رآنــــــــــي جيت خخخخخخخ
مرحبا مرحبا، نورتِ بيك وباسئلتك المميزة :yahoo01:
نبداو على بركة الله
بسم الله
- كيف تصفين مشوارك و نجاحك في اللمة ؟
مادامني درك نجاوب على اسئلتك يسمى الحمد لله ^^
لما دخلت للمة في سنة 2013 كنت نكتفي بمشاركة محتشمة، ندور في القسم العام وقسم الصور وقسم تهذيب النفس
ماكانتش عندي جرأة باه نبان قدام الجميع ونخلي بصمتي
بصح نهار غبت ورجعت في رمضان هادا لي فات، لقيت اعضاء جدد دخلو من ورايا وجدد ودارو مكانتهم
تما عرفت بلي الامر يعتمد على العزيمة و على الطريقة الصحيحة لي تخلي بيها بصمتك
تما وليت ندخل لكل اقسام اللمة ونخلي بصمتي، حتى ولو نغلط مرة نتعلم ونوصل
والحمد لله المهم كسبت قلوبكم هاداك هو الاهم
- و من كان سببا في نجآحك ؟
اذا كان داخل اللمة فهو انتم ^^، لما شفت عزيمتكم تشجعك
- ماهو سر وفائك للمة الجزائرية ؟
حتى انا ماعلاباليش هههه،نحبها الله غالب، ونحب ناسها بدرجة كبيرة
هذا لي يخليني نرجعلها دايما، جو الاسرة لي فيها مايخليكش تبعد خلاص
- ما هو اول شيء تبدأين به نهآركـ ؟
اول ما نفتح عيني نشرب كاس ما ههههه :d
- من هو العضو الذي تعتبرينه قدوتك ؟
كاين بزااف والله، راني كل يوم نتعلم ونستفاد منكم
- من افضل الزوآج او العزوبية خخخخخخخخخخ ؟
فيزوج ملاح ^^، العزوبية مرحلة تعيشي فيها تحت سقف واحد مع اغلى شخصين في الوجود لي هوما الأب والأم
ويكون عندك اخوة وتعيشي معاهم ذكريات الطفولة وغيرها، بيتك الأول عمرك لا تنسيه لأنك فيه تربيتي وكبرتي
ودزء كبير من ذكرياتك يحتلها هاد البيت
اما الزواج، رايحة تعيشي تحت سقف واحد مع شخص لي يفهمك ويحافظ عليك وعلى مشاعرك
ويكونلك الشخص لي تحتمي بيه بعد والديك
ومن تم تبدا حياة جديدة وتكون عندك اسرة جديدة ويكونو عندك ولاد
ورايحة تبداك ذكريات جديدة اضافة للذكريات القديمة
على هادي فيزوج ملاح
- واش هو المجال لي راكي ناجحة فيه 100/100 ؟
والله ماعنديش حاجة معينة، انا من صغري متفوقة بالرسم والتشكيل
في الابتدائي كانت كي تقدملنا الاستاذة رسمة توضعهالنا في اعلى السبورة وانا كنت نقعد في آخر طويلة
كي نخلصو الرسم تلقاني رسمتلها الرسمة بأدق تفاصيلها حتى تولي تجيب الاساتذة لخرين تقولهم شوفو واش رسمت :d
ومن بعد وليت نرسم وجوه الناس بإتقان، لكن بعدما عرفت بلي حرام رسم الارواح وليت نرسم الطبيعة فقط
- واش هي افضل مادة كنتي تحبي تقرايها ؟
كنت نحب الرياضيات، وكنت متفوقة فيها بزااف، لكن ماجيت نكبر ولقيت ظروف صعبة ماخلاتنيش ندير دروس خصوية
لمدة دراستي كاملة ، ومن بعد حبيت مادة الاقتصاد والعام لي فات حبيت مقياس التأمينات
لدرجة معدلي كامل تاع هاد المادة خرج 17.15 وكنت الثانية مابين 154 شخص، سبقني طفل برك :down:
- و علآش ؟؟
بالنسبة للرياضيات كانت موهبة، اما الاقتصاد حبيتها لأنها حلوة في دراستهان والتأمينات تاني نفس الشي وزيد الاستاذة كات اكثر من رائعة
- كم تحفظين من القرءآن ؟
والله ليس بالكثير حبيبتي، انا في رمضان دايما نحفظ السور الطويلة شوي، ورمضان لي فات حفظت سورة الكهف والملك
وجزء من يوسف وجزء من سورة يس
لكن ماكملتش الحفظ للاسف واحيانا ننسى كن مانعاودش
- ما هو شعورك عندمات كنتي تدرسين ؟
كاين ظروف عديت عليهم ملاح وكاين ظروف لي خلاولي ذكريات سيئة
بصح اكيد ذكريات الدراسة ماتتعاودش سواءا كانت مليحة ولالا
- ما هو الشيء الذي يجعلك سعيدة ؟
لما نشوف لي نحبهم فرحانينن ولما نشوف طفل صغير قدامي :$
ولا حيوان صغير ( نموت على لولاد والحيوانات ) :d
- ماهي الصفة أو الصفات التي تكرهينها ؟
