جميع وصفات عضوات ماذا ستطبخين اليوم سيدتي

[rose09000]

رد: جميع وصفات عضوات ماذا ستطبخين اليوم سيدتي

الرقاق أو الفطير لندى242008​

لمرقة اولا تحطي الما يغلي في طنجرة وتقطعي الخردل يعني اللفت الى دوائر وتحطيه يطيب في هذاك الما حتان يطرى واذا عندك فول اخضر حطي يطيب معاه بعد ماتقشريه // انا ماعنديش
وتوجدي في صحن اخر ترابي 4 فصوص ثوم وشوية زيت وملح وفلفل احمر حار و2 الى 3 م ك طماطم مصبرة وحبة طماطم مرابية وتخلطيهم مليح
كي يطرى الخردل لوحي التوابل والطماطم وحركي كي تغلي شوي
جيبي 3 الى 4 مغارف كبار فرينة حليها في شوي ما ومن بعد لوحيها في الطنجرة وغلطي مليح باش مايجوكس كعابر فرينة هههه ولوحي فلفلات خضر حارين كي تخثار اعصري عليها نصف حبة قارص وطفي
ومن بعد قدميها حطي الكسرة وسقيها وزينيها بالمعدنوس والزيتون تجي هايلة
--

 

[rose09000]

رد: جميع وصفات عضوات ماذا ستطبخين اليوم سيدتي

روز بالكروفات لندى242008​

في طنجري ترابي 3 الى 4 فصوص ثوم مع شوية زيت وملح وفلفل اكحل وفلفل احمر حار تقليهم لمدة دقيقة ومن بعد تضيفي حبة طماطم مرابية و م ك الى 2 طماطم مصبرة وتمرقي بنص كاس ما كي تغلي لوحي الكروفات وغطي عليها على نار متوسطة لمدة 5 دقائق راهو يطيب في ساع وكون تكثري في طيابو ينشف وتروح بنتو
الروز نحمصو في شوية زبدة ومن بعد نكيل كاس روز بسمتي بزوك كيسان ما دافئ وم ص ملح وورقة رند كي يهز الغلية حطيه على نار هاااااااااادئة وخليه حتان ينشف خلاص ومن الاحسن تطيبيه في طنجرة تكون متلصقش وثقيلة يطيبلك الروز مليح ولا كان تحبي فوريه
وفي الاخير قدمي الروز مع الكروفات مع رشة معدنوس

 

[rose09000]

رد: جميع وصفات عضوات ماذا ستطبخين اليوم سيدتي

فطر محشي لأنييسة13​

تاخدي حبات الفطر الطازج اللي تكوني شريتيه من السوق تغسليه مليح وتقطريه وتنحيلو الرجلين (الساق) وتعمري قلوب الفطر اولا ب fromage fondu باه يدوب ( la vache qui rit او اي نوع تحبي ) وفوق طبقة الفرماج تحطي لحم مفروم عمليه على شكل قبة (اللحم خضر ماشي طايب ) وفوق القبة هادي حطي روندال تاع fromage de chèvre او اي نوع تحبي .
المشكل فطيابو لازم تحطي شوية مرقة مع حبات الفطر انا ماكانش عندي عملت شوية ما خلطتو بحبة جومبو وفرغتو فالمول وحطيت حبات الفطر بصح ماتكثريش المرق فقط 1 سم تاع علاوة ومدة الطبخ 25 د اقصى مدة

 

[rose09000]

رد: جميع وصفات عضوات ماذا ستطبخين اليوم سيدتي

مقرون رشتة لندى242008​

انا درت كيلة صغيرة كتجربة
2 بيضات و م ص ملح و 2 م ك ماء وتقدري تضاعفي المقادير
تخلطي البيض والما والملح وتضيفي الفرينة حتان تتحصلي على عجينة ماتتلاصقش
تقسميها كريات وتحليها في ماشينة البقلاوة على الرقم 6 ومن بعد 4 ومن بعد 2
وترشي الفرينة مليح ومن بعد تفوتيها في لي تقطعها شرائح
و بعد التقطيع رشي عليها الفرينة وانفضي باش ماتلصفش في بعضاها
وطيبيها عادي كالمقرونة غلي الما وديري شوية ملح وزيت وحطيها تغلي
ومن بعد صفيتها وجمرتها في لاصوص

 

[rose09000]

