بيت المغتربين

السلام عليكم في الجزء التاني من مسلسلنا
بعد قرار السلطات العليا بضرورة تغيير محل الاقامة وبضرورة صياغة سيناريو جديد لان الجزء الاول امتلا بالاحداث التي اثقلت كاهل المتابع
وعليها هادي نسختنا الجديدة لخلونا نتعارفو والتي ستحمل اسم بيت الغتربات لاننا خلاص تعارفنا وهنا سنستقبل الضيوف الجدد ونحكي عن مشاكلنا وهمومونا في الغربة
فحللتم سهلا ونزلتم اهلا
على بركة الله ندخلو الدار الجديدة وكل واحدة تجيب معاها حاجة ما نسخقوش اليدين الفارغين
وهاو ليكم الباب والمفتاح

 

[رنيم الغربه]

جهاد راني مع العشا و نوجد في حوايج لولاد بسكو دروك نروح نجيب البنت و نديهم للابيسين .
ام ندى تفضلي الضياف نقعدوهم هنا

و صحاب الدار يقعدو غير هنا .

يا اختي انا جيبيلي يا لوكان هيدورا ههههههه و ماشي هدي في حياتي ما كرهت حاجه كيما هدي توووووووووووووجع:dunno01::cray02: خليني نقعد شووووووووووويه مع الضيفه :p:tongue02:

 

[lina-67]

رنيم هذي الطريقة تاع ام الحلوين
انا نحط عيني ميزاني ،نقلي اللحم و (البصل و الزرودية و القرعة و البطاطا و الطماطم نقطعوهم كبار و مرات نضيف الفلفل الاخضر لان بنتي ماتاكلوش و نقول في الحريرة مايبانش و الكرافس ادا كان عندي ) و الزيت و نزيد الملح + الفلفل+راس الحانوت+قرفة لازم+سكنجبير+فلفل احمر حلو و نقلي و نزيد ربطة قصبر و معدنوس و نعناع لازم و نزيد الطماطم مصبرة ماشي بزاف مانحبهاش حمرة بزاف و حتى الزين و نمرق بالما سخون و كي يطيب اللحم نحيوه مع الربطة تاع الحشاوش و نميكسي الخضار مع المرق و نزيد 5 مغارف (تشيشة او فريك) و نخليه يطيب و نحي العظم من اللحم و نرجع اللحم للقدر حتى تطيب التشيشة ثم نجيب طبسي كبير و نحط فيه ( قصبر و معدنوس مقطعين و القرفة و الفلفل الاسود ادا كانت ماشي حارة و 2 مغارف زيت و 2 مغرف خل او عصير القارص و نخلطوهم )و نجيبو غراف تاع حريرة و نخلطو مع المواد السابقة و نرجعو في القدر نحرك 2 د ثم نضيف 2 اغصان تاع نعناع و طفي و كليها بصحتك .

 

[رنيم الغربه]

mmmmmmmm tban hayla inchalah nsseyiha

 

[مريومةمم]

صباح الخير لبنات رنومة مع سمورة صبحتو مبكرين الله يبارك
ام الحلوين حنونة كي راكي و كي راهم الوليدات و الزين
جهاد مازلتي تتشهاي ؟ واش راكي متشهية هاد ليامات
جمان راحتلك الخلعة شوية ؟ و داركم خبرتيهم و لا لا ؟
ام امين و معاذ كي راهم الدراري ؟
مريومة ان شاء الله تكوني بخير و ربي يعطيك ما تتمناي
سمورة راكي منورة تحت المجهر
فطومة سلمي على سرسورة و حوسي حقك و حقي
ايمان حنونة انتي جديدة فالغربة عندك غير 04 اشهر وقتاش راكي معولة تهبطي للبلاد باش تنحي على روحك شوية وحش

سلالالالام لجميع وش راكم راني مزروبة ظربت طلة خفيفة برك
غدوة نقعدلكم

 

[ام الحلوين]

سلام بنات
رنيم تفضلي يا لحبيبة ارواحي عندي راه عندنا الحال دافي و نفرشلك هذي الهيدورة تاع كبش 2012 راهي جديدة و نفرشها غير للعزيز عليا هههههه.

 

[ام الحلوين]

جهاد طيبتي العشا و لا مازال ؟
انا عشايا راه طايب و غير جبت لولاد دوشتلهم و درت الحوايج في المشينة .

 

[lina-67]

ام الحلوين كتبتي بالاحمر القرفة لازم و النعناع لازم وانا ما عنديش النعناع!!!!!!!!!! ودرتها بلا نعناع ما نعرف كي تجي :p

 

[lina-67]

درت معاها لي شوصون مازال ما طيبتهمش

 

[ام الحلوين]

جهاد عادي حنونة حتى انا مرات مانديرش بصح تاع ضياف لازم ندير .
و حتى انا نحب معاها بوراك و لا لي شوصون و لا ميني بيتزا ،ان شاء الله تخرجلك مليحة و بصحتك مسبقا .

