تقديم دروس في صنع الحلوى لي تحب تتعمل تتفضل

[nissma34]

ربي يبارك فيك يا أحلى نسمة
حبيت نجرب بقلاوة القطايف، كيفاش حتى يجي أرتب و هش من فوق ماشي يابس ،نشامخ القطايف بالزبده أو الزيت ؟
جزاك الله كل خير

رشي القطايف بالسمن او الزبدة مليح وفرشي طبقة في بلاتوا
ديري الحشو زي تاع البقلاوة العادية وغطي بطبقة اخرى من القطايف وعاودي رشي بالسمن طيبيها وعسليها بشربات خفيفة لما تعسليها مليح جيك طرية وفي نفس الوقت مقرمشة
نتمنى جربيها وحطي التطبيق
تقدري حتى طيبيها في مقلاة من وقت لوقت دوري المقلاة باه تحمار كي طيب على جهة اقلبيها على الجهة الاخرى

 

[عاصمية]

فكرة رائعة شكرا جزيلا

 

[assia2007]

ربي يحفظك اختي نسمة تعلمت حوايج بزاف منك ربي يخليك

 

[nissma34]

ربي يحفظك اختي نسمة تعلمت حوايج بزاف منك ربي يخليك

الله يعزك والله فرحتيني

 

[meimeifati]

سلام
مشكورة اختي نسمة على المخبز ما علاباليش بلي يتخدم ايضا بالكاوكاو
و البنسبة للكيس انا استعمل الابر الطبية باش نعمل خطوط اسهل طبعا تكون جديدة غير مستعملة
و شكرا

 

[بلبلة سطيف]

من فضلك عزيزتى لما استعمل البقلاوة استعمل اللوز بدون قشور او بقشوره احسن

 

[lina20]

رشي القطايف بالسمن او الزبدة مليح وفرشي طبقة في بلاتوا
ديري الحشو زي تاع البقلاوة العادية وغطي بطبقة اخرى من القطايف وعاودي رشي بالسمن طيبيها وعسليها بشربات خفيفة لما تعسليها مليح جيك طرية وفي نفس الوقت مقرمشة
نتمنى جربيها وحطي التطبيق
تقدري حتى طيبيها في مقلاة من وقت لوقت دوري المقلاة باه تحمار كي طيب على جهة اقلبيها على الجهة الاخرى

يعطيك الصحه أختي نسمح كفيت ووفيت :thumb_up2:
إن شاء الله نجربها و نحط الصوره.
بالنسبه للمخبز أعطينا نصائح كيفاش نحطو le brilliant و وقتاش بعد ما ينشف أو قبل ؟
ممكن تصوري لنا الآله إلي ترحي فيها اللوز ؟أعطينا نصائح لنجاح طحن اللوز أرجوك .
إن شاء الله المرات الجايه عملنا سكاندرانيات بورق الفيلو إذا ما فيش إحراج .
أرجو أني ما ثقلتش عليك. :surrender:

 

[nissma34]

سلام
مشكورة اختي نسمة على المخبز ما علاباليش بلي يتخدم ايضا بالكاوكاو
و البنسبة للكيس انا استعمل الابر الطبية باش نعمل خطوط اسهل طبعا تكون جديدة غير مستعملة
و شكرا

تعرفي غالي اللوز اكثر الاخوات ميقدروش يشروه كوكاو مع العطر كيما قلت تقدر تزيدي البسكوي اقتصادي اما المخبز فهو اكيد باللوز احسن بكثير لكن يمشي الواحد على قد الحال حبيبتي
الكيس احسن ديري تقبة صغيرة في الزاوية تاعو يخرج حطوط رفيعة جدا اما الابرة جي خطوطها شوية عريضة

 

[nissma34]

من فضلك عزيزتى لما استعمل البقلاوة استعمل اللوز بدون قشور او بقشوره احسن

انت واش تبغي هو كي تخليه بالقشور يجي الحشو باهي لكن متخلهيش كامل بالقشور يمدو شوية مرارة تحبي نصف بنصف

 

[nissma34]

يعطيك الصحه أختي نسمح كفيت ووفيت :thumb_up2:

إن شاء الله نجربها و نحط الصوره.
بالنسبه للمخبز أعطينا نصائح كيفاش نحطو le brilliant و وقتاش بعد ما ينشف أو قبل ؟
ممكن تصوري لنا الآله إلي ترحي فيها اللوز ؟أعطينا نصائح لنجاح طحن اللوز أرجوك .
إن شاء الله المرات الجايه عملنا سكاندرانيات بورق الفيلو إذا ما فيش إحراج .
أرجو أني ما ثقلتش عليك. :surrender:

