقته؟

يمكن نقول أكلة ماذقتهاش وحبيت نطيبها وناكلها
هي شخشوخة الظفر والحسوة امممم البسكريات لي في المنتدى هبلوني بيها
وتاني وحدة الحاجة تعملها عفاف الجزائرية
خبز يدق في المهراس مع الحار اممم لما نتفكرو نقول دركة نروحلها وناكلو عندها
ولا نجيب معايا المهراس ونخدمو (​

اسهل طبق تعلمتيه؟

الشوربة
رغم أنو الناس لكبار يقولو انها أصعب طبق​

اصعب أكلة عملتيها؟

المسمن المعسل
هذا في الأول لكن امبعد تعودت عليه وليت نخدمو بسرعة​

اصعب موقف حصل معاكي بالمطبخ؟

مرة في رمضان حبيت نعمل شوا شهاتني فيه أم ندوش
وقلت نشوي في آخر دقيقة باش يكون سخون
الشواية تمشي بالكهرباء من حظي شعلت النار في الشواية حاولت جاهدة ماتصيرش كارثة
و الثمن اني حرقت من ايديا
لكن الحمدلله كانت أقل الأضرار​

موقف مضحك حصل معاكي بالمطبخ؟

قشور البطاطة وحوايج أخرى حطيتهم في الثلاجة ونسيت ايام ههه
طبعا عقلي وقتها كان في بلاصة اخرى​

أكثر من يحب طبخك؟

أي واحد يذوقو يعجبو
(وحدة واثقة من نفسها هه)​

واكثر من ينتقده؟

بابا مايعجبوش العجب
​

عندما تطبخين تلتزمين بالوصفة عادة أو تكون فيها دائما لمسة ابداعية منك؟؟

الوصفة نلتزم بيها في أول تطبيق
لكن الشكل الخاريجي دايما نزيد فيه ولا نقص​

تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟

أي أكلة تعجبني نطبقها
لحب خادمينها في شنغهاي ههه​

كان عندي اسئلة أخرى بس قلت بلا ما تملو هاد القدر كافي ليعرفنا عليك في جانب ما

في أمان الله ومستنيا تفاعلكم مع موضوعي الي اتمنى ينال اعجابكم وهو طبعا حصري للمة مش منقول​

استمتعت بالأسئلة ان شاءلله يلقى إقبال وتجاوب

صحيتي ام أمين​

 

[dahbito]

متى دخلتي المطبخ أول مرة؟
يا حسراه فكرتيني في الذي مضى هههههه والله ماني شافية يا ام امين المهم دخلت هههه
ممن تعلمتي الطبخ؟
والله صراحة اول مرة من عند امي ربي يخليهالي
ومنبعد من عند اللمويات حبيبات قلبي
هل تحبين الطبخ وتستمتعين به أو ترين أنه واجب عليك؟
لا بالعكس نحبوا بزاف والله ساعات نكون قاعدة حتى نصيب روحي في الكوزينة نخلط
هل تحبين أن تأكلي مما تصنع يديك أو تفضلين أكل ما يصنعه الآخرين؟
صراحة والله ديفوا نطيبها ومانكلهاش ماعرفتش علاه جيني ثقيلة
هل تفضلين اكل البيت وتستمتعين به أكثر من اكل المطاعم او العكس؟
لا يا تاختي تحيا ماكلة الدار والله غير كي تتحتم برك الواحد راهو يروح لبرا
أكثر طبق تحبين طبخه وتجدينه؟
صراحة كاين بزاف مي الطبق الى نحبوا بزاف ومتمكنا فيه هو الشخشوخة
اكثر طبق تحبين أكله لكن للأسف لا تجدين عمله؟
ههههههههههههههه بهدلتينا مزية الراجل خاطيه النت انا قتلوا نعرف ندير كلش هههه
هو ماشي طبق بصح الهم نحب ناكل البسبوسة وانا كيما عييت معاها محبتش تخرج والله راني مجربا كامل الوصفات الله غالب واقيلا هي ماحبتنيش
طبق أكلته وتمنيتي أن تتعلمين طريقته؟
والله كليت طبق المحمر عجبني بزاااااااااااااااف
اسهل طبق تعلمتيه؟
البيتزااااااااااااااااا
اصعب أكلة عملتيها؟
االفطير ولا كيما يقولوا صحاب الغرب الرقاق يا اختي لازم تشمري على ذراعيك هههه
اصعب موقف حصل معاكي بالمطبخ؟
يا حصرا هادا حريق هدا تكسار الماعين اسكتي برك راني خاليتهم
مقف مضحك حصل معاكي بالمطبخ؟
مرة خدمت كيك وحطيتو في المول وكي طاب غير خرجتو تفش
ههههههههههه نسييت الفرينة الله غالب واش من عقل بقا
​