رد: جميع وصفات عضوات ماذا ستطبخين اليوم سيدتي

خبز الدار لندى242008​

350 غ فرينة ملعقة كبيرة ونصف خميرة خبز + 2 مغارف كبار سكر تقدري تنقصي كان ماحبيتيهش حلو ديري مغرف واحدة
و فنجان زيت وكاس ونص حليب فاتر و 2 بيضات ونص كاس ما زهر وملح
تبسي الفرينة بالزيت ومن بعد تضيفي بقية المكونات والعجينة تكون تتلاصق لانو فيها البيض ماتتيبسيهاش ياسر خليها مرخوفة وغطيها بغلاف بلاستيكي حتان تخمر
ومن بعد فشيها وادلكي شوي وحطيها في مول مدهون بالزيت ومرشوش بالفرينة بالشكل لي تحبيه قرصة او ظفيرة وادهنيها بصفار بيض + شوية خل ورشي بالسينوج ولا جلجلانية وحطيها تخمر مرة ثانية ومن بعد دخليها لفور مسخن مسبقا على 200

 

[rose09000]

رد: جميع وصفات عضوات ماذا ستطبخين اليوم سيدتي

دجاج محمر لتدى242008​

الدجاجة تبلتها كيما الشوارما جات هايلة
وجدت التتبيلة رابيت نص راس ثوم + 2 م ك زيت + م ك خل + ملح وفلفل اكحل وكمون وشوية راس الحانوت و 2 م ص موطارد + 2 م ص طماطم مصبرة و م ص عسل ( تمد طعم هايل بلا ماتمد الحلاوة )
مسحت بيه الدجاجة مليح وخليتها منقوعة فيه لمدة نص ساعة
ومن بعد ربطتلها رجليها بالخيط وحطيتها في طنجرة الضغط مع كاس ما سخون وغلقت الطنجرة حتان نقصت كمية الما ويقات حوالي فنجان
ومن بعد دهنتها بالزبدة ودخلتها للفور بلاصوص لي معاها
قطعت البطاطا دوائر وقليتها ومن بعد حطيتها تتحمر مع الدجاجة

 

[rose09000]

رد: جميع وصفات عضوات ماذا ستطبخين اليوم سيدتي

كريمة ترتولات لندى 242008​

درت حبة بيض + مغرف كبيرة ونص سكر + فاني + مغرف كبيرة ونص نشا وخبطتهم مليح
وسخنت كاس حليب على النار ومن بعد رجعت خلطتو بالبيض ووو
ورجعتها للنار حتان خثار بصح مش ياسر تبقى شوي ليكيد باش ماتجيش ناشفة خطراه كي تبرد راهي تزيد تجمد و من بعد نحيتها من الكسرونة ودرتلها مغرف زبدة وبقيت نخبط فيها جات هاايلة وخفيفة

 

[rose09000]

رد: جميع وصفات عضوات ماذا ستطبخين اليوم سيدتي

صبيعات الكورجات لراجية العفو​

رآبي كورجآت في الوصفة حآطين 4 أنآ درت غير 2 وجآت يآسرة
وضفي ليهآ 1 م ك شآبلير + قطعة مليحة فرمآج تآع ميزآن + لحم مرحي
طآيب نص طيآب أنآ درت جآج طآيب وفتته + معدنوس + ثوم + توآبل
وخلطي مليح وزيدي بيض انآ جآتني 1 يآسرة وكفآتني
شكليهم صبيعآت ورمديهم في الفرينة وغطسيهم في البيض ثم شآبلير
وقليهم ثم رجعيهم في المرق تآع الجلبآنة أو أي صوص وخليهم على نآر خفيفة
لدقآيق برك

خبز الدار لراجية العفو​

2 بيض + 1ك حليب + 1م ك سكر + ملح + 1م ك خمآرة خبز + 1/2 فنجآن زيت
+ رطل فرينة و 1/2 بآكي خمآرة تآع قآطو
خلطي الموآد السآئلة مع بعض والجآفة لوحدهآ وفرغي السآئل على الجآف ولميه
وخبزيه في صينية دهنيه بصفآر البيض وجلجلآنية وخليه يخمر 2سآ
وطيبيه

 

[rose09000]

رد: جميع وصفات عضوات ماذا ستطبخين اليوم سيدتي

مطلوع الزيت لكريمة تاتي​

.هذوك المر بعات احنا نقولولهم مطلوع الزيت لانو يتعجن كيما هو ديري عبار اللي حبيتي سميد رقيق او تقدري تخلطي كيلة سميد و شوي فرينة ، خميرة الخبز و الملح مع الاول مدريش العجينة جارية اعجني و اقعدي زيدي في الماء ديريه كيما عجينة المطلوع سواسوة من بعد رمديه في السميد او في الفرينة كيما تحبي. انا رمدتو في السميد تحليه كيما المطلوع ديريها شوي رقيقة ماشي بزاف و ماشي تاني خشينة خليها تخمر و قطعيها مربعات و كي تكوني تقليها ارمي عليها الزيت باش تتنفخ و جيك فارغة من الداخل ان شاء الله نكون شرحت مليح. </b></i>