التكبر والنميمة والنفاق
- في رأيك ماهو السن المنا سب للزواج ، ؟
ماكانش سن محدد غاليتي، كاين لي راهم 30 وماش قادرين على تحمل المسؤولية
لما يكون الرجل واعي والمرأة واعية ويعرفو معنى المسؤولية تما يقدرو يأسسو اسرة
- مـآآهـو أكـثر خـبر أحـزنـكِ لـحدِ الآن؟
لما عيط بابا وقالنا جداتكم ماتت
ولما طلعت للجامعة وقالولي عاودتي عام بعد العام الاسود لي عديتو
- صفي نفسك في كلمات ؟
خجولة :$، حنينة، شديدة البكاء هههه، اجتماعية
- لو حياتك قصة ما هو عنوانها ؟
ويبقى الأمل ^^
- نصيحة لشباب و بنات اليوم ؟؟
بالاكم تبعدو على طريق ربي، والله لي يحكم في ربي عمرو لايخيبون حتى ولو تكوني غارقة يخرجك من الغرق ويفتحلك ابواب ماظنيتيهاش تتحل
ربي معاك
جاوبي خيتو ع اسئلة راني نتفرج
نخااااااف من هاد الكراسي من بكري وحطوني فيه مرتين برك
السلام عليكم
مرحبا باللؤلؤة على كرسي التعارف
ما شاء الله ما خلاوش سؤال الا و سبقوني الله يبارك فيهم
اكتفي بالمتابعة و التقرعيج كما تقولو
جلسة طيبة اتمناها لك عزيزتي مريم
لك مني هده الباقة الجميلة
واحد ما يعرفني ههههههههههههههههههه ،قلال برك
و مايحبونيش بالعكس حابين يتهناو مني هههههههههههههههههه ، قريب ان شاء الله
اهلا شيمومة الرائعة، ماتزيديش تعاودي الهدرة هادي، ان شاء الله تبقاي ديما قدامنا وماتغيبيش خلاص
واذا تطلب الامر نربطك بسنسلة ههههه :d
لا علينا ، تواحشتي البشماق اكيد
هههههه باينة توحشتو :d
شكون قال رقدنا استناي برك
هيا مالا نرجعو لجو الأسئلة
بسم الله وعلى بركة الله
1- كلمة عن الصلاة ؟
الصلاة تربية وأخلاق قبل ماتكون عبادة، لأنو في قول الله عز وجل:{ إن الصّلاة تنهى عن الفحشاء والمُنكر} ، يعني الصلاة تربيك وتبعدك على الفواحش والمنكرات
واذا نتا تصلي وتقوم بأشياء غالطة؟ مالا راجع نفسك صلاتك ماراكش تصلي فيها قدقد، خاطر لي يصليها قدقد راهي تربيه تلقائيا
2- كلمة عن الموت ؟
نكذب عليك كن نقولك الموت حاجة عادية، الموت حاجة تخوفني بكل صراحة، علاه؟ لأنو الموت بداية وماش نهاية كيما يتوقع البعض
لأنو الحياة لي كنت عايشها كاملة ماعندها حتى معنى، حياتك الحقيقية تبدا بعد ماتموت، تما الشخص لي سبك ورجعتلو السبة وربحت ذنب عليهت ندم عليها، تما الشخص لي ظلمتو
ودعواتو عليك بالشر راهيت لحقك لقبرك تخليك تحس بالندم، ربما هادا عالم غيب ومانقدرش نقول واش قادر يصرا، لكن الشي لي متأكدة منو أنو الحياة الحقيقية تبدا تما
3-ماذا تفضلين الحجاب ام الجلباب ؟
بصراحة هاد النقطة تحتاج شرح طويل، خاطر لما تقوليلي أيهُما تفضلين الحجاب أم الجلباب، إذا كان الحجاب هو الحجاب الاصلي لي قال عليه الإسلام
فإن الحجاب هو نفسو الجلباب، ربي سبحانو حددلنا صفات الحجاب كيفاه تكون وهي نفسها صفات الجلباب، لن في وقتنا لدرجة نساءنا فسدو صورة الحجاب و اختارعو حجاب عصري، ولا كاين تفرقة
بين الحجاب و الجلباب، بإعتبار أنو الحجاب هو خمار على الرأس فقط والجلباب سترة كاملة، وهادا خطأ ، ربي وضع حجاب واحد للمرأة المسلمة ولي هو الجلباب ولي يعتبر حجاب بعد
تقوليلي فرق بين الجلباب والنقاب نقولك كاين فرق، مع انو النقاب نوع من انواع الحجاب، اما الحجاب والجلباب فهما واحد
واذا كان سؤالك غاليتي تقصدي بيه أنو الحجاب هو اللبسة العادية لي يميزها خمار فقط، نقولك اني نفضل الجلباب ونفضل كل حاجة تزيد في سترة المرأة
مع أني لحد الآن مالحقتش لهاد المرحلة وين نلبس لباس طاهر كيما الجلباب، راني نحسن من روحي بلعقل، والآن الحمد لله لباسي تقدري تقولي راضية عليه 85 بالمئة