لما ينشف ناخذ طرف من اسفنجة نظيفة طبعا و نغطسها في اللماع الغدائي ونمسح الحلوى كاملة وكي نحط الزهرة لي بعجينة اللوز نغطس ريشة صغيرة باللماع ونرش فوق الزهرة

كاين كل الالون تاع brillant في القلاصاج الابيض استعملي دائما اللماع الابيض
انا نرحي اللوز في روبو عادي مي نصورهولك ونحطلك الصورة باه يترحي رقيق ارحيه دائما مع السكر

 

[بلبلة سطيف]

الاخت التى لها مشكلة لما ترحى اللوز زيتلها ما عليها الا ان ترحى اللوز مع السكر حتى لا يطلق الزيت وشكرا

 

[nissma34]

الاخت التى لها مشكلة لما ترحى اللوز زيتلها ما عليها الا ان ترحى اللوز مع السكر حتى لا يطلق الزيت وشكرا

هي امثل طريقة باش ميطلقش الزيت ويترحى رقيق راني قلت للاخت شكرا حنونة

 

[nissma34]

الدرس القادم حلوى عصرية بسيطة تبق الوردة

 

[lina20]

نحن في إنتظار الدرس شكرا لك

 

[nissma34]

بسم الله الرحمن الرحيم
الدرس الثالث
تبق الوردة ​

مدة الطهي:من 10 الى 15 د
درجة حرارة الفرن:150 د​

​

​

السنيوات المستعملة :

شكلها شريتو كيما الصورة و ضغطت عليها في الوسط عطيتلوا الشكل المطلوب

للعجينة
04 كيلات فرينة
1/2 كيلة مارغرين
فاني
قرصة خميرة
ماء زهر
صفار بيضة
للحشو
03 كيلات كوكاو
01 كيلة سكر رطب
مبشور ليمون
بيض حسب الكمية
نخلط الفرينة مع المارغرين+الفاني+صفار البيض ونجمع بماء زهر نترك العجينة ترتاح
نحضر الحشو نرحي الكوكاو مع السكر+مبشور الليمون ونضيف البيض حتى نحصل على خليط زي تاع المسكوتشو
نحل العجينة فوق النشاء ونعقبها في الماكنة رقم 04 ثم 06

نملا السنيوات بعد متدهنيهم بالزبدة بالعجينة ثم نضع ملعقة من الحشو نتركها ترتاح ساعة ونطيبها في فرن نخرجها من الفرن نغطسها بالعسل ونزينها بوردة وورقة من عجينة اللوز نرش اللماع فوق الوردة
la decoration
هادي شكل الحلوى طابية و معسلة

1- نصنع الوردة

01

02

03

​

2- نصنع الورقة بطابع ورقة من عجينة اللوز الخضراء
عفسات الدرس:
-لما ديري الحشو في المول اتركيها من ساعة الى ساعة ونصف باه كي ديرها في الفرن نتفخ وتمد شكل رائع
-لازم الحلوى تخافظ على لونها وتحمارش
-استعملي الزبدة طرية باه متخرجيش ليدام وانت تخدمي فيها
-حلي العجينة فوق النشاء باه جي واقفة كي طيب
-لكي تلصق الوردة اثقبي الحشو بعود اسنان ودخلي الوردة

 

[nissma34]

معلاباليش اخواتي الصور ظاهرة عندكم او لا

 

[lina20]

معلاباليش اخواتي الصور ظاهرة عندكم او لا

يعطيك الصحه ،يسلمو هادوك ليدين
الصور ظاهره لكن كبيره بزاف :heh:

 

[شيماء2]

اللي ما عندوش ميزان
يكيل الزبدة بنفس المكيال نتاع الفرينة ولا
يعني الزبدة وهي دايبة نفسو المقدار وهي طرية
ولا يختلف
​

 

[nissma34]

اللي ما عندوش ميزان

يكيل الزبدة بنفس المكيال نتاع الفرينة ولا
يعني الزبدة وهي دايبة نفسو المقدار وهي طرية
ولا يختلف​

نعم اختي نفس المكيال لي كيلتي بيه الفرينة ديري فية الزبدة طرية ماشي قاسحة تكون كي la pommade

 

[assia2007]

يعطيك الصحة اختي نسمة كلشي ظاهر