 

[rose09000]

رد: جميع وصفات عضوات ماذا ستطبخين اليوم سيدتي

التحلية لبرنساس فيفي​

3قطع بريوش 4 حبات بيض كاس سكر نصف كاس زبدة دايبة نصف كاس حليب مغ كبيرة خمارةولفاني
تخلطي كل شيء مع بعض وتضيفي لهم البريوش مقطع وتفرغيها في البلا فيه الزبدة وديريها اتطيب في اسفل الفرن حتى تحمارو كي تخرجيها ديرلها اي صوص تحبي شيكولة ولا كراميل ولااي شيء عندك

المعجنات لبرنساس فيفي​

درت حبة بيض نصف كاس زيت ومغ زبدة 2 مغارف لحظة مغ سكر مغ صغيرة خمارة تاع الحلوى مغ كبيرة خميرة الخبز زعتر وحبق يابس و3 كيسان فرينة
خلطي كامل النواشف وزيدي لهم البيض وزبدة والزيت اعجني بالماء حتى تنطم العجينة غطيها وخليها ترتاح
شكليها كيما تحبي واعمريها كيما تحبي انعملت لحم مرحي مع بصل ومعدنوس قليتهم وزدتلهم البيض والفرماج وكي شكلتها مسحتها بالبض والحليب الجلجلان باش تحمار مليحوالفرن يكون سخون من فبل بش تتنتفخ وتجي خفيفة من الداخل

 

[rose09000]

رد: جميع وصفات عضوات ماذا ستطبخين اليوم سيدتي

حوتة كوشة لأم أماني05​

نرحي ثوم بزيادة+معدنوس مقطع عصير ليمون +فلفل اسود+فلفل احمر +طماطم مركزة+شوية هريسة+كمون+شوية زيت نشرح الحوتة بالسكين ونتبلها مليح من الافضل نخليها عدة ساعات في الثلاجة ناخذ المول نفرشو بالبطاطا مقطعة دوائر ثم نحط الحوتة ونضيف شوية ماء للتتبيلة لبقات ونفرغها عالبطاطا نحط ورقات رند من فوق ودوائر الطماطم والبصل انا ماحطيتش البصل مايحبوهش اولادي نغطيها بورق الالمنيوم وندخلها للفرن تجي يمي يمي

 

[rose09000]

رد: جميع وصفات عضوات ماذا ستطبخين اليوم سيدتي

بيتزا لندى242008​

العجينة كالعادة عجينة ال 10 دقائف نعجنها ونغطيها بساشي ونخليها تخمر
ولا صوص نديرها متوسطة مش خاثرة تبقى غير طراف طماطم باينين ولا سائلة ياسر تبل العجينة
وهذي صورتها ونديرلها رشة صغيرة زعتر
العجينة نحلها بسمك رقيييييق حوالي 2 ملم
نغطيها بالصوص طوماط والزيتون و اذا كاين طون او...
الفرماج دايما نستعمل روج او قريار او gouda
تاع ليوم درت فرماج روج وطيبتو مع العجينة عادي
وطبعا قبل مانبدا نحل في العجينة نشعل الفور على 220 درجة
وبعد ماتوجد البيتزا ندخلها للفور ونقصو الى 200 ونراقبها من 5 الى 10 دقائق تكون واجدة لانها رقيقة والفور سخون وهذا سر نجاحها .. خطراه كون تكون خشينة والفور متوسط الحرارة تطلع وتخمر وتعود خبزة بالطماطم
ومع تخرج نحيها من البلاطو باش ماتطراش ياسر
هذا مافيها يعني مش سر كبير بصح كون تبعي الخطوات تنجحلك

 

[rose09000]

رد: جميع وصفات عضوات ماذا ستطبخين اليوم سيدتي

شرميلة الخضر لأمة الرحمن​

حبة بصل كبيرة - حبة باذنجان مقشر - حبة جريوات أو قرعة - فلفل حلو - فلفل حار حسب الرغبة - طماطم حب وشوية مصبرة
-ثوم بزيادة مقطع رقييق - شوية معدنوس - وزيت ومن الأحسن زيت الزيتون بزيادة شوية - ملح وفلفل أكحل فقط

