بيت المغتربين

السلام عليكم في الجزء التاني من مسلسلنا
بعد قرار السلطات العليا بضرورة تغيير محل الاقامة وبضرورة صياغة سيناريو جديد لان الجزء الاول امتلا بالاحداث التي اثقلت كاهل المتابع
وعليها هادي نسختنا الجديدة لخلونا نتعارفو والتي ستحمل اسم بيت الغتربات لاننا خلاص تعارفنا وهنا سنستقبل الضيوف الجدد ونحكي عن مشاكلنا وهمومونا في الغربة
فحللتم سهلا ونزلتم اهلا
على بركة الله ندخلو الدار الجديدة وكل واحدة تجيب معاها حاجة ما نسخقوش اليدين الفارغين
وهاو ليكم الباب والمفتاح

 

[روعة انثى]

ام الحلوين مزالي 15jour على الهبطه
ادعيولي البنات ربي يسرلي اموري ونلحقو البلاد بخير هادا مكان

ربي يهنيك جمان و يسهلك امورك و تلحقي للبلاد بخير و على خير
و الحمدلله كي تفاهمتو على الرجوع مع راجلك المهم يا جمان كوني مع راجلك وين كان
وربي يرزقك من حيث تحتسبين و من حيث لا تحتسبين

 

[روعة انثى]

واش ختي روعة
انت مازال مادخلتيش ؟والله حسبتك متزوجة وصايي.........

اختي مريومة انا انخطبت غير هادا مارس حنونة مازال زواج مانيش مقلقة وقت ما جا الخير ينفع
العقوبة ليك ربي يرزقك بولد حلال يهنيك

 

[روعة انثى]

روعة وقيلة بنتي رايحة تزوج قبلك ههههه

ام الحلوين راني نشوف فيك فرحانة بمايكل :p:p:p مبروك عليك نسيبك الجديد مايكل

 

[روعة انثى]

رووووعة طل علينا القمر يا اختي توحشناك باين السخانة تاع شلف راهي تحرق

النور نورك حنونة و انتي القمر يا جهاد الغالية
الله يسلمك يسقسي عليك الخير و ربي يهنيك و يبارك فيك و مرحبا بسلامك
تاع الصح راهي السخانة في شلف جات على مرة وحدة

 

[ام الحلوين]

سلام بنات
سيرين و الله الخوف من هاد الكفار يا ختي راهي غايضتني عمري جيت لبلادهم و ندمت و في المدرسة يقراو من 9 حتى 3 تاع العشية يعني يفوتو وقت كبير معاهم
فطومة دروك تحكمني جلطة ادا حبت تكتشف في خوها و لا باباها .
روعة واش من فرحة يا حنونتي راني خايفة يحكمني السكر من الخلعة
ام امين مابانتش كيفاه من 2 و هي راقدة حتى 7 تاع العشية ؟؟؟؟؟؟؟

 

[joumane]

ليله سعيده البنات

 

[SAMIRA25]

السلام عليكم
واش احوالكم ان شاء الله كامل بخير راني تفنينت نقرا واش لي فات
غدوة ان شاء الله نراجع
ربي يهنيكم كامل و يسهللكم كل اموركم​

 

[أم أمين23]