أكثر من يحب طبخك؟
والله العائلة تاعي يحبوه وخصوصا الوالد ربي يحفظا
واكثر من ينتقده؟
امي نادبتلي ديري هادي ونسيتي هادي حطي هادي هي لازم تكون كيما تاعها ولا مافراتش في الكوزينة
عندما تطبخين تلتزمين بالوصفة عادة أو تكون فيها دائما لمسة ابداعية منك؟؟
غير الزيادة مع النساء الى فيها ياولوكان نزيدو الملح ههههههههههه
تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟
لا نحب نجرب الوصفات الجديدة احسن
ربي يخليك على الاسئلة الباهية
​

 

[أم أمين23]

الله اخليك روز لانك افتتحتي موضوعي واسعدتني بردك وخلتيني نتعرف عليك كفنانة في مطبخك مبدعة ومحبة للطبخ
اختي ذهبيتو على راسي حنونة ضرك نرسل الرابط للاخوات ومشكورة لمشاركتك واكيد راح تكون طباخة شاطرة مادامك راكي في العشرينات وتعرفي اديري الرقاق ماشاءا لله عليك اكيد راجلك مرة اخرى عسيه على الميزان خخخخخ
راح اشوف مين من العضوات راح ارسل لها بما انكن لم تقترحن أي واحدة

 

[ندى الورود]

متى دخلتي المطبخ أول مرة؟
13 سنة

ممن تعلمتي الطبخ؟
​

الأكلات التقلدية تعلمتها من أمي وتعلمت الكثير من النت

هل تحبين الطبخ وتستمتعين به أو ترين أنه واجب عليك؟
​

حقيقة أنا نموت على الطبخ بصح أحيانا نمل أنا الفتاة الوحيدة في عائلتنا
وكل شي طايح فوق راسي

هل تحبين أن تأكلي مما تصنع يديك أو تفضلين أكل ما يصنعه الآخرين؟
​

نحب ناكل من الشي اللي نطيبو ونحب أكل الأخرين بصح
ماشي الكل المقربين ليا مثل صديقاتي والقليل جدا من آقاربي

هل تفضلين اكل البيت وتستمتعين به أكثر من اكل المطاعم او العكس؟
​

نحب أكلات معينة في البيت مثل الشخشوخة يعني آكلاتنا التقليدية ونحب آكلات المطاعم
السريعة مثل الشاورما والبيتزا و خصوصا المحاجب مرات نسخف عليهم
كي نشوفهم يطيبو فيهم والريحة تاعهم طالعة