الخضر كامل يتقطعو نفس الحجم نزيدولهم الزيت والطماطم ونخلوهم يتقلاو مليح على نار قليلة شوية هكذا نزيدو الثوم والمعدنوس ونخلو كل شيء يطيب على نار هادئة مانضيفوش الماء
ولازم تكون شوية المقلة ولا القدرة ثقيلة ونحركوها منين ذاك باه ماتلصقش وأصلا ماطولش في الطياب

ثاني تقدرو تزيدو البطاطا في الأخير لأنها ماطولش في الطياب
أنا ساعات نكون مزروبة نديرها في كوكوطة و نزيدلها شويية ماء ونغلق عليها طيب ليه ليه تجي ثاني مليحة
بصح الى تطيب على نار قليلة تجي ألذ

 

[rose09000]

رد: جميع وصفات عضوات ماذا ستطبخين اليوم سيدتي

الدونات لندى242008​

لدونات خفاف وهايلين بصح السر تاعهم انك في البداية تسخني الزيت مليح ومن بعد تنقصيه وتطيبي بالحبة باش تحافظي على نفس درجة الحرارة واصبري عليها تطيب بالشوي خطراه كون تقوي النار تحمار بلا ماتطلع مليح
الوصفة
150 ملل حليب
4 مغارف كبار سكر
40 غ زبدة وتحطيهم على النار حتان يعود الحليب فاتر وتضيفي مغرف كبيرة خميرة خبز ومن بعد تكسري حبة بيض عليهم + فاني وتخبطي مليح وتضيفي الفرينة مع رشة الملح حتان تتحصلي على عجينة تشبه لتاع البيتزا
تخليها تخمر ومن بعد تحليها وتقطعيها الى دوائر على شكل الدونات وتخليها تخمر مرة ثانية
ومن بعد تقليها في زيت غزير كيما فهمتك في درجة الحرارة
وتزينيها بالشيكولا مذابة مع شوي حليب وزبدة على حمام مائي

 

[rose09000]

رد: جميع وصفات عضوات ماذا ستطبخين اليوم سيدتي

بسكوي غولي لراجية العفو​

الكريمة هي
بول تآع مآ + 8 م ك سكر فوق النآر يغلي 5د
وفي وعآء آخر نذوب 4 م ك نشآ مع 8 م ك مآء نبعد السيرو على النآر
ونضيف عليه خليط النشآ ونرجعه فوق نآر خفيفة مع الخلط حتى يتمآسك
نخلوه بجيهة حتى يبرد تمآمآ ونضيفوا له 150غ أو 180غ زبدة مقطعة
قطع نضيفوهآ على مرآت متقآطعة مع الخلط بأقصى سرعة وكلمآ زدنآ خلطنآ
بالبآتآر أكثر كل مآ زآدت الكريمة تبيآض أكثر حتى نتحصل على الكثآفة
اللي حآبينهآ وهآهي الصور توضح لكم الطريقة بكل تفآصيلهآ
ونرجعوا للبسكوي نحضر بسكوي عآدي ولمآ نخلطه ننزع ملآعق من الخليط
ونضيف لهآ كآكآو ونضعهآ في كيس ونشكل أشكآل على ذوقنآ فوق ورق الزبدة
اللي رآيحين نطيبوا عليه البسكوي
(هآذ الفكرة أخذتهآ من الأخت أم رآمي يعطيهآ الصحة هي شكلت أشكآل أخرى)
وانآ شكلتو بشكل ميل فآي ثم نفرغ عليه خليط البسكوي الأبيض ونطهيه
لمآ يبرد ننزعه من الورق وشربتو بالسيرو وحطيتلو كريمة أضفت لهآ كآكآو
ومن بعد قصيت شريط من البسكوي وحطيته فوقه في بدآيته ولفيت عليه
البسكوي وتركته في الثلآجة يجمد ثم قطعته دوآئر والجوآنب حطيتلو ورود
كريمة وفي الوسط شكولآطة سودآء ذآئبة

 

[rose09000]

رد: جميع وصفات عضوات ماذا ستطبخين اليوم سيدتي

شرائح الخض بالجبن لأنيسة​

حبة بادنجال
حبة قرعة
حبة طوماطيش
حبة بصلة
حبة فلفل ماشي مشوية
قطعيهم دوائر
جيبي صينية تاع الفور ستفي فيها الخضر ماعدا الطماطم برسكو تدبل خفيف
رشيهم بملح وفلفل كحل وقطري عليهم شوية زيت زيتون ودخليهم للفرن يدبالو
مين تخرجيهم خودي مول تاع زجاج دهنيه بالزبدة وحطي
طبقة بادنجال هي الاولى ثم بصل ثم قرعة ثم جبن ثم طماطم ثم فلفل ثم بادنجال ثم جبن مبشور
انت حرة ضعي الطبقات كيما تحبي المهم الطبقة الاولى والاخيرة يكونو بادنجال وبين الطبقات تحطي فروماج انا حطيت موزريلا
من بعد دخليهم الفرن يدوب الفروماج وخرجيهم
هاهي الصور توضحلك