لكن اذا كتبلي ربي وسمحتلي فرصة باه نغير ونتستر كتر ماش رايحة نرفضها بإذن الله المولى ونطلب من ربي يعيني على مثل هاد الخطوات
4-كلمة عن الانتخابات ؟
الانتخابات هي خطوة وين الشخص يعبر عن رايو الشخصي ، ويساعد في اتخاذ قرار يخص يهم والمجتمع
5-لونك المفضل ، وطعامك المفضل ؟
البنفسجي :$ نحب البطاطا المقلية :d ، يعني نحب كلشي تقريبا، خاطر كن نبدا نكتب واش نحب ندير جرنان ههههه
6- صفات تكرهينها في الاشخاص؟
كيما سبق وقلت، نكره التكبر والنميمة والنفاق
7-لؤلؤة قسنطينة قبل اللمة و بعدها ؟
تغيرت بزاااف، خاصة خلال المرة الاخيرة هادي، راني حاسة روحي قاعدة نتقدم للأحسن بإذن المولى عز وجل واستفدت بزااف من الاعضاء
8- من المقرب لكي في البيت ؟
كامل مقربين ليا لكن الاكثر ماما وختي، يعني مكانة الام وحدها ومكانة الاخت وحدها
9- دكرى من :
الابتدائي
كاين حادثتين في الابتدائي صراولي ، وبقاو في بالي للآن
لكن طوال بزاف لدرجة درت عليهم موضوع وهو هادا
http://4algeria.com/forum/threads/429211/
المتوسط
كاين بزااااااف أحداث وذكريات
لكن لي جاتني درك في بالي، هي نهار كنت نقرا فيا لسنة رابعة متوسط، وكنت المفضلة عند استاذ الانجليزية ، لدرجة كان يقرا النص وفجأة يحبس ويقولي كملي من ورايا
ونشفى عليها مرة جبت عندو 19.5، مالا كي عيط باسمي قالي عمل ممتاز، وقالي نتي متأكد منك 1000 بالمئة تجيبي شهادة التعليم المتوسط
هادا واش تفكرت حبيبتي
الثانوي
صراولي زوج حوايج
الحاجة الأولى نهار مرضت وراين ذكرتها في موضوع حبيبتي ليدي
http://4algeria.com/forum/threads/433457/
والحاجة الثانية في السنة الثانية ثانوي نهار تكسرت من رجلي هي ماش تكسيرة طول، تقدري تقولي التواء، هاداك النهار وحدو ههههه، كنت خارجة نشفى عليها على 10 ماقريناش، وانا خارجة وقاعدة نمشي فيا لساحة حتى نلقى روحي تعكلت وطحت ههههه، يعني سبحان الله ربي كي يكتب حاجة، ومن بعد نضت نفضت حوايجي انا غير جيت نحط الخطوة الأولى ونحس بواحد السطر الله لا يشوف فيه مومن، مالقيتش كيفاه ندير بقيت نعفس عليها والسطر قاتلني ونمشي بعقلي غير باه نلحق للدار، والمشكل الدار بعيدة على الليسي بمسافة تتطلب 20 دقيقة مشي هكاك، علابالك نمشي في الطريق والدموع طايحين والشعب كامل يتفرج فيا ههههه، وانا المشكل السطر قتلني وقاعدة نمشي عليها، وغير وصلت للدار ونحيت الصباط حاشاك نلقى رجلي منفوخة خلاص، تما بعد رحت للسبيطار ودرت الجبس ونشفى عليها شهر بالاك باه رتاحت ووليت نمشي عليها ، في الاول لقيت صعوبة لكن من بعد وليت عادي
ماقدرتيش تنسايها
10- ماهي نقاط القوة والضعف لديك ؟
11- من هي مريومة ؟
فتاة بسيطة ومن عائلة بسيطة، خجولة وحساسة زيادة عن اللزوم، هدفها في الحياة، إرضاء الخالق وطاعة الوالدين وكسب قلوب الغير
12- نظرة للمجتمع
المجتمع كي الكاس لي نصو مملوء ونصو فارغ، اذا شفت للفارغ رايح تقول المجتمع فاسد واذا شفت للملوء رايح تقول المجتمع مليح ^^
13- كيف جوكي الاسري ؟ محيطكي الجامعي ؟
الجو الأسري، الحمد لله والديا قايمين بالواجب وموفريلنا جو ماشاء الله
المحيط الجامعي بصراحة فيه الناس المليحة والناس الفاسدة، وبما انو هدفي الدراسة فقط
مايهمنيش المحيط كيفاه يكون، المهم نقرا قرايتي ونرجع للدار
14- عبارة تعجبكي
بما اني سبق وذكرت العبارات لي تعجبني
رايحة نقول هنا كلمة نحبها هي: لعله خير
15- مادا يتبادر في دهنك حين تخطئين في حق أحدهم ؟
بصراحة قليل وين نقيس عبد، لكن اذا قستو نخمم في اول طريقة نصحح بيها الخطأ تاعي سواءا بطلب السماح او بطريقة اخرى
و لي عودة إن شاء الله