أكثر طبق تحبين طبخه وتجدينه؟
​

شخشوخة السيار نعرف ندريها من العجينة إلى طيابها

اكثر طبق تحبين أكله لكن للأسف لا تجدين عمله؟
​

نحب الكسكس بصح ما نعرفش نفتلو يعني نعرف نطيبو برك

طبق أكلته وتمنيتي أن تتعلمين طريقته؟
​

بزاف أكلات شفتها في المنتدى غريبة عليا ويشهيوني وتمنيت نتعلم ولو طبق واحد منهم

اسهل طبق تعلمتيه؟
​

جاري فريك كيما نقولو في منطقتنا
ملي كنت صغيرة نديرو
اصعب أكلة عملتيها؟
تريدة الطاجين أو الرقاق أو الشخشوخة كيما يسموها البعض
احنا نديرووها فوق طاجين خاص ماشي هذاك الطاجين المعروف وصعيب بزاف
كاين بزاف اللي يتحرقو بصح أنا الحمد لله في ساع تعلمتو
وحرقت يدي مرة وحدة برك وبعدها وليت نديرو كيما وحدة محترفة
والفضل يعود لأمي هي اللي علمتني
اصعب موقف حصل معاكي بالمطبخ؟
مرة كنت نطيب في الكسرة وأنبوب الغاز تنحى من الطابونة
المزية جريت قطعت الغاز

موقف مضحك حصل معاكي بالمطبخ؟

مواقف بزاف
مرة طيبت عدس للغدا ونقصت للنار ورحت قعدت على الميكرو
ونسيت خلاص العدس رحت لقيتو ولا فحمة
المزية أمي ما كانتش في الدار خرجت تشري حوايج
وزربت غسلت الكوكوط العادية ماشي كوكوط الضغط
وزدت حطيت عدس وحد آخر جات أمي قالتي واش قاعدة ديري من الصباح
درك وين حطيتي الغدا راح الحال
و موقف آخر السمانة اللي عدات برك حطيت الملح في الثلاجة وبقيت نحوس عليه وين راه
وبالصدفة ففتحت باب الثلاجة لقيتو قدامي
​

أكثر من يحب طبخك؟
​

طبعا أهلي وصديقاتي يموتو في قاطواتي

واكثر من ينتقده؟
​

والدي هو مغترب بصح نهار يجي العجب يخرجو
مرات يقولي بنينة مرات يقولي هزي عليا صامطة
برك أنا دايما نقص الملح في الطياب بحكم والدي و والدتي
عندهم الضغط بصح هو ما يحبش يقنع لازم نجيبولو الملح

عندما تطبخين تلتزمين بالوصفة عادة أو تكون فيها دائما لمسة ابداعية منك؟؟
​

في الأطباق المالحة ألتزم بالوصفة وأغير القليل فقط
أحيانا نلقا وصفات تاع حلويات غير مضبوطة وناقصها حوايج بزاف
انا نضيف ولا ننقص أشياء حسب ما أراه مناسبا

تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟
​

أكيد نحب نجرب الجديد بصح أحيانا نتكاسل يعني موش دايما

​

 

[أم أمين23]

مشكورة يا شيف واكيد وصفتك تشهد على ابداعك مشكورة لتلبية الدعوة بانتضار ضيفة جديدة يلا تدخلو وحدكم والا لازم نعرضكم خخخخ

 

[iman88]

بارك الله فيك ام امين موضووووووووووووع شيق

على بركة الله

متى دخلتي المطبخ أول مرة؟

ما نيش عاقلة بالضبط المهم كنت صغيرة و بديت بالفريت و القلي عامة


ممن تعلمتي الطبخ؟

من عند الوالدة ربي يحفظها و من بعد النت

هل تحبين الطبخ وتستمتعين به أو ترين أنه واجب عليك؟

على الحساب المورال مرات نتفنن و نبدع بكل سرور و مرات غير نخلط:s

هل تحبين أن تأكلي مما تصنع يديك أو تفضلين أكل ما يصنعه الآخرين؟

دايما افضل اكل الاخرين لان كي نطيب تروح الشهية خلاص

هل تفضلين اكل البيت وتستمتعين به أكثر من اكل المطاعم او العكس؟

افضل اكل البيت طبعا ناكل و انا مطمئنة اما اكل المطاعم ناكل و شادة قلبي :

أكثر طبق تحبين طبخه وتجدينه؟

نبغي لي بات صالي و لي بلا و خاصة الدوارة

اكثر طبق تحبين أكله لكن للأسف لا تجدين عمله؟

الخبييييييييييييييييز نموت عليه و مانعرفش نعملو:

