ياسمين عنابة ومحمد.م وحوار بين البيض والسمر ( فكرتنا من التراث )

[ياسمين عنابة]

والبيضة لبست لوّاحة ونزلت تتمشى بالساحة

والسمرة لون المسّاحة بالأراضي تلاقيهنّا​

(اللواحة : زرد من الذهب يلبس بالنحر )​

 

[محمد.م]

ياسمرة أوعك تهتمي ولا تنزعجي ولا تنهمي

البيضة شربها السمِّ موّتها وإرميها عنّا​

 

[ياسمين عنابة]

والبيضة عالعين والراس هي الحلا والإحساس

والسّمرة شبه النسناس عالشجر يتمرجحنّا​

 

[محمد.م]

والسمرة اللطف والذوق ومرتبتها بالعالي فوق​

والبيضة عليها بزوق ولاتهتم برضاهنّا​

( بزوق : إبصق )​

 

[ياسمين عنابة]

والبيضة قمر وما تطولها وكلي رقّة لما بقولها

والسمرة علف حطولها حتى تكرش وتسمننا​

 

[محمد.م]

والسمرة تشفي العليل والمجرّح والقتيل

والبيضة متل البرميل للأرض تزلزلنّا
​

 

[ياسمين عنابة]

والبيضة ياضو نهاري كوتلي قلبي بالناري

والسمرة حزام لزناري نلبسو شوي ونرميهنّا​

 

[محمد.م]

والسمرة محلى سمارها ومحلى الربطة على زنارها

والبيضة سلعة تجارة ماحدا بيقرب منّا​

 

[ياسمين عنابة]

والبيضة ضيّفها القهوة وغازلها بكلمة حلوة

السمرة يبعتلها بلوة جرب وعمى وتطرشنّا​

 

[محمد.م]

أوعك تغتري بالبيضة كلها حسد كلها غيضة

بدها تدريب وترويضة حتى تصير خادمة عنّا​

 

[ياسمين عنابة]

والبيضةحلوة وسنيورة تقبر قلبي شو أمورة

والسمرة منها مقهورة مجلوطة ورح تموتنّا​

 

[محمد.م]

والسمرة تحب الحنان وبركتها بأحلى جنان

والبيضة يبعتلا جِنان وبالشوارع تسرحنّا
​

 

[ياسمين عنابة]

والبيضة لوحة فنية وإسمها أحلى غنيّة

والسمرة جنس جنيّة ماحدا بيقرب منّا​

 

[محمد.م]

حاجة تنشدي وتنمطي ولعيوب البيضة لاتغطي

والسمرة على راسك حطي وخلي البيضة تفرقنّا​

 

[ياسمين عنابة]

حط على راسك كل البيض شئدك غيران ومريض

السمربدهم تبييض حتى نقبل نحكيهنّا​

( شئدك : كم أنت )​

 

[محمد.م]

والسمرة بتحب الناس كلها لطافة وإحساس

والبيضة ورقة كرّاس عالمزابل كبوهنّا​

 

[ياسمين عنابة]

والأبيض لبس الإحرامِ ولبس العلماء الكرامِ

والأسود لبس الحرامي لما بدو يسرقنّا​

 

[محمد.م]

والأسود لبس المستورة لما بدها تخبي نورها

والبيضة قلب العجورة مُرَّة وما بتتاكلنّا​

(العجورة : نوع من الخضار يشبه الخيار )​

​

 

[ياسمين عنابة]

يا أسمر بدي أداويك و على راسك رح أعطيك

ورح أضل أعلم فيك حتى تتعلّم تتمعنّى​

 

[محمد.م]

رح أعلمك أنت وناسك بالضرب عراسن وعلى راسك

وللمعنّى أنا ماسك وماشي بأصولي وأتمعنى​