ام الحلوين راني جيت
رقدت للستة وكي نضت كان عندي السوريز اي الكرز جابهولي البارج زهير ونصو بدا يخمش نقيتو باش نعملو مربى هاد وين كملت وجيت نحكيلكم
نبداها بالخميس وصلت الدراري للحضانة ومنها رحت عملت التحاليل ومنها للمارشي لقيت جماعة دوروني حتى مت ههه
روحت الدار الواحدة تقريبا صليت وتغديت وعلى ال2 ونص عاودت خرجت رحت جبت الدراري ومنها حمت الكار رحت لواحدة الجمعة دارتها واحد المغربية مروحة لبلادها ضرك نحطلكم حوايج من الي دارتهم عشينا عشية على الكيف امين برك هبلني كل دقيقة ينوضني
ومن بعد روحنا ال9 هكاكا تاع الليل انا وواحدة تقولي مازال الحال مازل وكاين الكار ومن بعد جينا نروحو لقينا الكار حبس رحنا بلاصة اخرى مشينا واحد 20 دقيقة باش لقينا واحد وما يوصلناش وين نسكني هبطنا باش نبدلو الي يدينا لقدام الدار على لخرة ماجاش تقربا ال10 غير ماجاش والمخلوق راح يصلي المغرب وانا نعيط نعيط وما يردش ومن بعد رد قلتو ماكانش الكار اوراح تدينا قالي ايه ضرك نجي كوبيت وجاء الكار راحت الي كانت معايا قاتلي نحشم خلي برك نروح وضرك يجيك
هي راحت وانا قعدت والمهلوض ال10 وحاجة ما جاش عاودت وينك يا سي قالك راني رايح لدار نجيب السيارة لخاطر اح للمسجد بلا وانا خلاص مت والدراري كيف كيف الكبير راح يرقد قتلو علاش ما قتليش من لول قالي قتلك راح نجيب المفتاح انت ما سمعتيش
المهم بقينا البرا حتان ال11 غير ربع المزية امان وكاين الناس المهم العشية الي عدات على الكيف مصاطت من التعب
روحت فاتني الجمع صليت المغرب وقعدت نستنى في العشا حتى 12 غير ربع راقدة وانا قاعدة
واليوم غدوة يعني الجمعة قلت ما نديش الاولاد للحضانة ومن بعد خممت جايتني ضيفة لازمني انضف شوي والدراري يهبلوني ايا قلت تعب الطريق ولا تعب العياط نهار كامل هههه ديتهم ووليت
بدلت الديكور ديت خزانة وجبت خزانة وديفاني والطابلة المهم خدمة كملت مع وقت الدراري رحت جبتهم وكي جيت نخرج نلقى الاسونسور حابس وانا نسكن في السابع هبطت على رجليا وكي وليت كيف كيف طلعت على رجليا قلب خرج ما طلعت وجيت الثلاثة جات الضيفة وهي كانت جاية باش نطيبو الملوخية مع بعض انا ما نعرفش نطيبها وراجلها وراجلي ما ياكلوهاش قلنا نطيبوها كيف كيف ونعشيو مع بعض وجابتلي حوايج بعثتهملي ماما من البلاد
وانا زدت التليتلي باش كي يجي راجلها نحكموه للعشا ودرت الكسرة ووو...
المهم روحو من عندنا 11 ونص هكاكا
عشينا عشية باهية وجاء الليل وبدأت المعانات ههههه رقدت وما نقلكمش باش نتقلبو الا حالة باش انوش كيف كيف وكملهالي معاذ الصباج كي نضنا انا نضت بالسيف وهو بزعلي الحليب كامل في الفراش والله وليت نبكي من التعب المهم كان عندي خياطة تاع درا خيطتو وقعدت قاعدة حتان ال11 هكاك باش نضت غسلت الماعن تاع العشا وفرزت شوي ودوشت الدراري وكي جيت نقعد على الميكرو قبيل جاني انوم قلت خلي نرقد شوي رقدت شوي وكي نضت فرزت الكرز وها قد اتيت هههههه
وهكدا يا سادة يا كرام كانت الثلاث الايام الفائتة ههههه
والا ولدت هاد الايام الجاية ما تستغربوش
وهاي ليكم الصور

 

[أم أمين23]

ما صورتش كل شي دارت ثاني طارط وتيراميسو ومسمن

 

[أم أمين23]

 

[SAMIRA25]

بصحتك ام امين ويكاند هايل ما تحسيش خلاص
بصح غير بالشوي على روحك
ما بقالكش و تخفافي و ديري رايك في تبدال الحوايج ​

 

[SAMIRA25]

اممم شهيتيني و جوعتيني ام امين منين رايحة دوك نجيب الماكلة هدي بصحتكم باين فيكم تونستو مليح ربي يهنيكم​

 

[ام الحلوين]

ام امين بصحتك حنونة و الله الواحد مليح يبدل شوية خير من القعاد في الدار ربي يتقبل من صحبتك و كل شي يشهي .
و نتي بصحتك العشا نتي و ضيافك .
و هذي تاع الراجل و السيارة دايما تصرالي مع راجلي يديني عند صحبتي و يقولي نجي بكري و يخليني حتى يجي راجلها و يتعشى و انا نحشم على روحي و هو كل مرة يقولي الله غالب الخدمة .