طبق أكلته وتمنيتي أن تتعلمين طريقته؟

ماكانش لان الحاجة لي تعجبني نجربها

اسهل طبق تعلمتيه؟

في الحقيقة ماكاش حاجة صعيبة خاصة الطياب كل حاجة نعملها من قلبي جيني ساهلة:$
كارنتيكة مافيهاش تكسار الراس


اصعب أكلة عملتيها؟

كي مايكونش عندي الوقت و نكون عيانة كل شيء يجيني صعيييييييييب

اصعب موقف حصل معاكي بالمطبخ؟

ايييييييييه كل مرة نعمل حريق . مرة سني كامل تاع كسرة نسيتو و تفحم في الكوشة و مرة كاوكاو راح كامل

مقف مضحك حصل معاكي بالمطبخ؟

:-o


أكثر من يحب طبخك؟

صديقاتي في ايام الجامعة

واكثر من ينتقده؟

امي اكيييييد كل مرة كاين حاجة

عندما تطبخين تلتزمين بالوصفة عادة أو تكون فيها دائما لمسة ابداعية منك؟؟

لاول مرة بالحرف الواحد و من بعد نعدل على ذوقي

تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟

نحب نجرب بزاف خاصة الحلويات :up:


بارك الله فيك . . . امتعتينا​

:regards01:

 

[ام ريهام]

متى دخلتي المطبخ أول مرة؟

لا اتذكر متى لكن من ايام الدراسة بالمتوسط
ممن تعلمتي الطبخ؟
الاكلات التقليدية من امي ربي يذكرها بالخير والمن الصديقات التلفزيون (فتافيت)ومن النت واخيرا من المنتدى لاني من فترة غير بعيدة اكتشفته للااسف فاتني الكثير
هل تحبين الطبخ وتستمتعين به أو ترين أنه واجب عليك
اعشق الطبخ والمطبخ واغلب وقتي فيه
هل تحبين أن تأكلي مما تصنع يديك أو تفضلين أكل ما يصنعه الآخرين؟
احب اكلي ولكن احب تذوق ما يطهيه الاخرون
هل تفضلين اكل البيت وتستمتعين به أكثر من اكل المطاعم او العكس؟
احب اكل البيت واكيد اكثرمن المطاعم حت الوجبات السريعة اعملها بمطبخي المتواضع
أكثر طبق تحبين طبخه وتجدينه؟
والله البيتزا احب شيء الي
اكثر طبق تحبين أكله لكن للأسف لا تجدين عمله
اي طبق احب طبخه لا اجد الصعوبة فيه بالارادة نصنع المستحيل
طبق أكلته وتمنيتي أن تتعلمين طريقته؟
لحد الان مكاش
اسهل طبق تعلمتيه؟
بالارادة والعزيمة ليس هناك السهل والصعب
اصعب أكلة عملتيها؟
بالارادة والعزيمة ليس هناك السهل والصعب
اصعب موقف حصل معاكي بالمطبخ؟
صنعت كيكة لما وضعتها بالفرن الكهربائي انقطع الكهرباء وللاسف بيكت عليها
موقف مضحك حصل معاكي بالمطبخ؟
:d:s
أكثر من يحب طبخك؟
زوجي وابنتي التي اصبحت تعيب كل الاكل غير اكلي
واكثر من ينتقده؟
الحمد الله ليس هنا انتقاد الافي احيان نكثر فيه الملح ههههههههههه
عندما تطبخين تلتزمين بالوصفة عادة أو تكون فيها دائما لمسة ابداعية منك؟؟
عادة التزم بالوصفة لكن دائما فيها لمسة من لمساتي
تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟
احب كل ماهو جديد واحب التجريب اكيد فبه نتعلم الكثير والكثير
اتمنى لكم جميعا التالق والنجاح

 

[ام رحاب]