 

[rose09000]

رد: جميع وصفات عضوات ماذا ستطبخين اليوم سيدتي

لي كراب المالحبن لإبتسام​

لحم مرحي طيبتو مع الملح وفلفل اسود كي طاب خليتو برد حطيتلو الفرمان موزدارلة والتشيدر مع ويتون انا ماحطيتش لانو لابنات مايحبوش الزيتون
من جهة اخرى تسخني الماء تقطعي البصل والمعدنوس خلي غير يدبال او ضفيه الى اللحم
عمري بالوحدة ولفيها حطيها في البلاطو الى ان تنتهي
تكوني حضرتي لابشامال والصوص طوماط بالزيت الزيتون والصلصة الطماطم والتوم
حطي الصوص هو الاول من بعد البيشاميل والفرماج

 

[rose09000]

رد: جميع وصفات عضوات ماذا ستطبخين اليوم سيدتي

البسبوسةلبوح المشاعر ​

انا ندير 4 بيضات + كاس حليب+كاس زيت + كاس سكر + 2 فانيلا + 1 خميرة
انا هنا تاني استعملت ملون غذائي بلون اصفر باه يجيني لونها مليح
خلطت كل شيء البيض و السكر ومن بعد ضفت الزيت ومن بعد لحليب
ونخلط مليح ومن بعد نضيف لخميرة ولفاني ومن بعد ندير السميد يكون احرش شوي
يعني على حساب عينك ومن بعد دخلتها للفرن كي قريب طيب خرجتها
درتلها لبيستاش باه يشد ورجعتها تكمل طيابها وكي خرجتها
سقيتها بالشربات ديراكت
والشاربات انا نطيبها من قبل و نخليها تبرد وكي نخرج لبسبوسة
نسقيها بيها يعني الشاربات باردة والبسبوسة سخونة

 

[rose09000]

رد: جميع وصفات عضوات ماذا ستطبخين اليوم سيدتي

ترقاد الزيتون لندى242008​

لزيتون نديرو تقريبا كل عام نبدل الما كل يوم طبعا بعد ماتشقيه بالموس اذا مزروبة شقيه الى 3 شلطات واذا نص نص ديري 2
وبدلي كل يوم واغلقي عليه مليح كون يبقى مش مقفول اليبيدون يفسدلك ويديرلك الرغاوي
وكي تذوقيه وتلقاي المرارة راحت ديريلو القارض مقطع الى دوائر وزرودية مقطعة ورند وثوم وكاينين حتى لي يديرولو حبات تمر يزيدلو في الحلاوة وشوية خل
كون ديري خل ساك يجيك طري مرخوف .. خلطي خل وقارص

ترقاد الزيتون لبوح المشاعر​

نشلطو الزيتونة من زوج جيهات باه كي ديريها في

الماء تخرج لمرارة ديالها كي نكمل نشلطوها الزيتون

نحطوه في الماء و تغلقي عليه لمدة 3 ايام ومن بعد تفرغيلو

الماء تاعه كامل و تبدليلو ماء جديد و تزيدي تخليه 3 ايام اخرى

و من بعد تعاودي تبدليله الماء و في هذا المرة ديرو الماء وداويه

يما دير الماء والملح تكثر شوي خاطر الزيتون يشرب الملح

و الخل مليييح تاني و تقص شوي قارص و الرند و تاني دير

حبات سنارية تقصيها كيما تحبي مربعات ولا طويلة

وتغلقي عليه متفتحيهش خلاص ولازم مايقيسوش

لهواء حتى يدير 20 الى 25 يوم و تفتحيه تجبدي منه وتاكلي

و كي تجبدي تعاودي تغلقي عليه على لهواء برك

 

[rose09000]

رد: جميع وصفات عضوات ماذا ستطبخين اليوم سيدتي

مسكوتة لندى242008​

5 بيضات
8 مغارف سكر
فاني
كاس تاي زيت
3 مغارف كبار معمرين لحظة
كاس تاي ما // زعمة في بلاصة الحليب
10 مغارف كبار فرينة
2 خميرة حلوى
رشة ملح