 

[أم ندى]

اهلا و سهلا بيك اختي ام ندى نورتينا و شكرا على سباقيتي ايطاليانو مممم يشهي
لبنات واش راكم مقيلين

وبيك اهلا جهاد

النور نوركم والمكان راه منور بصحابوا


بصحتكم كيما قاتلك الاخت ام الجلوين كنا نوجودو في لعشا وانا اليوم درت محاجب بطريقة مختلفة لا حبيتو نحطلكم لافوتو

 

[أم ندى]

ام ندى تفضلي الضياف نقعدوهم هنا

و صحاب الدار يقعدو غير هنا .

الله الله عليك يا حببت والديك

وشي هذي القعدة نتكسل ونعاود لجماعة راهي مضيفتني صح

بصح هوما مساكن لاه قعدتيهم في نتاع النيلو تجيو معايا ولا نجي معاكم خيري واختاري متحلاليش القعدة بلا بيكم

شكرا على الحفاوة ام الحلوين

 

[أم أمين23]

اهلا بام ندى واخيرا بانت وحدة من ايطاليا مرحب وسهلا بيك وين راكي في ايطاليا ؟؟ هكا نفيدو بعضانا احنا ثاني ماشي غير الالمانيات والفرنسيات هههههههههههه

 

[أم ندى]

اهلا بام ندى واخيرا بانت وحدة من ايطاليا مرحب وسهلا بيك وين راكي في ايطاليا ؟؟ هكا نفيدو بعضانا احنا ثاني ماشي غير الالمانيات والفرنسيات هههههههههههه

بيك اهلا حنونة

ما تخافيش ربي ما فيه غير الخير قلك ينقطع قسم يجي قسم


راني في ريمني مقاطعة ايميليا رومانيا ونتي وين راكي؟

ايه راني هنا وش احتجتي قوليل والعكس نعوضك على ليامات الي فاتو اكل

 

[رنيم الغربه]

سلام بنات
رنيم تفضلي يا لحبيبة ارواحي عندي راه عندنا الحال دافي و نفرشلك هذي الهيدورة تاع كبش 2012 راهي جديدة و نفرشها غير للعزيز عليا هههههه.

ميرسي يا عمررررررري رتكي تهايتي فيا سي نون نبهداك مع الضيفه ههههههههههه

 

[رنيم الغربه]

ام ندى بارك الله فيك ياالا حطينا نشوفو انا راهم في بالي ان شاء الله نديرهم و بصحتكم حنونه

 

[أم أمين23]

بيك اهلا حنونة

ما تخافيش ربي ما فيه غير الخير قلك ينقطع قسم يجي قسم


راني في ريمني مقاطعة ايميليا رومانيا ونتي وين راكي؟
ايه زرتها هادي 3 سنوات الور شحال مليحة دارو فيها تجمع للجالية الاسلامية ورحنالها اول واخر رحلة رحتلها ههههه وعندي تصوار وين بلاصة الفنادق الي على البحر شحال هايلين فور بالبزاف

ايه راني هنا وش احتجتي قوليل والعكس نعوضك على ليامات الي فاتو اكل

الله اخليك حبوبة رانا بعاد بيناتنا واحد 5 سوايع انا راني في ترانتو ان شاء الله حبوبة ربي يفرحك

 

[ام الحلوين]

ام ندى اليوم راكي ضيفة لازم نقعدوك في الصالون و في البلاد يقولو الضيف 3 ايام و هنا في الغربة غير يوم بسكو يقولو ليزيمقري مشحاحين ههههههههه ، و من غدوة ان شاء الله تولي معانا في الحصيرة و الهيدورة هههههههه.
رنيم خلي ختك ان ندى تقعد حداك في الهيدورة .

 

[أم ندى]

ام ندى بارك الله فيك ياالا حطينا نشوفو انا راهم في بالي ان شاء الله نديرهم و بصحتكم حنونه

وفيك بارك الرحمان

اوك هام ليك ولكان عجبوك غدوة نحطهم في موضوع خطراكش راني صورت كل الخطوات






الله يسلمك حبيبتي

 

[أم ندى]

الله اخليك حبوبة رانا بعاد بيناتنا واحد 5 سوايع انا راني في ترانتو ان شاء الله حبوبة ربي يفرحك

ايه تقصدي البولفار الي على البحر الادرياتيكي اروع ما في المدينة وهي مدينة سياحية فيها الاف الاوتيلات


ويخليك عزيزتي طورينطو بعيدة عليا بصح دام تسكن فيها اختي فهي اقرب الي من نفسي

فاللحب في الله يختصر كل المسافات وان كانت بعيدة

 

[أم ندى]

ام ندى اليوم راكي ضيفة لازم نقعدوك في الصالون و في البلاد يقولو الضيف 3 ايام و هنا في الغربة غير يوم بسكو يقولو ليزيمقري مشحاحين ههههههههه ، و من غدوة ان شاء الله تولي معانا في الحصيرة و الهيدورة هههههههه.
رنيم خلي ختك ان ندى تقعد حداك في الهيدورة .

هههههههههههههههههههه

اضحك الله سنك مساكن ليزيميقري شايعة عليهم مشحاحين وهوما اقتصاديين برك من الغربة

بزاف يديرو الف حسب للصوردي كيما تقولها جدة ربي يذكرها بخير