1. السلام عليكم
2. متى دخلتي المطبخ أول مرة؟
   
3. لما كان عمري 9 سنوات واول شي عملتوا صنعت الفطير او المبسس
4. ممن تعلمتي الطبخ؟
5. من امي ومن النت وبصراحة اكتر الاطباق انا اخترعتهم ..:d
   
6. هل تحبين الطبخ وتستمتعين به أو ترين أنه واجب عليك؟
7. انا احب الطبخ كتييييييييير بس لما يصيروا عندك ولاد يصير المطبخ عدوك اللدود:d:d
   
8. هل تحبين أن تأكلي مما تصنع يديك أو تفضلين أكل ما يصنعه الآخرين؟
9. بصراحة احب اكل طبخ غير طبخي لاني لما اطبخ تنسد شهيتي
   
10. هل تفضلين اكل البيت وتستمتعين به أكثر من اكل المطاعم او العكس؟
11. مافي احلى من أكل البيت...بس احيانا اكل المطاعم ينفعك وقت الضروووورة
    
12. أكثر طبق تحبين طبخه وتجدينه؟
13. بصراحة في كتير من طبق احبهم واجيدهم
    
14. اكثر طبق تحبين أكله لكن للأسف لا تجدين عمله؟
15. بصراحة لحد الساعة مافي طبق حبيته وماعرفت اصنعه اذا حبيت شي بصنعوا
    
16. طبق أكلته وتمنيتي أن تتعلمين طريقته؟
17. البتزا السائلة اكلتها منذ يومين عند خالتى
    
18. اسهل طبق تعلمتيه؟
19. الكسكسي
    
20. اصعب أكلة عملتيها؟
21. مابحس انوا الاكل صعب
    
22. اصعب موقف حصل معاكي بالمطبخ؟
23. عملت طاجين محمر بالكيكوت وقت حضروا الضيوف ما حبتش تنفتح
    
24. مقف مضحك حصل معاكي بالمطبخ؟
25. بدل ماحط سكر بالكيك حطيت ملح:$:$
    
26. أكثر من يحب طبخك؟
27. زوجـــــــــــي يقول لو تطيبي الحجر يجي بنين:d:$:$
    
28. واكثر من ينتقده؟

بصراحة لحد الساعة لا احد

1. عندما تطبخين تلتزمين بالوصفة عادة أو تكون فيها دائما لمسة ابداعية منك؟؟
2. انا مافي ولا مرة التزمت بوصفة لازم ادخل لمسة
   
3. تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟

احب كل ماهو جديد








بصراحة ممتعة الرحلة مشكورة اختي

​

 

[ام انس الحبيب]

1. متى دخلتي المطبخ أول مرة؟
2. في سن 14 سنة
   
3. ممن تعلمتي الطبخ؟
4. من امي رحمها الله
   
5. هل تحبين الطبخ وتستمتعين به أو ترين أنه واجب عليك؟
6. نعم جدا واكثر مكان احبه في البيت هو المطبخ
   
7. هل تحبين أن تأكلي مما تصنع يديك أو تفضلين أكل ما يصنعه الآخرين؟
8. اكل من يدي ولا امانع في تذوق ما يصنعه الاخرون
   
9. هل تفضلين اكل البيت وتستمتعين به أكثر من اكل المطاعم او العكس؟
10. افضل اكل البيت لكن لا ضرر في قليل من التغيير من حين لآخر
    
11. أكثر طبق تحبين طبخه وتجدينه؟
12. اكثر طبق احبه و اجيده هو طبق الكسكسي
    
13. اكثر طبق تحبين أكله لكن للأسف لا تجدين عمله؟
14. والله بدون غرور لحد الان لم احب شيئا لم اجده
    
15. طبق أكلته وتمنيتي أن تتعلمين طريقته؟
16. البيتزا الايطالي على اصولها من الالف الى الياء
    
17. اسهل طبق تعلمتيه؟
18. كان طبق حلو و هو نوع من الحلويات اسمه بقلاوة les etages
    