 

[أم أمين23]

الله اخليك سميرة والله نقول ما ندير والو ونجيبها صح ايامات ما ندير والو ومن بعد نتعطيها مرة واحدة
شفتي ام الحلوين عمايل الرجال ديما هكا مبهدلينا هههه

 

[ام الحلوين]

بنات شكون تعرف علاج الحب لي يدير في الفم ؟؟؟
اسحاق عندو يومين ماحبش ياكل و حتى الحليب يحرقو كي يشربو اليوم ماكانش طبيب ديتو غير للصيدلي عطاني كريم تاني حرقاتو ، ماعرفتش واش نديرلو لسانو راه داير نبولات كيما النار كي تحرقنا ؟؟؟

 

[sirin2013]

ام امين بصحتكم وباين كلش يشهي وربي يتقبل هكذا لواحد يبدل لجو
وربي يتقبل على العردا ,بصح ساعفي روحك راه مبقلقش بلاك بعيد شر ادري لبيبي بتعب بزاف

 

[SAMIRA25]

و الله ما نعرف ام الحلوين ربي يجعله الشفاء
حنا كان كي يطيب فمنا ديرنا ماما الشب ما علباليش كيفاه يسموهتاني كي الحجر ابيض تدوبو في الماء و نشلو بيه و الله اعلم​

 

[ام الحلوين]

شكرا حبيبتي سميرة نعرف الشب بصح ماضنيتش كاين هنا ، انا حبيت نديرلو الما و الملح يشلل بيهم فمو بصح هو الماكلة راهي تحرقو كون نديرلو الما و الملح قولي يعملها في سروالو هههههه البارح مديتلو العسل الحر قلت بلاك مليح .

 

[رنيم الغربه]

رنيم حنونة كي راكي انا راني بخير الحمدلله
انا مانيش نحوس على الفلامو راني نسقسي بالتقريب اي لغة شحال تقراي فيها بالتقريب ؟؟؟؟؟
و نقيس عليها اللغات اللي حابة نديرهم الفرنسية و الانجليزية
راني باغية غير نجي نبدا نقرا قبل ما يبداني الوحم و الحمل راني باغية نتمكن من الفرنسية اكثر و الانجليزية باش نلها و ما نحسش روحي وحدي و لا في غربة خاطر راجلي خدام نهار كامل
راني ندير في حسابي باش نشغل وقتي بحاجة فيها الفايدة و اذا كاين وين حفظو القران تاني مليح
و من بعد نكون مع التربية ان شاء الله
الله يجعل ربي يسهلي و يهنيني ما نيش باغية نندم يا الغالية

حبيبتي ان شاء الله ربي يوفقك اللي فيه الخير و يسهلك امورك كلها يا رب الفرنسيه كاينين ليزيكول مي الانجليزيه خصك بريفي على خاطر ماشي لغتهم ان شاء الله تتوفقي حبيبتي:up:

 

[رنيم الغربه]

بنات شكون تعرف علاج الحب لي يدير في الفم ؟؟؟
اسحاق عندو يومين ماحبش ياكل و حتى الحليب يحرقو كي يشربو اليوم ماكانش طبيب ديتو غير للصيدلي عطاني كريم تاني حرقاتو ، ماعرفتش واش نديرلو لسانو راه داير نبولات كيما النار كي تحرقنا ؟؟؟

بالشفا عليه حنونه شوفي ما تخلطيلوش انا وليدي جاتو مره الفارماسيان عطالو كريم و الله ضربه وحده تحرقو شويه مي ايفيكاس