19. اصعب أكلة عملتيها؟
20. الشخشوخة انتاع الورق
    
21. اصعب موقف حصل معاكي بالمطبخ؟
22. وجدت الرشتة لزوجي و هو كان ساخف عليه بزاااااف ومن بعد عند التقديم اكتشفت اني نسيت الملح كان راح يحبس قلبو مسكين ههههههههههه
    
23. مقف مضحك حصل معاكي بالمطبخ؟
24. درت شربة فريك وحرت واشبيها ما حبتش تخثار ياخي ظهرت نسيت ما حطيتش الفريك
    
25. أكثر من يحب طبخك؟
26. زوجي وبيت اهلي
    
27. واكثر من ينتقده؟
28. زوجي ليس نقدا هداما ولكن دايما عندو ما يقول ههههههههههه
    
29. عندما تطبخين تلتزمين بالوصفة عادة أو تكون فيها دائما لمسة ابداعية منك؟؟
30. تكون دائما فيها لمسة ابداعية مني
    
31. تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟
32. اجرب كل شيئ يدلني عليه حدسي انه ناجح

 

[أم أمين23]

ايمان يظهر من اجابتك انك فنانة في الطبخ ولكن عندما تكون حالتك النفسية او فلنقل المزاج عالي على راي المصريين
ام رحاب وام ريهام وام انس الحبيب واضح جدا تفننكم وحبكم للطبخ وفعلا ام رحاب احيانا الاولاد يمللوك ويتعبوك حتى تعودي مادابيك ما تدخليش المطبخ ولا تستمتعي بعملك لكثرة طلباتهم
اسعدتموني جميعا بمروركن وتجاوبكن مع الموضوع راح ادور عضوات جدد واكيد الي تدخل من غير عرضة اكون شاكرة جدا لها مرورها

 

[ريمو]

متى دخلتي المطبخ أول مرة؟
وانا عندي 17 سنة

1. ممن تعلمتي الطبخ؟

من ماما ربي يحفظها

1. هل تحبين الطبخ وتستمتعين به أو ترين أنه واجب عليك؟

نحب الطبخ ونسمتع وانا نطيب خاصة كي نزيد اضافات من عندي

1. هل تحبين أن تأكلي مما تصنع يديك أو تفضلين أكل ما يصنعه الآخرين؟

نحب اكلي و اكل ماما اما الناس الاخرين مش دايما على حسب الاكل ههههه

1. هل تفضلين اكل البيت وتستمتعين به أكثر من اكل المطاعم او العكس؟

نحب اكل المطاعم بصح اذا زدت على 3 ايام وانا ناكل منه نمل ويبقى اكل البيت احلى

1. أكثر طبق تحبين طبخه وتجدينه؟

لازانيا

1. اكثر طبق تحبين أكله لكن للأسف لا تجدين عمله؟

العيش (بركوكس) بصح راح نتعلمو ان شاء الله

1. طبق أكلته وتمنيتي أن تتعلمين طريقته؟

اكلة تركية سموها اسكندر

1. اسهل طبق تعلمتيه؟

اومليت :d

1. اصعب أكلة عملتيها؟

خبز المقلة صعب ماما ورايا حتى علمتهولي

1. اصعب موقف حصل معاكي بالمطبخ؟

كسرت لي تعجن الخبز ويوم لي كانت تعلم فيا ماما الخبز .. والله حشمت على روحي ماما مستحفظة عليه قولي 10 سنين جيت انا وكسرته بصح ياحليلها مازعفتش عليا غير تأنيب خفيف هههههه(بصح من بعد قتلها يليق تشكريني كان في خاطرها kenwood وشراتها هههههه)

1. مقف مضحك حصل معاكي بالمطبخ؟

كنت غير كيما بديت نطيب وقاتلي ماما ديري لاصوص تاع بيتزا وديري الحشوة وحطتلي مكونات وخرجت,, انا حرت كيفاش هادي لاصوص تجي ايا طيبت لاصوص مع الحشوة مع بعض هههههه طبعا كي رجعت زعفت عليا وحتى الان يذكروني بيها

1. أكثر من يحب طبخك؟

اهلي وصديقاتي

1. واكثر من ينتقده؟

عندي خويا مش ينتقد بصح يحب يعلق ,, وبابا حليله وماتعجبوش والله مايقول بالعكس يشجعني ويجبر بخاطري ههههههه

1. عندما تطبخين تلتزمين بالوصفة عادة أو تكون فيها دائما لمسة ابداعية منك؟؟

انحب نزيد اضافاتي ونفرح كي تجي بنينة بصح القاطو مانخاطرش نلتزم بالوصفة

1. تحبين تجريب كل ما هو جديد من وصفات أو انك تفضلين عمل المضمون من الوصفات فقط؟؟

نحب نجرب الجديد

يعطيك الصحة ام امين عالموضوع الزين كيفيك ​

 

[MĺŹǾ žĕĥÔŖ]

موضووووووووووووووووع رائع مثل صاحبتووووووووووو
لي عودة للرد طاطاتي ام امين
​

 

[SONYA25]

1. متى دخلتي المطبخ أول مرة؟
2. في المتوسط الله اعلم
   
3. ممن تعلمتي الطبخ؟
4. من الوالدة ربي يحفضها واختي كبيرة
   
5. هل تحبين الطبخ وتستمتعين به أو ترين أنه واجب عليك؟
6. انا نموت على الطبخ واجب في نفس الوقت
   
7. هل تحبين أن تأكلي مما تصنع يديك أو تفضلين أكل ما يصنعه الآخرين؟
8. كاين اكلات نحب ناكل تا خدمة يدي وكاين حوايج نحب ناكلهم تاع الاخرين
   
9. هل تفضلين اكل البيت وتستمتعين به أكثر من اكل المطاعم او العكس
10. نفضل اكل البيت بعدا الطبخات التقليدية وكاين حوايج نحب ناكل تاع برا
11. أكثر طبق تحبين طبخه وتجدينه؟
12. ربما الشخشوخة
    
13. اكثر طبق تحبين أكله لكن للأسف لا تجدين عمله؟
14. القريتلية نموت عليها للاسف منعرفش نديرها كتر خير امي الي ديرهالي
    
15. طبق أكلته وتمنيتي أن تتعلمين طريقته؟
16. لازانياااااااااااااااااااااا
    
17. اسهل طبق تعلمتيه؟
18. العجين ومشتقاته كما التريدة تاع الموس وتاع الطاجين الشخشوخة والمحاجب
    
19. اصعب أكلة عملتيها؟
20. الشخشوخة البسكرية من العجينة والمرقة تاحا
    
21. اصعب موقف حصل معاكي بالمطبخ؟
22. لما كنت عروس وطبختلهم الكسكسي بما انو اهل زوجي قبايل من جيجل يحبو الكسكسي بالزيت زيتونة وانا مدرتش فيه معلاباليش درت الزبدة جاهم سامط واحد مكلالالالالالاه ملتم ختكم ولات دير الزيت وتكترررررررررررررر بصح انا منكلش معاهم
    
23. مقف مضحك حصل معاكي بالمطبخ؟
24. هههه منساهش طول حياتي امالين راجلي راحو للعرس وانا بقيت وحدي في الدار قلت ندير شويا تاع لابيري مهم حطيت البطاطا تتشرشم عيطلي راجلي في السكايب لانو مسافر بقيت نحكي معاه ونسيت البطاطا ونشم في ريحة الشياط ونقولو كاش جارة تحرقلها غداها ونسيت وانا نحكي حتا قالي اني رايح نتغدا ونتي واش غداك باش تفكرت البيري وصدقوني اول مرة شفت بطاطا محروقة وغاضتني الكاسرول جديدة ولات فحمة بصح مقلتلوش وزربت حكيت الكاسرول قبل مايجيو مالين الدار هههههههههه منعرف خيابة ولا تفنيين
    
25. أكثر من يحب طبخك؟
26. كاين بزاف ناس سورتو راجلي
    
27. واكثر من ينتقده؟
28. عجووووووووووووووووووووووووووووووووووووووزتيييييييييييييييييييييييييييييي
    
29. عندما تطبخين تلتزمين بالوصفة عادة أو تكون فيها دائما لمسة ابداعية منك؟؟
30. لا ساعات والله نزيد حوايج والا نقص حوايج
    
31. تحبين تجريب كل ما هو جديد من وصفات أو انك تفضلين عمل المضمون من الوصفات فقط
32. لا انا نحب نجدد في وصفاتي
    
33. بارك الله فيكي يا ام امين على الموضوع هااااااااااايل تتاضر جديدك
    

 

[ام انس الحبيب]

ايمان يظهر من اجابتك انك فنانة في الطبخ ولكن عندما تكون حالتك النفسية او فلنقل المزاج عالي على راي المصريين
ام رحاب وام ريهام وام انس الحبيب واضح جدا تفننكم وحبكم للطبخ وفعلا ام رحاب احيانا الاولاد يمللوك ويتعبوك حتى تعودي مادابيك ما تدخليش المطبخ ولا تستمتعي بعملك لكثرة طلباتهم
اسعدتموني جميعا بمروركن وتجاوبكن مع الموضوع راح ادور عضوات جدد واكيد الي تدخل من غير عرضة اكون شاكرة جدا لها مرورها

الله يسعد ايامك اختي ام امين
و من غير مجاملة موضوعك جميل و قيم و
يستاهل الاهتمام دمتي مبدعة
​

 

[أم أمين23]

اهلا ريمو نورتيني حنونة واكيد مع الوقت راح تتعلمي اكثر ولو انك شاطرة يعني رغم انك تدرسي بصح راكي تعرفي حوايج ماشاءا لله واكيد بالتعود تصبحين افضل واشطر طباخة اكيد
صونيا يا صونيا يعني انت مواقفك كلها مع الي مالازمش تغلكي قدامهم خخخخ او لازم تعلق العجوز الا ما علقتش هي شكون حابة يعلق على طيابك حنونة وانت قوليلي تعرفي اديري الصعيب واسهل حاجة الي هي اللازانيا ما تعرفيش اديريها والله ماكاين ما اسهل منها
ام انس الحبيب الله ابارك فيك اخيتي مشكورة على التشجيع وبارك الله فيك على المتابعة
جاري البحث عن عضوات جديدات والشكر مجدد لكل من مر بموضوعي وتابعه

 

[أم أمين23]

حنونتي زهور اسمحيلي نسيتك اكيد راني نستنا في مرورك ومشاركتك يا الحلوة ما اطوليش اوك

 

[joumane]

موضوع رائع لي عودة ان شاء الله

 

[SONYA25]

اهلا ريمو نورتيني حنونة واكيد مع الوقت راح تتعلمي اكثر ولو انك شاطرة يعني رغم انك تدرسي بصح راكي تعرفي حوايج ماشاءا لله واكيد بالتعود تصبحين افضل واشطر طباخة اكيد
صونيا يا صونيا يعني انت مواقفك كلها مع الي مالازمش تغلكي قدامهم خخخخ او لازم تعلق العجوز الا ما علقتش هي شكون حابة يعلق على طيابك حنونة وانت قوليلي تعرفي اديري الصعيب واسهل حاجة الي هي اللازانيا ما تعرفيش اديريها والله ماكاين ما اسهل منها
ام انس الحبيب الله ابارك فيك اخيتي مشكورة على التشجيع وبارك الله فيك على المتابعة
جاري البحث عن عضوات جديدات والشكر مجدد لكل من مر بموضوعي وتابعه

وا لله يا ام امين مرة كليتها في ريسطورون صدقيني مهما نديرها متجيش كما الي كليتها